Raica sara na lewena

RUSIA

Vesu ena Vuku ni Nodra Vakabauta

Vesu ena Vuku ni Nodra Vakabauta

Sa qai kaukaua ga nodra sasaga na vakailesilesi ni Matanitu o Rusia mera vakacacani ira na iVakadinadina i Jiova, nira veivakarerei ni na vakaruataki na veika e yaco ena Matanitu Makawa kei Rusia. Ena ika14 ni Okotova 2020, era sa bala e valeniveivesu e 43 na iVakadinadina i Jiova, le 27 e vakatabui mera biuta nodra vale, e le 191 tale ga e sega ni vakadonui mera biuta na nodra tauni. Era beitaki na iVakadinadina i Jiova qo nira tokona, tuvanaka ra qai vakailavotaka na isoqosoqo e “vakavu tikoyavavala.” Era vaqaqai tiko ena gauna qo e rauta nira le 373 na iVakadinadina i Jiova, toka nodra yabaki bula ena 20 ina 89.

Era vaqara iulubale na vakailesilesi nira yavutaka nodra sasaga ena vakatatabu e caka ena isoqosoqo vakalawa ni iVakadinadina i Jiova ena Epereli 2017, era vakatanitaka tale ga na Lawa ni Basulawa, na Article 282. Kena dina, era veilewaitaki ga na iVakadinadina i Jiova ena vuku ni nodra sokalou. Ke vakabau nodra veibeitaki na vakailesilesi, ena rawa sara ga nira totogitaki eso na iVakadinadina i Jiova era vesu tiko mera yabaki tini e valeniveivesu.

iWalewale Era Vakayagataka na Vakailesilesi e Rusia Mera Vesuki Ira na iVakadinadina i Jiova, Qai Totogitaki Ira Tale ga Kina

Me tekivu mai na Feperueri 2018, era sa muria tiko na tabana ni lawa e dua na iwalewale mera vesu kina na iVakadinadina i Jiova. Era dau curuma vakaukaua na ovisa vakaiyaragi nodra vale na iVakadinadina i Jiova, era dodoka na dakai e uludra na tiko e vale—okati kina o ira na gone kei na itabaqase, ra qai vakasaurarataki mera davo ena fuloa. Era na yanaraka na lomanivale, taura na ka era taukena, ra kau tale ga eso na iVakadinadina i Jiova mera lai vakatarogi tale. Era veibeitaki na dauveivaqaqai nira vakavu tikoyavavala eso na iVakadinadina i Jiova qori, ra qai kerea na veivakadonui ni mataveilewai mera lai wawa veilewai e valeniveivesu. Nira sa vesu, era qai dau kerea tale ina mataveilewai na tabana ni veibeitaki me toso nodra wawa veilewai. Sa dau vakadonuya tu ga na mataveilewai na kerekere qori. Raica mada qo na veika ratou sotava na le walu na iVakadinadina i Jiova eratou beitaki, ratou totogitaki tale ga ni ratou vakavuna na tiko yavavala. *

E vakadonui me sereki totolo o Dennis Christensen ena ikatolu ni yabaki ni nona vesu. Ena ika23 ni June 2020, e kaya na Mataveilewai ni Yasana e Lgovskiy e Kursk ni vinakati vei Mr. Christensen e $5,759 na ilavo ni Merika me sauma kina na vo ni tolu na yabaki me vesu kina. Ia e qai kaya o Mr. Aleksei Shatunov, na dauveibeitaki ni Yasana e Kursk me rogoci tale na kisi qori. E yavutaka na nona vakatulewa o Mr. Shatunov ena so na itukutuku lasu ni sega ni qarava vinaka na nona cakacaka e valeniveivesu. E vesu tale tiko qo vakawawa o Mr. Christensen me yacova na ikarua ni nona veilewai e se bera ni vakadeitaki na tikinisiga. Ena gauna qo e vesu tu ena dua na rumu era dau vesu ga kina na daubasulawa vakadomobula me tini na siga dina mada ga ni tautauvimate tu, ni beitaki ni beca eso na lawa lalai ni valeniveivesu.

