Raica sara na lewena

Na Website ni iVakadinadina i Jiova

Digia na Vosa vakaViti

24 SEVITEBA, 2014
ERITREA

Nodra Vesu na iVakadinadina i Jiova e Eritrea​—Ena Oti Ninaica?

Nodra Vesu na iVakadinadina i Jiova e Eritrea​—Ena Oti Ninaica?

Eratou vesu ena ruasagavulu na yabaki sa oti e tolu na cauravou ni Eritrea ratou qai bala ena valeniveivesu e Sawa. E vakaloloma na ituvaki ni vanua qori. Eratou se vesu tiko ga me yacova mai nikua. E sega ni dua na cala eratou cakava, sega tale ga ni soli vei ratou na galala me ratou valataka nodratou kisi ena mataveilewai. Na cava eratou vesu kina vakatawadodonu?

Eratou iVakadinadina i Jiova o Paulos Eyassu, Negede Teklemariam, kei Isaac Mogos. Eratou sega ni via curu ena mataivalu ena vuku ni nodratou vakabauta. Ke a vakadinadinataki vakalawa ni “cala” dina na nodratou sega ni via vakaitavi ena ivalu, ena lewa na mataveilewai na itotogi ena tau vei ratou. Sa yabaki 41 ena gauna qo o Paulos, 40 o Negede, 38 o Isaac. Nodratou bala i valeniveivesu ni se itabagone, e sega kina ni ratou vakawati se vakaluveni, se vukea nodratou dui itubutubu, se me ratou bula galala. Eratou sega tale ga ni rawa ni sokalou kei ira era vakabauta vata.

Eratou a vesu ena ika24 ni Seviteba 1994, o Paulos, Negede, kei Isaac, eratou vakalolomataki qai laumoku vei ira na vakailesilesi ni valeniveivesu e Sawa. Ia qo sa oti nodratou vakalolomataki, era sa dokai ratou na ovisa ni valeniveivesu ni ratou yalodina tiko ga ena ka eratou vakabauta.

Era Vesu Eso Tale na iVakadinadina

Sega tale ni dua na vanua e vuravura me vakataki Eritrea, ena ivakarau vakaloloma e dau cakava vei ira na iVakadinadina i Jiova. Ena gauna e vakarautaki kina na ulutaga qo, era curu tu e valeniveivesu e 73 na iVakadinadina, wili kina o ira na yalewa, gone, kei na itabaqase. Levu era vakalolomataki, era kana vakaca, sega ni veirauti na medra wai ra qai dau veivakararawataki na ovisa ni valeniveivesu. E tolu tale na tagane iVakadinadina i Jiova sa tini vakacaca na yabaki nodratou tu ena valeniveivesu e Sawa. Ia vei ira kece na iVakadinadina era vesu e Eritrea, e balavu duadua nodratou vesu o Paulos, Negede, kei Isaac.

Tukuni vei Eritrea me tinia nona veivakalolomataki

Sa kilai tu e veiyasa i vuravura na veivakalolomataki e cakava tiko na matanitu o Eritrea vei ira na iVakadinadina i Jiova kei na so tale na lotu e kea.

  • Tekivu ena 2004, sa vakatokai Eritrea na U.S. Department of State, ni matanitu “e sega ni dauveinanumi” e wili tale ga “me matanitu e dau vakalolomataki ira na lewenivanua nira saqata nodra galala ni sokalou.”

  • Vakaraitaka tale ga na United Nations Human Rights Council na nona kauai ena nodra sega ni doka na dodonu ni lewenivanua, ra veivakalolomataki tale ga na vakailesilesi e Eritrea. Qo sa kena gauna vua na matanitu o Eritrea me doka nodra dodonu na lewenivanua, na dodonu ni ka era tukuna, dodonu ni lewaeloma se na ka era vakabauta.

  • E tukuna ena nodra itukutuku vakayabaki ena 2014 na U.S. Commission on International Religious Freedom ni “dodonu ni sokalou qo era vinakata vakalevu na. . . iVakadinadina i Jiova.”

  • Ena iTukutuku Vakayabaki ni 2013, e vakaraitaka kina vakadodonu na Human Rights Watch ni se vesuki ira tiko ga na lewenilotu era sega ni kilai na matanitu o Eriatrea, qai vakalolomataki ira. Era wili sara ga eke na iVakadinadina.

  • Ena Tiseba 2005, e ciqoma na African Commission on Human and Peoples’ Rights na Resolution on the Human Rights Situation in Eritrea (iNakinaki me baleta na Nodra Dodonu na Lewenivanua e Etritrea.) E tiki ni nakinaki qori me “vakadeitaka e veigauna o Eritrea na dodonu ni sega na veivakaduiduitaki, dodonu ni ka e tukuni, kei na dodonu ni sokalou.”

E tukuna o Philip Brumley, na loya ni iVakadinadina i Jiova: “Keimami nuitaka ni matanitu o Eritrea ena sereki ira na iVakadinadina i Jiova era vesu tu, wili kina o ratou na tolu na tagane ratou se vesu tu me 20 na yabaki. Sa na oti kina vakadua na nodra dau vakalolomataki na neimami lewenilotu.”