Raica sara na lewena

Na Website ni iVakadinadina i Jiova

Digia na Vosa vakaViti

E sivia na le 66,000 era tiko ena soqo, ra qai veitokoni kina e sivia na le 6,200 na bolecakacaka.

29 JANUERI, 2019
PERU

Vakayacori e Peru na iOtioti ni Soqo Lavotaki ni 2018

Vakayacori e Peru na iOtioti ni Soqo Lavotaki ni 2018

Ena ika23 ina ika25 ni Noveba, 2018, era kidavaki ira na le 3,400 na vulagi na iVakadinadina i Jiova e Peru ena iotioti ni soqo lavotaki e kena usutu “Mo Yaloqaqa.” Era sureti yani na tacida mai na ciwa na valenivolavola ni tabana. A vakayagataki na rara ni qito na Monumental Stadium e tiko ena koroturaga e Lima. Era le 66,254 na tiko ena soqo qori wili kina o ira na sema mai na va tale na vanua. Era papitaiso e le 719 na tacida vou. A vakayacori na porokaramu ena vosa vakavalagi, vosa vagalu ni Peru, dua na vosa e dau vakayagataki e Peru na Quechua Ayacucho, kei na vosa vakaSipeni.

E vakamoce tiko e dua na tacida gone ena otioti ni siga ni soqo lavotaki e vakayacori ena Monumental Stadium.

Era vakanamata na tacida era sureti yani kei ira na dautukutuku e kea mera vakaitavi vata ena cakacaka vakaitalatala. Era marautaka tale ga na kakana ni vanua kei na nodra itovo, vaka kina nodra lai sarasara ena valenivolavola ni tabana e Peru.

E kaya o Ezequiel Porras, e dua na mata mai na valenivolavola ni tabana e Peru: “E wananavu na veivakauqeti ni soqo lavotaki qori e Peru. E guiguilecavi dredre vei ira na tacida, e ivakadinadina levu tale ga vei ira na lewenivanua. Keimami vakavinavinakataki Jiova ni rawa ni keimami vakalagilagia kina na yacana cecere.”—1 Pita 2:12.

 

Vica vata na tobu ni papitaiso e biu ena rara ni qito mera papitaiso kina e le 483. Era le 236 tale ga era papitaiso ena va tale na vanua e sema tiko yani ena soqo qo.

Era veitokoni ena cakacaka vakaitalatala na tacida era sureti yani kei ira na tacida ena vanua qori.

E veivakayaloqaqataki o Brother Samuel Herd, e dua na lewe ni iLawalawa Dauvakatulewa, ena iotioti ni vunau e veisiga.

Era wawa tu na tacida ena raraniwaqavuka na Jorge Chávez International Airport, e Lima, mera kidavaki ira na vulagi.

E okati ena sarasara ena valenivolavola ni tabana na ivakamacala me baleta na iVolatabu kei na nona nakita dei na Kalou me tiko ga kina na yacana.

Era vakaraitaka toka qori na tacida na icakacaka ni veimataqali kakana vakaPeru ena gauna era vakasarasarataki tiko kina e dua na ilawalawa ena noda vale ni soqo lelevu. Vakarautaki tiko qo e dua na mataqali kokoda mera tovolea na tacida era sureti yani.

Vakaraitaki toka qo na mataqali culacula era dau cakava. Ena rokataki na vutinisipi ena ibena e caka mai ena so na kau era tea.

Era marautaka na sureti nodra sarasara ena valenivolavola ni tabana, ra qai soqo vata ena yakavi, era rogoca kina eso na ivakatagi vakayalo e kena usutu “Mo Veiqaravi.” Na veivakamarautaki qori e okati kina na ivakatagi kei na meke e kilai ena tolu na yasayasa rogo e Peru, oya na baravi dravuisiga, ulunivanua na Andes, kei na veikauloa ni Peru.

Dua na meke mai na siti o Trujillo era vakamarautaki kina na vulagi ena yakavi.

Vakatasuasuataki e vica na cakacaka vakavunau ena nodra soqo ena yakavi. Na ivakatakarakara ni vale qo kei na isulu era kilai tani kina na lewe i Quechua era tiko ena veiulunivanua ena taudaku ni koro kei Cuzco.

Era yaloyalo o ira kece na vakaitavi ena veivakamarautaki ni sa mai cava nodra soqo ena yakavi.