Sa yabaki 46 o Mr. Christensen, e turaga tale ga ni Denmark. E vesu mai Oryol ena ika25 ni Me 2017, nira curu yani na ovisa vakaiyaragi kei na tabana ni Federal Security Service nira soqoni tiko na iVakadinadina i Jiova. E totogitaki me ono na yabaki e valeniveivesu o Mr. Christensen ni dua na iVakadinadina i Jiova, qori ni oti e rauta ni dua na yabaki nona veilewai tiko ni rairai yani vaka50 vakacaca ena mataveilewai. Ena ika6 ni Feperueri 2019, e vakarogoya o Turaganilewa Aleksey Rudnev ena Mataveilewai ni Yasana o Zheleznodorozhniy e Oryol ni dina na ka e beitaki kina o Christensen ni ‘tuvanaka na nodra cakacaka na isoqosoqo dau vakavuna na tikoyavavala,’ ena Article 282.2(1) ena Lawa ni Basulawa ena Matanitu o Rusia. Ena ika23 ni Me 2019, eratou sega ni vakadonuya e tolu na turaganilewa ena mataveilewai ni Yasana e Oryol na kerekere nei Mr. Christensen me rogoci tale nona kisi, eratou sega ni veisautaka na kena itotogi me yabaki ono e valeniveivesu.

E vesu o Sergey Klimov ena ika3 ni June 2018, nira curuma vakaukaua na ovisa e rua na nodra vale na iVakadinadina i Jiova. Era mani kau mera lai vakatarogi kina e 30 vakacaca na iVakadinadina i Jiova wili kina e dua na marama yabaki 83. Era sereki kece vakavo ga o Mr. Klimov. Era beitaki koya na ovisa qai vesu tu me wawa veilewai me rua na vula. Ia e toso sara me dua na yabaki lima vula me yacova ni veilewai qai tau na kena itotogi. Ena gauna kece qori e sega tu ni sota kei watina se nona vuvale. Ena ika5 ni Noveba 2019, e totogitaki Mr. Klimov na Mataveilewai ni Tikina e Oktyabrsky mai Tomsk me ono na yabaki ni beitaki ni ‘tuvanaka tiko na cakacaka e vakavuna na tiko yavavala.’ Ena sereki o Mr. Klimov ena Julai 2023.

Ena ika12 ni June 2018, era curuma vakaukaua na ovisa na nodratou vale e vitu na iVakadinadina i Jiova e Saratov. Ratou beitaki kina o Konstantin Bazhenov, Aleksey Budenchuk, Feliks Makhammadiyev, Roman Gridasov, Gennadiy German, kei Aleksey Miretskiy. Era basuka na katuba na ovisa, era taura vakaukaua na ka era taukena na tacida, era qai biuta tale ga ena nodra vale na noda ivola sa vakatabui tu na kena veisoliyaki. Era kauti iratou tale ga e sivia ni tini na iVakadinadina i Jiova mera lai vaqaqai, qai vesuki ratou me yacova sara na bogilevu. Eratou veilewaitaki e tolu na tacida tagane, qai voleka ni dua na yabaki nodratou wawa veilewai.

Ena ika19 ni Seviteba 2019, e vakatulewataka na Turaganilewa ni Mataveilewai ni Tikina e Leninskiy o Dmitry Larin, me ratou vesu na ono na tacida tagane qori. Ratou beitaki ni ratou tuvanaka na ‘cakacaka e vakavuna na tiko yavavala.’ E rua vei rau na vesu qori erau totogitaki me tolu veimama na yabaki, dua tale e tolu na yabaki, kei ratou na vo ni tolu eratou vesu me rua na yabaki. Kuria oya, e vakatulewataki tale ga ni gauna ratou sa sereki mai kina, eratou na sega ni rawa ni vakaitutu ena vanua cava ga eratou cakacaka kina me lima na yabaki. Eratou vakalolomataki tale ga na le ono qo e valeniveivesu. Ena ika6 ni Feperueri 2020, ratou laumoku ena iwau o Aleksey Budenchuk, Gennadiy German, Roman Gridasov, Feliks Makhammadiyev, kei Aleksey Miretskiy vei ira na ovisa ni valeniveivesu e Rusia. E mavoa sara ga vakaca o Mr. Makhammadiyev e lai curu kina e valenibula ni ramusu nona suinisarisari, mavoa nona yatevuso kei na ivi.

Vaqaqara Qai Curumi Vakaukaua ena Julai 2020

Ena ika12 ni Julai 2020, era curuma vakaukaua na vakailesilesi nodratou vale e tolu na iVakadinadina i Jiova e Prokopievsk, ena yasasaya o Kemerovo. Ratou kau sara eso na tacida ina dua na ofisi me ratou vakatarogi ,oti ratou sereki. Ia e vesu me rua na siga na tacida itabaqase o Andrey Vlasov. Ena ika 14 ni Julai ratou beitaki koya na vakailesilesi ni dau basulawa qai vesu tu e vale me rua na vula.

