Raica sara na lewena

Na Website ni iVakadinadina i Jiova

Digia na Vosa vakaViti

ERITREA

Vesu ena Vuku ni Nodra Vakabauta

Vesu ena Vuku ni Nodra Vakabauta

Era vesu na iVakadinadina i Jiova kei na so tale e Eritrea ra qai bala e valeniveivesu. Ia era sega ni veilewaitaki, sega tale ga ni dua na nodra cala. Era vesu na tagane, yalewa, gone kei na qase era iVakadinadina i Jiova ena vuku ni nodra cakacaka vakalotu, eso tale e sega ni tukuni na vuna. Era vesu tale ga na cauravou nira sega ni via curu ena mataivalu ena vuku ni nodra lewaeloma.

Ena gauna e tugalala kina o Eritrea ena 1993, e vakaleqai nodra galala na iVakadinadina i Jiova. Nira sega ni veidigidigi ena sasaga ni tugalala ena 1993 kei na nodra sega via curu ena mataivalu, e vakarota o Peresitedi Afewerki ena ika25 ni Okotova 1994 me boko na nodra dodonu vakalewenivanua. Me tekivu mai na gauna qori era vesu na iVakadinadina i Jiova, mokulaki, vakalolomataki tale ga vei ira na ovisa me rawa nira cakitaka nodra vakabauta.

Era Mate na iVakadinadina i Jiova e Valeniveivesu

Erau se qai mate ga qo e rua na iVakadinadina i Jiova ni rau sa toki ina valeniveivesu e Mai Serwa. E mate o Habtemichael Tesfamariam ena ika3 ni Janueri 2018 ni sa yabaki 76, e mate o Habtemichael Mekonen ena ika6 ni Maji 2018 ni sa yabaki 77. Era vesuki rau na turaga qo na vakailesilesi e Eritrea ena 2008, ia e sega ni dua nodrau cala. Me yacova mai qo, e mate e va na iVakadinadina i Jiova ena valeniveivesu e Eritrea.

Veivakalolomataki e Valeniveivesu

Ena ika24 ni Seviteba 1994, eratou bala e valeniveivesu o Paulos Eyassu, Isaac Mogos, kei Negede Teklemariam ni ratou sega ni via curu ena mataivalu ena vuku ni nodratou lewaeloma. E tini tale na tagane eratou vesu tiko me sivia ni tini na yabaki.

Era vesu eso na iVakadinadina i Jiova ena loma ni konteina ni kako, eso tale era vesu ena vale vatu se vale kava era bulu veimama tu ena qele. Ena Julai 2011 e mate o Misghina Gebretinsae, yabaki 62, ena levu ni katakata, ni totogitaki ena vanua e vakatokai me “lomaniqele” ena valeniveivesu e Meitir. E mate tale ga e keri o Yohannes Haile, yabaki 68, ena ika16 ni Okosita 2012, ni oti e va na yabaki nona vesu tu. Eratou mate e tolu na iVakadinadina i Jiova itabaqase ni ratou sere oti ena vuku ni veivakalolomataki.

Ena Julai 2017, era tokitaki kece na iVakadinadina i Jiova era vesu tu ena Keba e Meitir ina Valeniveivesu e Mai Serwa ena taudaku kei Asmara. Ena ika30 ni Noveba 2017, era tokitaki kece tale ga na 13 na iVakadinadina i Jiova ena Keba e Sawa ina Valeniveivesu e Mai Serwa, wili kina o Paulos Eyasu, Isaac Mogos, kei Negede Teklemariam.

Veitaravi ni Gauna

  1. 15 Maji, 2019

    Era vesu e 53 na iVakadinadina i Jiova.

  2. 6 Maji, 2018

    Mate o Habtemichael Mekonen, yabaki 77, ni sa tokitaki ina Valeniveivesu e Mai Serwa.

  3. 3 Janueri, 2018

    Mate o Habtemichael Tesfamariam, yabaki 76, ni sa tokitaki ina Valeniveivesu e Mai Serwa.

  4. Julai 2017

    Era tokitaki kece na iVakadinadina i Jiova ena Keba e Meitir ina Valeniveivesu e Mai Serwa, ena taudaku kei Asmara.

  5. 25 Julai, 2014

    Era sere e levu era vesu ena ika14 ni Epereli, ia se vesu tiko ga e 20 era vesu mai ena ika27 ni Epereli.

  6. 27 Epereli, 2014

    Era vesu e 31 na iVakadinadina i Jiova nira vuli iVolatabu tiko.

  7. 14 Epereli, 2014

    Era vesu e 90 vakacaca na iVakadinadina i Jiova nira tiko ena iVakananumi ni mate i Karisito.

  8. 16 Okosita, 2012

    Mate e valeniveivesu o Yohannes Haile, yabaki 68, ena vuku ni veivakalolomataki

  9. Julai 2011

    Mate e valeniveivesu o Misghina Gebretinsae, yabaki 62, ena vuku ni veivakalolomataki

  10. 28 June, 2009

    Era curuma na vakailesilesi e dua na vale ni iVakadinadina i Jiova nira lotu tiko, ra qai vesuka e le 23 era yabaki 2 ina 80.

  11. 28 Epereli, 2009

    Era tokitaki kece vakavo ga e dua na iVakadinadina i Jiova mai na siteseni ni ovisa era vesu tu kina ina keba ni valeniveivesu e Meitir.

  12. 8 Julai, 2008

    Era curuma na vakailesilesi na nodra vale na iVakadinadina i Jiova kei na vanua ni cakacaka ra qai vesuka e le 24, levu qori era vakarautaka na ka mera bula kina na nodra vuvale.

  13. Me 2002

    Vakatabuya na matanitu na matalotu kece era sega ni okati ena va na vakabauta e vakadonuya na matanitu.

  14. 25 Okotova, 1994

    E vakarota na peresitedi me bokoci na nodra dodonu vakalewenivanua na iVakadinadina i Jiova e Eritrea.

  15. 24 Seviteba, 1994

    Ratou vesu o Paulos Eyassu, Isaac Mogos, kei Negede Teklemariam, ia e sega ni dua nodratou cala, eratou se vesu tiko ga.

  16. Veiyabaki ni 1940

    Tauyavu na imatai ni ilawalawa iVakadinadina i Jiova e Eritrea.