Raica sara na lewena

Na Website ni iVakadinadina i Jiova

Digia na Vosa vakaViti

OKOTOVA 4, 2012
UKRAINE

Tau Vakadodonu na Lewa e Ukraine

Tau Vakadodonu na Lewa e Ukraine

Ena ika26 ni Seviteba 2012, e tarova na Mataveilewai Cecere e Ukraine na kena sagai me tauri vakailoa na tikiniqele e toka kina na valenivolavola ni tabana ni iVakadinadina i Jiova.

Era volia na tikiniqele qori na iVakadinadina ena 1998. Ia ena 2008, na kena itaukei makawa e volitaka tale ena ikarua ni gauna ina Sport Development Center LLC (SDC). Na veivoli va qori e vakatokai e Ukraine me property raids (tauri vakaukaua na qele).

E vakatulewataka e dua na tabana ni mataveilewai e cake ni donu vakalawa na veivoli ni SDC, qai sega ni rogoci tale na nodra kisi na iVakadinadina.

Ia e vuki na uto ena Tiseba 2011 ni sa tau vakadodonu na lewa, e duavata na mataveilewai levu kei ira na iVakadinadina. Ena Epereli 2012 e sega ni vakadonui me rogoci na kisi ni SDC. E vakadeitaka qori ni dodonu ga me nona na iVakadinadina i Jiova na tikiniqele ya. Oti e tolu tale na vula e dikeva lesu na mataveilewai ena siti o Lviv na vakatulewa sega ni vakalawataki ni mataveilewai e ra ena kena soli ina SDC na tikiniqele.

Ena iotioti ni nodratou sasaga na SDC me ratou taukena na tikiniqele, ratou vinakata me rogoci tale ena Mataveilewai Cecere e Ukraine na vakatulewa a caka ena Epereli. Ia ena ika26 ni Seviteba, e sega ni vakadonui me rogoci tale na kisi ni SDC.

Ke a vakadonui na kena tauri vakaukaua na tikiniqele qori, sa na sega na valenivolavola ni iVakadinadina i Jiova kei na nodra tikiniqele levu, ena lai vakaleqa na cakacaka e qaravi ena itikotiko liu e Ukraine.