Raica sara na lewena

Na Website ni iVakadinadina i Jiova

Digia na Vosa vakaViti

13 FEPERUERI, 2015
UKRAINE

Tauri Vakaukaua na Vale ni Soqoni ena Tokalau kei Ukraine

Tauri Vakaukaua na Vale ni Soqoni ena Tokalau kei Ukraine

Era taura vakaukaua e dua na ilawalawa tagane era vakaiyaragi eso na Vale ni Soqoni ni iVakadinadina i Jiova e Ukraine. Era toka na Vale ni Soqoni qori ena yasayasa o Donetsk kei Luhansk ena tokalau kei Ukraine, na vanua e yaco tiko kina vakalevu na vakacaca. Dua na ka nodra dau veivakaduiduitaki na tagane vakaiyaragi qori, ra beca tale ga na nodra galala ni sokalou kei na nodra veimaliwai na iVakadinadina, vakavuna mera taketetaki ira kina vakalevu na iVakadinadina i Jiova.

Sa sivia e 20 na yabaki na nodra marautaka na iVakadinadina i Jiova e Ukraine na galala ni sokalou. E kaya o Vasyl Kobel e veiqaravi tiko ena valenivolavola ni tabana ni iVakadinadina i Jiova e Lviv: “Na inaki ni neimami dau soqoni ena vanua ni sokalou me keimami dau wili iVolatabu, masu tale ga. Keimami dau saga me vinaka neimami itovo ena neimami itikotiko. Ia ena vica na vula sa sivi e vakaleqai sara vaka ca na nodra bula na lewenivanua kei ira na iVakadinadina i Jiova ena vakacaca a yaco ena tokalau kei Ukraine.”

E vosa tiko o Kobel ena vukudra na le 150,000 na iVakadinadina i Jiova e Ukraine. Ena vica na vula sa oti, era sa drovaka na ivalu na iVakadinadina. Ia rauta ni le 17,500 tale na iVakadinadina era tiko ga ena yasayasa o Donetsk kei Luhansk, era saga mera qarava nodra bula e veisiga ni yaco na tiko yavavala. Ni tauri vakaukaua na nodra Vale ni Soqoni na iVakadinadina, sa sega na vanua mera sokalou kina na vica vata na udolu qo. Era mani veiosoosoti ga ena dua na vale mera sokalou kina. Qori ena vakavuna vei ira eso mera vodo tale me rua na aua mera lai soqoni.

Tauri Vakaukaua na Vale ni Soqoni

E sega ni dau yaco vakalevu na kena dau tauri vakaukaua na nodra Vale ni Soqoni na iVakadinadina i Jiova, ia era dau vakacacani ena vuku ni nodra vakabauta vakalotu, ra raici ira tale ga vakaca na iVakadinadina. E tukuna e dua na nodra iliuliu na ilawalawa tagane qo ni nona inaki me “vakawabokotaki ira na iVakadinadina i Jiova” ni kilai qai vakadonui ga e Ukraine na Lotu Orthodox. E tukuna e dua tale nodra iliuliu, “Sa vakarau yali na iVakadinadina i Jiova.” Era vakarerei na iVakadinadina i Jiova, ia era vakadeitaka mera toso tiko ga e Ukaraine.

E sega ni dua vei ira na iVakadinadina i Jiova e mavoa, ia e vakaleqai na nodra taqomaki kei na nodra galala ni veimaliwai kei ira na nodra lewe ni lotu. Era curubotea na Vale ni Soqoni ena tauni o Horlivka e Donetsk e dua na ilala dau vakacaca, era vakarerei ira na soqoni tiko, wili kina o ira na itabaqase kei ira na gone. Ena dua tale na gauna, era kidroataka na iVakadinadina ni sa veisau na loka ni matamata nira yaco yani ena Vale ni Soqoni, sa vakayagataki tale ga na nodra vanua ni sokalou me bareki ni sotia.

Na ka sa Caka

E kaya o Kobel: “Sa veitaratara na valenivolavola ni tabana e Lviv vei ira na veitabana ni matanitu kei ira na vakailesilesi me baleta na veika tawadodonu e yaco qo. Me kila tale ga na matanitu ni sega ni dua na tale na ka era rawa ni cakava ni tauri vakatawadodonu na vale ni soqoni.” E lesia tale ga na valenivolavola ni tabana eso na tagane nuitaki ena ivavakoso ni iVakadinadina i Jiova e Donetsk kei Luhansk mera taqomaki ira na lewe ni ivavakoso. E vakadreti vei ira na tagane qori ni bibi na bula mai na kena taqomaki na Vale ni Soqoni. Mera kua ni cakava e dua na ka me vakaleqai kina na nodra bula na iVakadinadina.

Se sega ni dua na ka vakalawa e macala, mera taura tale na iVakadinadina na nodra Vale ni Soqoni se sega. Era vakila na ituvaki dredre na iVakadinadina, ia era tomana tiko ga nodra sokalou. Era vakanuinui tu ni na vakasukai vei ira na nodra Vale ni Soqoni, mera soqoni vata tale kina kei ira na tacidra.