Raica sara na lewena

Na Website ni iVakadinadina i Jiova

Digia na Vosa vakaViti

Timi ni vosa vagalu vakaRwanda, ratou katona tiko e dua na vidio ena vanua ni vakadewa.

10 JANUERI, 2019
RWANDA

Tekivu Vakadewataki na Vosa Vagalu e Rwanda

Tekivu Vakadewataki na Vosa Vagalu e Rwanda

Ena icavacava ni Seviteba, 2018, era marautaka na iVakadinadina i Jiova e Rwnada e dua na cavuikalawa levu, nira gumatua ni vunautaka na itukutuku vinaka ena yalava e qarava na valenivolavola ni tabana e kea. E tauyavutaki na vakadewataki ni vosa vagalu vakaRwanda (RWS). Nodra sasaga qori ena yaga vei ira na le 113 na tacida galu e Rwanda, e vakarautaki ira tale ga mera vunau vei ira e sivia na le 30,000 na didivara se galu.

Na timi ni vakadewa qo e vakadewataka na brochure, Vakarorogo Vua na Kalou mo Bula Tawamudu, na vidio lekaleka Vuna mo Vulica Kina na iVolatabu?, kei na levu na tikidua era rawa ni laurai ena Teaching Toolbox. E rawa ni laurai qori ena noda website ena vica na macawa mai qo.

Ratou cakacaka na timi ni vakadewa qo ena dua na vale e lima ga na miniti ni taubaletaki ena valenivolavola ni tabana e Rwanda, e Kigali. Ratou lewena na timi e rua na tacida tagane, dua e galu, kei na rua na tacida yalewa. Ratou kila vinaka na vosa vagalu, ratou vulica tale ga me va na macawa na idusidusi ni vakadewa me veivuke ena nodratou cakacaka.

E toka volekata ga na valenivolavola ni tabana e Rwanda, na vanua ni vakadewa e vakadewataki kina na vosa vagalu vakaRwanda.

Dua vei ratou o Rwakibibi Jean Pierre, e vakamacalataka eso na ka dredre me baleta na kena sagai me vakadewataki na vosa e sega na kena matanivola: “Era vakayagataka ga na galu na ligadra se irairai ni matadra mera veivosaki kina. E vakadewataki gona na vosa vagalu ni katoni na vidio, kei na dua na iwalewale ni droini na idea mapping. Ena vakayagataki na papa me droinitaki kina na vakasama e vakavotui ena vosa vakavalagi. Qori ena vukei keitou me kua ni dua na vakasama e lutu ni vakadewataki tiko na vosa vagalu. Era na sureti eso na tacida era galu era sega ni vakadewa, mera raica ke sa matata qai donu na ka e vakadewataki. Keitou marautaka tale ga na vakatutu era tukuna ni na vukei keitou vakalevu ena cakacaka ni vakadewa.”

Mr. Augustin Munyangeyo e dua na vakailesilesi ni Rwanda National Union of the Deaf.

E vakamacala me baleta nodra cakacaka ni vakadewa na tacida, o Mr. Augustin Munyangeyo e dua na vakailesilesi ena Rwanda National Union of the Deaf: “Keimami vakavinavinakataki kemuni na iVakadinadina i Jiova ena nomuni veituberi vakayalo ena iVolatabu, kei na vidio e vakarautaki ena vosa vagalu vakaRwanda.”

Me yacova mai qo, era sa vakadewataka na iVakadinadina i Jiova e sivia na 90 na vosa vagalu e vuravura raraba. E tiko tale ga ena internet na JW Library Sign Language®, e rawa ni laurai kina na ivola vakaivolatabu ena sivia na 90 na vosa. Na kena sa tu vakarawarawa na ivola va qori, e rawa kina vei ira na tacida mera vunautaka na itukutuku vinaka “vei ira na veimatanitu, na veiyavusa, duivosavosa kei na tamata.”—Vakatakila 14:6.