Raica sara na lewena

12 TISEBA, 2019
SAUCA KOREA

Vakaraitaki ena Vale ni Yau Maroroi na Kedra iTalanoa na Tacida e Korea

Vakaraitaki ena Vale ni Yau Maroroi na Kedra iTalanoa na Tacida e Korea

E le vica ga era kila nodra vakararawataki na tacida e Korea ena dua na gauna sa oti. E vakamacalataki qori ena vale ni yau maroroi e tiko e Busan na ikarua ni siti e Korea. E vakatokai na vanua ni sarasara qori na “Changing History, Unchanging Conscience.” E tekivu na sarasara ena ika12 ni Noveba 2019, qai vakacavari ena ika13 ni Tiseba, 2019. E vakamacalataki kina na dei ni nodra vakabauta na tacida ena sivia e 80 na yabaki sa oti ni se liutaki Korea tu o Japani, kei na nodra vakararawataki vei ira na vakailesilesi.

Ena Seviteba 2019, qori na imatai ni gauna me saravi kina na vale ni yau maroroi ena Seodaemun Prison History Hall, * e Seoul. Era gole yani kina e rauta na le 51,175 na vulagi, wili kina e le 5,700 na mataveitacini era gole ena soqo ni veimatanitu e Seoul.

Ena June 1939 ina Okosita 1945, era vesu qai bala e valeniveivesu na tacida kei ira na taleitaka na itukutuku ena iVolatabu. Era vesu nira sega ni via qarava na empara, e nanuma tale ga na matanitu na ivola era veisoliyaka tiko e uqeti ira na lewenivanua mera beca na lawa ni matanitu mera kua tale ga ni vakaitavi ena ivalu. Era le onosagavulukaono na tacida e Korea ena gauna ya, voleka ni o ira kece era vesu. Era vakatarogi vakaukaua qai vakatotogani. Ratou mate e le ono na tacida ena vuku ni veivakalolomataki e valeniveivesu.

E kaya o Brother Hong Dae-il, e veiqaravi tiko ena Tabana ni iTukutuku e Korea: “Gauna e veiliutaki kina o Japani ena 80 na yabaki sa oti, e levu e Korea era sega ni kila nira vakararawataki vakatawadodonu na sega ni via curu ena ivalu ena vuku ni nodra vakabauta. Ia qo na gauna vinaka me vakaraitaki kina na kedra italanoa.”

A tiko tale ga ena soqo qori o parofesa Han Hong-gu. E kaya me baleti ira na tacida era tutaka nodra vakabauta: “Era ivakaraitaki vinaka nira muria na veidusimaki ni nodra lewaeloma, ra qai dei ena nodra vakabauta. . . . E dodonu meda dokai ira vakalevu na iVakadinadina i Jiova nira muria na veidusimaki ni nodra lewaeloma.”

Era kauai vakalevu na daunitukutuku makawa kei ira na tabana ni itukutuku ena ka e vakaraitaki ena vanua ni sarasara. E gauna vinaka tale ga mera kila kina e levu na kedra itukutuku na tacida era sega ni via curu ena ivalu ena vuku ni nodra vakabauta. E qai kilai na veika qori ena veiyabaki sa oti. Ena ika28 ni June, 2018 e kaya e dua na mataveilewai ni sega ni yavutaki ena yavu ni vakavulewa na kena sega ni vakarautaki na veiqaravi raraba e Sauca Korea. Ena imatai ni Noveba, oti e va na vula e vakatulewataka na Mataveilewai Cecere ni sega sara ga ni cala ke dua e sega ni via curu ena ivalu ena vuku ni nona vakabauta. Qori e vakavuna mera sere na tacida tagane era vesu ena vuku ni nodra vakabauta e Sauca Korea. E vakadonui tale ga vakalawa me vakarautaki na veiqaravi raraba me isosomi ni nodra sega ni via curu ena ivalu.

Na dei ni nodra vakabauta kei na nodra yaloqaqa na tacida e Korea, eda nanuma kina na vosa ni veivakadeitaki qo: “E tu e yasaqu o Jiova, au na sega ni rere. Cava ena cakava rawa vei au na tamata?”—Same 118:6.

^ para. 3 A valeniveivesu tu na vanua qo ra qai dau vakararawataki kina o ira na tacida kei ira na sega ni via vakaitavi ena ivalu ena veiyabaki ni 1960 ina 1980, ni veiliutaki tu na matanitu o Japani. Ia qo sa History Hall e vakaraitaki kina na iyau maroroi.

 

Na Seodaemun Prison History Hall e Seoul, e Korea. A vakayacori taumada e ke na sarasara ena Seviteba, 2019

Duri toka qori eso na gonevuli ena vanua ni sarasara e Deungdaesa Incident e History Hall. Era le 51,175 na vulagi era sarasara kina.

Qo na vale ni yadra e vakayagataki e valeniveivesu

iRairai ni rumu era vesu kina na tacida, laurai toka qori e lima na ibulibuli ni tamata

Vanua ni sarasara na Busan National Memorial Museum of Forced Mobilization

Na kedra itaba na tacida e rauta nira le 66 era vakararawataki nira tawaveitovaki