Raica sara na lewena

Na Website ni iVakadinadina i Jiova

Digia na Vosa vakaViti

Vale ni Soqoni e Tortola ni bera na vakacoko kei na gauna e oti kina. Qo e dua vei ira na lima na Vale ni Soqoni e British kei na U.S. Virgin Islands e vakacacani ena cagilaba o Maria, e kena imatai tale ga me vakavinakataki.

19 JANUERI, 2018
IROGO MAI VEIYASA I VURAVURA

Totolo Nodra Veivuke ena Vakacoko na iVakadinadina i Jiova

Totolo Nodra Veivuke ena Vakacoko na iVakadinadina i Jiova

NIU YOKA—E vakacagau sara tiko na cakacaka ni vakacoko me vukei ira era vakaleqai ena cagilaba o Irma kei Maria. Ena Seviteba 2017 e vakacacani e levu na vanua ena Caribbean. E vakarautaka kina na valenivolavola ni tabana e Barbados, Cuba, Dominican Republic, Varanise, kei Merika na itukutuku qo me vakaraitaka na veivuke e caka mera vukei kina na tacida era vakaleqai.

Veivanua e vakarurugi ena Valenivolavola ni Tabana e Barbados—Anguilla, Antigua and Barbuda, Dominica, kei St. Maarten (yasana vakaNecaladi)

A tauyavutaki e tolu na komiti ni vakacoko (Disaster Relief Committee), e okati kina e dua mai na valenivolavola ni tabana mai Varanise me tuvanaka na nodra vukei na dautukutuku kece era vakaleqai ena cagilaba. E rauta ni $2.4 milioni ena vakayagataka na valenivolavola ni tabana e Barbados ena cakacaka ni vakacoko. Ena okati kina na vakavinakataki e 8 na Vale ni Soqoni, 122 na nodra vale na mataveitacini, kei na 19 na vale era tara vou tale.

E vakacacani vakalevu na Vale ni Soqoni e Grand Bay, Dominica ena cagilaba o Maria.

Veivanua e vakarurugi ena Valenivolavola ni Tabana e Cuba

E kaya na valenivolavola ni tabana nira sa qaravi sara tiko ena gauna qo na dautukutuku era vakaleqai ena cagilaba o Irma. E okati kina na nodra lai veivakatawani eso na mata mai na valenivolavola ni tabana.

Veivanua e vakarurugi ena Valenivolavola ni Tabana e Dominica

Era cakacaka vata na DRC ena nodra qaravi na le 57 na tacida era vakaleqai ena cagilaba. Era cautaka na mataveitacini na kakana, wai, isulu kei na so tale na ka era gadreva na tacida. Ni cava na vula o Okotova, era sa samaka qai vakavinakataka na tacida era bolecakacaka na nodra vale kece na mataveitacini era vakacacani.

Veivanua e vakarurugi ena Valenivolavola ni Tabana e Varanise—Guadeloupe kei St. Martin

E tauyavutaki ena yanuyanu o St. Martin e dua na DRC qai digitaki e dua na idrodro ena yanuyanu o Guadeloupe. Na ka e cakava qori na valenivolavola ni tabana me dusimaka na cakacaka ni vakacoko, qai vakayagataki e voleka ni $1.4 milioni. Qori e okati kina na kena vakavinakataki e 12 na Vale ni Soqoni e Guadeloupe, kei na 2 na Vale ni Soqoni kei na 24 na nodra vale na tacida e St. Martin. Era le 22 taucoko na tacida era bolecakacaka ena vakacoko, era gole mai Varanise, Guadeloupe, kei Martinique.

Vakacacani na nona itikotiko e dua na dautukutuku e St. Martin ni oti na cagilaba o Maria.

Veivanua e vakarurugi ena Valenivolavola ni Tabana e Merika—British kei na U.S. Virgin Islands, Florida, Georgia, Puerto Rico, Turks and Caicos Islands

Era le 13,000 na dautukutuku era vakaleqai ena cagilaba ena vanua e vakarurugi ena valenivolavola ni tabana e Merika. E tauyavutaki kina e va na DRC ena gauna qo mera vukei kina na tacida. Sa oti tale ga na imatai ni iwasewase ni cakacaka ni vakacoko, e okati kina na kena vakavinakataki e sivia e 95 na pasede na nodra vale na tacida e vakacacani, kei na kena vakarautaki na ka era gadreva me vaka na kakana kei na wai. Ia e se caka tiko ena gauna qo na cakacaka ni vakacoko e Puerto Rico kei na British and U.S. Virgin Islands.

Samaka tiko e dua na lewe ni vakacoko na vale ni dua na tacida, e sivia e 3,200 na dautukutuku e Puerto Rico e vakacacani na nodra vale ena cagilaba.

Era bolecakacaka ena vakacoko e le 690 na tacida. Na iwiliwili qori era le 450 era gole mai na veiyanuyanu voleka, ra qai le 240 mai Florida kei Georgia. Era na veivuke ena vakavinakataki ni Vale ni Soqoni kei na nodra vale na tacida. E tukuni ni rairai vakayagataki e sivia e $30 milioni ena cakacaka ni vakacoko, e vakaraitaki toka e ra na cakacaka kece e vauci kina:

  • British and U.S. Virgin Islands – 5 na Vale ni Soqoni, 190 na vale

  • Florida – 40 Vale ni Soqoni, 1,174 na vale

  • Puerto Rico – 106 Vale ni Soqoni, 2 Vale ni Soqo Lelevu, 1,216 na vale

  • Turks and Caicos – 2 Vale ni Soqoni, 56 na vale

Eda nanumi ira ena masu na tacida era veivuke ena cakacaka ni vakacoko ni na vakaukauataki ira o Jiova. Eda nuidei ni cakacaka ni vakacoko, kei na veivakayaloqaqataki ena iVolatabu ena vukei ira na tacida mera tomana tiko ga ena duavata na nodra veiqaravi vei Jiova na Kalou Cecere.—Niemaia 2:18.

Gusunivosa:

Veiyasa i vuravura: David A. Semonian, Tabana ni iTukutuku, +1-845-524-3000

Barbados: John Medford, +1-246-438-0655

Dominican Republic: Josué Féliz, +1-809-595-4007

France: Guy Canonici, +33-2-32-25-55-55