Ena ika13 ni Julai, e sivia e 100 nodra vale na iVakadinadina i Jiova e curumi vakaukaua ena levu na vanua ena yasayasa o Voronezh, kei na siti o Stariy Oskol, mai Belgorod. Era beitaki nira basulawa, ratou mani vesu vakawawa e tini na tacida me yacova na ika3 ni Seviteba. Rau mokulaki e rua na tacida vei ira na vakailesilesi ni Special Rapid Response Unit, ena gauna era curuma kina vakaukaua nona vale o Alexander Bokov. E vaculaki na ketei Mr. Bokov, mokulaki na uluna, qai vakaukauataki me roso nira vakasaurarataki koya tiko na vakailesilesi. E biligi tale ga ena fuloa o Dmitrii Katirov, e mokulaki, qai caqelaki me yacova ni tagi.

Sagai me Tarovi Nodra Vesu Vakatawadodonu

Era vakaraitaka na loya ni iVakadinadina i Jiova na ka e caka qori vei ira na tacida ina UN Human Rights Committee (Komiti ni Matabose kei Vuravura e Qarava na Dodonu ni Lewenivanua) kei na UN Working Group on Arbitrary Detention (iSoqosoqo e dau dikeva na vakatauitotogi). E sa vakau oti ina European Court of Human Rights (Mataveilewai ni Dodonu ni Lewenivanua e Urope) e 57 na ivola kerekere. Me yacova mai nikua, e se bera ni dua na ka e caka me tarovi kina nodra vakalolomataki na tacida.

Era sega ni duavata eso na isoqosoqo mai na so tale na vanua ena ka e cakava tiko matanitu o Rusia vei ira na iVakadinadina i Jiova. Kena ivakaraitaki, ena vakatulewa e tau ena ika26 ni Epereli 2019, e vakalewa sara ga na isoqosoqo na WGAD na nodra vakacacani na iVakadinadina i Jiova e Rusia, vakabibi na ka e caka vei Dmitriy Mikhailov ena siti o Shuya. E mani kaya kina na WGAD ni vesu o Mr. Mikhailov me wawa veilewai ni vakaduiduitaki ena vuku ni nona vakabauta. O Mikhaylov e dua “vei ira na vica vata na drau ni iVakadinadina i Jiova e Rusia era vesu, totogitaki qai beitaki ena basulawa nira vakayagataka tiko nodra galala ni sokalou.”

Ena ika12 ni Maji 2020, erau duavata na matabose na OSCE Permanent Council kei na European Union ni rau vola na nodrau rarawataka na nodra vakalolomataki na iVakadinadina i Jiova e Rusia. Qo na ka rau vola: “E kauai tiko vakalevu na European Union ena nodra vakacacani na iVakadinadina i Jiova e Rusia . . . Kena ikuri, keitou kauaitaka vakalevu na nodra se qai vakalolomataki wale tiko ga qo eso na iVakadinadina i Jiova vei ira na ovisa. Nira vakatotogani e valeniveivesu, se na gauna mada ga era se bera ni vesu kina.” E tomana na ivola: “Na veivakatotogani e dua na sala e beci sara ga kina na dodonu ni lewenivanua, nona rokovi, kei na nona dokai. E beci na lawa ni veimatanitu ni caka na veivakatotogani, vakabibi na vica na veidinadinati e cakava o Rusia kei na so tale na matanitu.”

Veitaravi ni gauna

  1. 14 Okotova, 2020

    Era vesu e 43 na iVakadinadina i Jiova.

  2. 2 Seviteba, 2020

    E vakataulewataka na mataveilewai e Berezovsky ena yasayasa o Kemerovo, me rau vesu me va na yabaki e valeniveivesu o Sergey Britvin kei Vadim Levchuk.

  3. 3 Okosita, 2020

    E tauca na lewa na mataveilewai e Pskov me sereki o Gennady Shpakovskiy. Ia sa sega ni vesu e valeniveivesu me ono veimama na yabaki, ena vakatatabutaki ga ena ka e beitaki kina.

  4. 13 Julai, 2020

    Vaqaqara ena sivia e 100 nodra vale na iVakadinadina i Jiova ena yasayasa o Voronezh kei Belgorod.

  5. June 9, 2020

    E beitaki Gennady Shpakovskiy e yabaki 61 na mataveilewai na Pskov City Court, qai totogitaki me vesu me ono veimama na yabaki.

