Raica sara na lewena

Na Website ni iVakadinadina i Jiova

Digia na Vosa vakaViti

Mataveilewai ni Yasana e Bratislava I e bokoca tale ga na ka era beitaki kina na iVakadinadina i Jiova ena veigauna sa oti, nira tawaveitovaki mera kua ni vakaitavi ena ivalu.

27 SEVITEBA, 2018
IROGO MAI VEIYASA I VURAVURA

Bokoca na Mataveilewai ena Czech Republic kei Slovakia na Cala Era Beitaki Kina o Ira na Tacida

Bokoci na ka Kece Era Beitaki Kina na Tacida ena Tini Vakacaca na Yabaki sa Oti Nira Tawaveitovaki

Bokoca na Mataveilewai ena Czech Republic kei Slovakia na Cala Era Beitaki Kina o Ira na Tacida

Era beitaki e liu na tacida nira tawaveitovaki ra qai sega ni dau vakaitavi ena ivalu, ra tomana tiko ga nodra cakacaka vakavunau. Ia e veisau qori ena veiyabaki sa oti ni bokoca na mataveilewai ena Czech Republic kei Slovakia na cala era beitaki kina na tacida. Dua na veibeitaki qori se tau sara ena 1925. (Raica na italanoa i Martin Boor e dua na tacida tagane, sa oti e 90 na yabaki sa qai bokoci tu na kena itotogi). Na vakatulewa ni mataveilewai qori e tokona na nodra dodonu na mataveitacini ena veika e vauca na galala ni sokalou.

Tekivu ena Me 2017 e bokoca na Mataveilewai Cecere ena Czech Republic na lewa a tau mera curu e valeniveivesu e le 45 na tacida, nira sega ni vakaitavi ena mataivalu donuya na veiliutaki vaKominisi. Ena Okotova 2017 a vakatulewa tale ga na Mataveilewai Cecere, me bokoci na cala a beitaki kina o Martin Magenheim ena 1978 ni cakacaka tiko vakavunau.

E bokoca na Mataveilewai ni Yasana mai Bratislava I e Slovakia na “cala” ratou beitaki kina e le va na tacida ni ratou tawaveitovaki. Qori tale ga na ka e vakatulewataka na Mataveilewai ni iWasewase e Trenčín vua e dua na tacida tagane. A vakatulewataka tale ga na Mataveilewai ni Yasana e Rimavská mai Sobota me bokoci na ka e beitaki kina e dua na tacida yalewa o Eva Borošová, a vesu ena 1974 ni a cakacaka vakavunau tiko. Ena ika9 ni Janueri 2018, e bokoca na Mataveilewai ni Yasana e Michalovce e dua na lewa e tau ena 1993 me baleti Miloš Išky Janík e dua na tacida tagane. E totogitaki vakavica me curu e valeniveivesu ni sega ni via cakava na cakacaka e veisaqasaqa kei na nona lewaeloma.

E vakamacalataka o André Carbonneau na loya e matataki ira na iVakadinadina i Jiova: “Ni bokoci na cala era beitaki kina na iVakadinadina i Jiova nira tawaveitovaki ena ka vakaivalu, se nira vakaitavi tiko ena cakacaka vakaitalatala ena tini vakacaca na yabaki sa oti. Era doka kina na mataveilewai e dua na lawa vakasakiti e vauca na nodra dodonu yadua na lewenivanua. Oya me dokai na vakatulewa ni nodra lewaeloma, kei na galala ni nodra sokalou. Ni sega ni dau rogoci tu na nodra dodonu yadua na lewenivanua ena veigauna sa sivi e vuravura raraba. Na vakatulewa gona ni mataveilewai qo e vakadodonutaka na veibeitaki tawadodonu e dau vakayacori tiko, qai ka ni vuli vinaka vei ira na vo ni matanitu era se veibeitaki tiko ga. E saga tale ga na mataveilewai me bokoca na kedra irogorogo ca na tacida e sega sara ga ni dua na cala era cakava. Eda marautaka dina qori ni tukuni ena iVolatabu ni vinaka sara na yaca e rogo vinaka.”—Dauvunau 7:1.