Raica sara na lewena

19 JULAI, 2019
SIPENI

Soqo Vakairogorogo: Sevutaki na New World Translation ena Vosa vakaSipeni

Soqo Vakairogorogo: Sevutaki na New World Translation ena Vosa vakaSipeni

Ena ika19 ni Julai, 2019, a vakayacori e Madrid e Sipeni, nodra Soqo ni Veimatanitu na iVakadinadina i Jiova, e kena ulutaga, “E Sega Vakadua ni Seavu na Loloma”! Ena imatai ni siga ni soqo, e sevutaki na New World Translation of the Holy Scriptures ena vosa vakaSipeni. Sa rawa nira download se wilika e sivia na le 2.5 na milioni na tacida era vosa vakaSipeni e veiyasa i vuravura na iVolatabu qori ena jw.org®. Qori na iwasewase levu duadua vei ira na iVakadinadina i Jiova e veiyasa i vuravura. *

E sevutaka na iVolatabu o Brother Gerrit Lösch, e lewe ni iLawalawa Dauvakatulewa, e saravi tale ga ena vidio e katoni ena Wanda Metropolitano Stadium na vanua e caka kina na soqo. E vakaraitaki tale ga ena 11 tale na vanua e Sipeni e vakayacori tiko kina na soqo. Oti ga na kena sevutaki, sa biu sara na kena vidio ena JW Broadcasting®.

Marautaka o ira na tiko ena soqo na sevutaki ni iVolatabu vakavoutaki vakaSipeni

Era vukei tale ga na tiko ena soqo na kena download na iVolatabu ena porokaramu na EPUB, JWPUB, kei na PDF, ena webpage na jw.org. Era cakava tale ga qori na tacida era vakarorogo ena 11 na vanua ni soqo. E download nodra ilavelave ni iVolatabu ena internet ni vakayagataki na JW Box, na Wi-Fi e vakarautaka na iVakadinadina i Jiova. E sivia na le 1,200 era veivuke me download na iVolatabu.

Vakayagataka tiko na tacida nodra iyaya vakalivaliva me download kina na New World Translation ena vosa vakaSipeni

E sega ni rawarawa na vakadewataki ni iVolatabu ena vosa vakaSipeni, ni vica vata tu na mataqali vosa vakaSipeni era vakayagataka na tacida e veiyasa i vuravura. E vakamacalataka o Brother Pedro Gil, e lewe ni Komiti ni Tabana e Sipeni: “Era le 577 na milioni na lewe i vuravura era vosataka na vosa vakaSipeni, e duidui tale ga na vosa ena dui vanua, icavucavuti, tautau se kedra ibalebale. Kuria ya, e veisau vakalevu na vosa vakaSipeni ni vakatauvatani ena vica vata na yabaki e liu.”

Vukei tiko e dua na tacida yalewa me download na iVolatabu e sevutaki

Era veivuke kina e rauta na le 100 na tacida e veiyasa i vuravura vei ira na timi ni vakadewa me donu na ka e vakadewataki, me kilai rawarawa tale ga. E rauta ni va veimama na yabaki na kena vakadewataki tiko.

E kaya o Brother Gil: “E kilai rawarawa na vosa e vakayagataki ena New World Translation vakaSipeni. Ena rawarawa kina nodra vakayagataka na dautukutuku ena cakacaka vakavunau kei na soqoni. E marautaki tale ga ni na vukei ira na tacida era vosa vakaSipeni mera volekati Jiova.”

Eda vakavinavinakataki Jiova ena ilavelave vou ni vakadewa qori, e vakarokorokotaki kina na yacana. E nuitaki ni na vukei ira na tacida mera tomana tiko ga nodra vunau ena “veivanua yawa sara kei vuravura.”—Cakacaka 1:8.

^ para. 2 Dua na iwiliwili levu ni iVolatabu e veisoliyaki ena siga e sevutaki kina, mani vakatulewataki me kua ni soli na kena e tabaki ena vakau ga ena ivavakoso kece e vosa vakaSipeni. Ena biu tale ga ena JW Library® ni sivi na Moniti na ika22 ni Julai.