  6. Feperueri 6, 2020

    Eratou beitaki e le ono na iVakadinadina i Jiova ena ika19 ni Seviteba 2019, ratou qai kau ina valeniveivesu na Penal Colony No. 1 e Orenburg. Eratou vakalolomataki vakaca ni ratou yaco yani, eratou laucaqe qai mokulaki ena iwau. E ramusu nona suinisarisari o Mr. Makhammadiyev, e mavoa tale ga nona yatevuso kei na ivi.

  7. Seviteba 19, 2019

    E tauca na turaganilewa o Dmitry Larin ena mataveilewai ni Tikina e Leninskiy mai Saratov, me ratou vesu e le ono na tacida tagane o Konstantin Bazhenov, Aleksey Budenchuk, Feliks Makhammadiyev, Roman Gridasov, Gennadiy German, kei Aleksey Miretskiy, ni ratou ‘tuvanaka na cakacaka e vakavuna na tiko yavavala.’

  8. Me 23, 2019

    E sega ni vakadonuya na Oryol Regional Court na kerekere nei Dennis Christensen, mani totogitaki koya me yabaki ono e valeniveivesu.

  9. 26 Epereli, 2019

    E raica na isoqosoqo na UN Working Group on Arbitrary Detention ni saqati nona dodonu o Dimtriy Mikhailov, e vakacala tale ga nodra vakacacani na tacida e Rusia.

  10. Feperueri 6, 2019

    E vakatulewataka na Mataveilewai ni Yasana o Zheleznodorozhniy ni cala o Dennis Christensen, mani totogitaki me ono na yabaki e valeniveivesu.

  11. Okotova 9, 2018

    Era curuma na ovisa kei na sotia eso na vale e Kirov. Ratou vesu kina e vica na tacida tagane kei Andrzej Oniszczuk e lewenivanua e Poladi. Ratou sa wawa veilewai tiko e valeniveivesu.

  12. Julai 15, 2018

    Era yanaraka na ovisa ena nodra vale e vica na tacida e Penza. Era vesuka e dua na tacida tagane. Sa wawa veilewai tiko e valeniveivesu.

  13. Julai 4, 2018

    Era vaqaqara na ovisa ena so na vale e Omsk. Rau vesu kina o Sergey kei Anastasiya Polyakov. Rau sa wawa veilewai tiko e valeniveivesu. O Mrs Polyakova e imatai ni yalewa iVakadinadina i Jiova e vesu e Rusia e beitaki ni vakavuna na tikoyavavala.

  14. June 12, 2018

    Era curuma na ovisa eso na vale e Saratov. Ratou vesu me wawa veilewai o Konstantin Bazhenov, Aleksey Budenchuk, kei Feliks Makhammadiyev. E tukuni vei Gennadiy German, Roman Gridasov, kei Aleksey Miretskiy me ratou sainitaka e dua na veidinadinati ni ratou na sega ni biuta na siti ratou tiko kina.

  15. June 3, 2018

    Era curuma na ovisa eso na vale e Tomsk kei Pskov. E vesu kina e dua na tacida tagane o Sergey Klimov, sa wawa veilewai tiko e valeniveivesu.

  16. Feperueri 19, 2018

    iMatai ni kena rogoci na kisi ni veilewai nei Dennis Christensen ena Mataveilewai ni Yasana o Zheleznodorozhniy, e vakataulewa kina o Aleksey Rudnev.

  17. Julai 20, 2017–Noveba 2018

    Sa vakavica na kena toso nona wawa veilewai e valeniveivesu o Dennis Christensen: kena imatai ena Mataveilewai ni Tikina o Sovietskiy, dua tale ena Mataveilewai ni Tikina o Zheleznodorozhniy.

  18. Me 26, 2017

    E totogitaki Dennis Christensen na Mataveilewai ni Tikina o Sovietskiy e Oryol me wawa veilewai e valeniveivesu me rua na vula.

  19. Me 25, 2017

    Era curuma vakaukaua na ovisa e Oryol na vale e caka tiko kina na soqoni ra qai vesuki Dennis Christensen.

  20. Epereli 20, 2017

    E tauca na lewa na Mataveilewai Cecere e Rusia me vakawabokotaki vakadua na nodra valenivolavola na iVakadinadina i Jiova e Rusia kei na 395 na ivavakoso.

^ para. 5 Me ikuri ni ivakamacala me baleta na nodra vakacacani ena vuku ni nodra vakabauta na iVakadinadina i Jiova e Rusia, rai ena jw.org.