Raica sara na lewena

Na Website ni iVakadinadina i Jiova

Digia na Vosa vakaViti

Era kaukaua tiko ga vakayalo na mataveitacini e Venezuela, nira tiko ena soqo vakayalo kei na cakacaka vakaitalatala.

5 NOVEBA, 2018
VENEZUELA

iRogo Vou Mai Venezuela: Yalodina Tiko Ga ni Veisau na iTuvaki

iRogo Vou Mai Venezuela: Yalodina Tiko Ga ni Veisau na iTuvaki

Sa qai ca tiko ga na ituvaki vakailavo e tarai ira tiko na tacida e Venezuela. E veimacawa e ciqoma na valenivolavola ni tabana e Venezuela na kedra itukutuku na tacida era vakacacani ena basulawa. E basu tale ga e vica na Vale ni Soqoni. Dua na ka na kena rewailagi na isau ni iyaya, leqa ni kakana, wainimate, kei na veika era gadreva na tacida mera bula kina. Me tekivu ena 2013, sa sivia e 20,000 na dautukutuku era dro ina so tale na vanua me vakataki Argentina, Brazil, Chile, Colombia, Ecuador, Itali, Peru, Potukali, Sipeni, kei Merika. * Ia na ituvaki dredre kece qori, era vakaogai ira tiko ga ena veika vakayalo na le 140,000 na tacida e Venezuela.

E qarava tiko na valenivolavola ni tabana e Venezuela na cakacaka taucoko ni vakacoko. Sa tauyavutaki rawa ena gauna qo e rauta ni 60 na komiti ni vakacoko, e veivuke ena kena wasei na kakana vei ira na tacida. Me yacova mai nikua, sa wasea na valenivolavola ni tabana e Venezuela ena veivuke ni tabana e Brazil e drau vakacaca na kakana e cautaki vei ira na le 64,000 na dautukutuku ina 1,497 na ivavakoso.

E vakarautaka tale ga na valenivolavola ni tabana Venezuela, na veika mera vukei kina vakayalo na mataveitacini. Ena vulaikatakata, e 122 taucoko na levu ni Soqo ni Veiwasewase “Mo Yaloqaqa!” e vakayacori e keri, kena iotioti a caka ena ika2 ni Seviteba, 2018. Na soqo qori e vakayaloqaqataki ira dina vakayalo na mataveitacini, e levu era leqa tu vakailavo, ia era tiko rawa kina ena nodra sasaga.

Era gumatua na tacida e Venezuela mera veivakacegui ena itukutuku vakaivolatabu vei ira na rarawa tu. Na gauna qo era vakavulica tiko e rauta ni 200,000 na vuli iVolatabu e veivula. E tubu tale ga na kedra iwiliwili na ka vou era sa dau tiko ena soqoni, qai le 7,259 era papitaiso.

Na tubu vakayalo qori e vakadinadinataka ni vakaukauataki ira tiko na mataveitacini mai Venezuela na yalo tabu ni Kalou. Me noda masu mada ga mera nuitaki Jiova tiko ga me yacova ni vakaotia nona Matanitu, na ituvaki rarawataki kece eda bula donuya tu qo.—Vosa Vakaibalebale 3:5, 6.

Me ikuri ni vakamacala me baleta na ituvaki kei Venezuela, sarava na vidio Venezuela—Love and Faith During Difficult Times.

^ para. 2 Ni yaco na ituvaki dredre, se mani bula vakailavo, veimaliwai kei na veika vakapolitiki, ena vakatulewataka sara ga na dautukutuku yadua me biuvanua se sega. Na isoqosoqo ena sega ni uqeta se vakabekabea e dua me biuvanua se tiko.—Kalatia 6:5.