Raica sara na lewena

Na Website ni iVakadinadina i Jiova

Digia na Vosa vakaViti

ME 31, 2018
RUSIA

Veilewaitaki Tale e Dua na iVakadinadina i Jiova

Veilewaitaki Tale e Dua na iVakadinadina i Jiova

Sa dua taucoko na yabaki na nona veilewaitaki tiko o Arkadya Akopyan sa yabaki 70, e dua na iVakadinadina i Jiova e dau culacula e liu, e beitaki ni vakavuna na tiko yavavala. Ena rawa ni va na yabaki e valeniveivesu se na vinakati me sauma e dua na ilavo ke beitaki ena cala qori.

Era beitaki Akopyan na dauveibeitaki ni vakavuna na “veisei vakalotu” na nona ivunau ena Vale ni Soqoni. E yavutaki na nodra ile na dauveibeitaki, ena veika ratou tukuna e le ono eratou sega ni iVakadinadina i Jiova. Ratou kaya ni nona ivunau e veivakacacani, qai soli tale ga vei ratou na ivola e vakavuna na tiko yavavala me ratou lai veisoliyaka.

E vakacala o Akopyan kei ira kece na kilai koya na veibeitaki qori. E vakaraitaka na nona loya ina mataveilewai na ivakadinadina ni ratou a sega ni tiko ena Vale ni Soqoni ena siga e vunau kina o Akopyan. Era sega tale ga ni dau solia vakaveitalia na iVakadinadina i Jiova na ivola mera lai veisoliyaka na sega ni iVakadinadina. E vakamacalataka o Sonya na wati Akopyan e sega ni iVakadinadina i Jiova, ni sa 40 na yabaki na nodrau marautaka nodrau bula vakawati. E kaya tale ga ni sega ni dau usuraka vei ira na wekana o Akopyan mera mai dua na iVakadinadina i Jiova.

E vakarota na Turaganilewa o Oleg Golovashko me caka e dua na veivaqaqai me kilai kina ke a vakavuna dina na “veisei vakalotu” na ivunau i Akopyan. Ni rogoci tale na kisi ena ika15 ni Me 2018, e kaya kina na turaganilewa ni dodonu me cava na veivaqaqai ena Seviteba ni 2018, ia ena toso tiko ga na veilewai ena gauna qo. Ena rogoci tale na kisi ena ika5 ni June, me na vakatarogi kina o Akopyan. A tekivu rogoci nona kisi ena Me 2017 ena Prokhladny District Court, qai vakatabui me biu vanua.

E kaya o Gregory Allen, na daunivakasala ni veika vakalawa vei ira na iVakadinadina i Jiova: “O Akopyan e dua ga vei ira na iVakadinadina i Jiova e vakila tiko na veivakacacani e Rusia ni tukuni nira dau vakavuna na tiko yavavala. E dau muria vinaka na lawa ni matanitu o Akopyan, qai vinakata me sokalou ena galala. Ni vakasaurarataki ira tiko na iVakadinadina i Jiova na matanitu, ena leqataki kina na nodra bula kece na iVakadinadina kei ira na vo ni lewenivanua.”

E ikarua ni iVakadinadina e Rusia o Akopyan me veilewaitaki vakatawadodonu ni dau “vakavuna na tiko yavavala.” E tekivu veilewaitaki o Dennis Christensen, e dua na iVakadinadina e Oryol ena Feperueri 2018. E sa dua taucoko na yabaki na nona veilewaitaki tiko qai rawa ni tini na yabaki e valeniveivesu ke beitaki ena cala qori. * Era le vitu tale na iVakadinadina era veilewaitaki tiko qo e Rusia taucoko, ia se sega ni dua na kena macala.

^ para. 7 Erau beitaki ruarua na tagane qori ena cala e volai ena ivola ni lawa na Criminal Code, ia ena duidui itabataba. E beitaki o Akopyan ni beca na lawa ena itabataba 282(1) ni beitaki ni vakavuna na veisei vakalotu. E beitaki o Dennis Christensen ni beca na lawa ena itabataba 282.2(1), ni beitaki ni tuvanaka tiko na nodra cakacaka na isoqosoqo lotu e tukuni nira dau vakavuna na tiko yavavala. Ena bibi gona kina na itotogi e tau.