Raica sara na lewena

Na Website ni iVakadinadina i Jiova

Digia na Vosa vakaViti

Tolu vei ratou na le lima na tacida tagane e Korea e vakatulewataki ni ratou sega ni cala ena Mataveilewai ni Yasana e Jeonju.

23 JANUERI, 2019
SAUCA KOREA

“Sega ni Cala”

iMatai ni Gauna me Vakatulewataki ena Mataveilewai e Korea Nira Sega ni Cala na Tawaveitovaki ena iValu

“Sega ni Cala”

E se qai matai ni gauna ena ivolatukutuku kei Sauca Korea me ratou kerea na dauveibeitaki ni matanitu ina mataveilewai, me talaci na ka ratou beitaki kina e lima na tacida tagane ratou sega ni vakaitavi ena ivalu. E mani vakadonui na kerekere qori, bokoci tale ga na ka ratou beitaki kina. Na lewa e tau qori e veisautaki kina na vakatulewa ni mataveilewai e ra, ni beitaki ratou na tacida ni ratou sega ni vakaitavi ena ivalu.

E tau na lewa qori ena ika14 ni Tiseba, 2018, sa rawa tale ga ni talaci kina nodra kisi e sivia na le 900 na tacida tagane se bera tiko ni rogoci nodra kisi e Korea. O ira na tacida e talaci nodra kisi, era na waraka tale ga na ituvatuva sa vakarautaki. Oya me dua tale na taba ni cakacaka mera cakava, mera kua ga ni curu ena mataivalu.

E yavutaki na lewa qori ena rua na vakatulewa vakairogorogo ni Mataveilewai ni Vakadeitaki Lawa, kei na Mataveilewai Cecere e Korea ena 2018. E bokoci kina vakadua na lawa sa 65 na yabaki na kena vakayagataki tiko. Oya na nodra bala e valeniveivesu na sega ni vakaitavi ena ivalu, se mani donu tu vakacava nodra vakabauta vakalotu.

Na vakatulewa qori e laurai kina ni kauaitaka na mataveilewai cecere nodra dodonu na sega ni vakaitavi ena ivalu, era vakayagataka tiko ga nodra galala ni vakatulewa. Era vakacaucautaki ira gona vakalevu na isoqosoqo e valataka nodra dodonu na lewenivanua (National Human Rights Commission of Korea). E kaya: “Na vakatulewa era duavata kece kina na turaganilewa, e bokoci kina vakadua na itotogi e era vakararawataki tu kina vakadede o ira na sega ni vakaitavi ena ivalu. E tekivu ena veiyabaki ni 1950, era totogitaki kina e rauta na le 20,000 . . . Keimami doka vakalevu nomuni vosota na veika dredre, vaka kina o ira na lewe ni nomuni vuvale.”

Ena gauna qo o ira na sega ni vakaitavi ena ivalu, mera vakadinadinataka ni tiko na “yavu vinaka” ni nodra vakabauta, e “dina” tale ga. Era vakasalataki na turaganilewa mera dikeva vinaka na ivakadinadina qori. Me vaka e tukuna na Mataveilewai Cecere: “Me laurai ena nona bula taucoko . . . ni yavutaki ena vakabauta e dei.” Nira saumitaro na tacida vei ira na turaganilewa, mera vakamacalataka sara vakavinaka nodra dui vakatulewa nira sega ni vakaitavi ena ivalu se mataivalu.—1 Pita 3:15.

E sivia e 60 na yabaki nodra vosota voli na iVakadinadina i Jiova e Korea nodra bala e valeniveivesu nira sega ni vakaitavi ena ivalu ena vuku ni nodra vakabauta. Qori e vakadinadinataka nodra saga na veisaututaki e yavutaki ena nodra muria mai vu ni lomadra na ikarua ni vunau levu duadua, oya mera ‘lomana na kainodra me vaka nodra lomani ira.’—Maciu 22:39.