Raica sara na lewena

Na Website ni iVakadinadina i Jiova

Digia na Vosa vakaViti

Ira na veisiko tiko e Warwick ra qai vakayagataka na misini vakalivaliva e rawa ni saravi kina na vidio ena vosa vagalu ni Merika.

13 FEPURUERI, 2019
MERIKA

Sarasara ena iTikotiko Liu ni Vakayagataki na Vosa Vagalu ni Merika

Sarasara ena iTikotiko Liu ni Vakayagataki na Vosa Vagalu ni Merika

Me tekivu ena Janueri 2019, era sa sarasara ena vosa vagalu ni Merika (ASL), o ira na gade ina noda itikotiko liu. E vakamacalataka o Enrique Ford, e liutaka na cakacaka ena tabana ena Museum Department: “E vakasakiti dina na kena vakadewataki qai porokaramutaki me biu ena vosa vagalu! Ena yaga vakalevu vei ira na tacida era didivara se o ira era sega ni rogoca vinaka na ka, nira na kila ra qai vulica kina e levu sara na ka.”

Dua vei ira na veivakasarasarataki ena vosa vagalu o Ana Barrios, e painia tudei qai vakaitikotiko e Niu Yoka. E kaya: “Marau sara ga niu rawa ni sarava eso na vidio ena vosa vagalu! Au sa sarasara oti, au kila tale ga na ka e vakaraitaki kina. Ia e sega ni uqeta sara na lomaqu na kena itukutuku, sega tale ga ni levu na ka e vakaibalebale niu wilika wale tu ga na veika era volai kina ena vosa vakavalagi. Noqu sa qai sarava e vica na kena vidio leleka ena vosa vagalu, au sa qai kila na ibalebale dina ni yaca i Jiova, e sega ni vaka na kena au kila tu eliu. E okati tale ga ena sarasara na kena vakamacalataki na itovo i Jiova, au tagi sara ga ena kena uqeti au vakalevu!”

E tekivutaki na sasaga qori ena June 2017. Era vakaitavi kina e le 23 na tacida, okati kina e le 6 na didivara, kei na le 6 tale ratou sega ni didivara, ia ratou didivara nodratou itubutubu. Era veivuke sara ga ena kena vakadewataki kei na tuvanaki ni veika me saravi ena vosa vagalu. Era katona e sivia na 900 na vidio, rauta ni ciwa na aua na kena caka tiko me rawa ni tautauvata kei na kena e rogoci ga kina na domo. E vakayacori na katokatoni ena tolu na vanua: na tabana ni vakadewa ena vosa vagalu ni Merika tu yawa e Fort Lauderdale, e Florida, na valenivolavola e Wallkill, Niu Yoka, e Merika, kei na itikotiko liu e Warwick, e Niu Yoka. Ni vakacavari na iotioti ni katokatoni, era sureti tale na tacida didivara e duidui nodra yabaki ni bula kei na vanua era cavutu mai kina, mera sarava ra qai vakavinakataka na veika sa vakadewataki tu, ni bera nira sarava na gade yani ena itikotiko liu.

Qo eso na tacida era veivuke ena kena vakarautaki na vosa vagalu me saravi e Warwick.

E volia na tabana ni Museum Department na iyaya vakalivaliva ni sarasara e laurai ga kina na veika sa vakadewataki ena vosa vagalu, me vaka e vakayagataki tiko e Warwick, e rogoci kina na domona e dua ni vakamacala tiko. E vakarautaka tale ga na tabana qori e 14 na iyaya vakalivaliva e rawa ni saravi yadua kina na vidio ni vosa vagalu.

E kaya o Mark Sanderson, e lewe ni iLawalawa Dauvakatulewa ni iVakadinadina i Jiova: “Na inaki ni vanua ni sarasara qo e Warwick, oya mera uqeti ra qai vakayaloqaqataki kece kina na gade mai ena itikotiko liu. E marautaki ni rawa ni vakayacori na sarasara ena 14 na duidui vosa, wili kina na vosa vagalu ni Merika. E vakarautaki me baleti ira na didivara, se o ira era sega ni rogoca vinaka na ka, se ra mani iVakadinadina i Jiova se sega.”

Me yacova mai qo sa sivia e veimama na milioni na kedra iwiliwili na gade yani e Warwick. Oni sureti na mataveitacini e vuravura raraba moni mai raica sara ga na veika e vakarautaki qo, moni vulica kina na itukutuku makawa e veivakadrukai qai veiuqeti me baleti keda na iVakadinadina i Jiova. O ira kece na rawa ni mai sarasara era na uqeti mera “vakanuinui vua na Kalou.”—Same 78:7.

Ni vakarautaki tiko na veika me biu ena vosa vagalu, e railesuva tiko na tacida qo eso na vidio ena vanua ni katokatoni tu vakawawa ena itikotiko liu e Warwick, e Niu Yoka.

Tolu na gone e didivara nodratou itubutubu, ratou dautukutuku tale ga. Ratou sarava tiko e dua na drama vakaivolatabu e vakadewataki ena vosa vagalu, mai na 1977 e kena ulutaga “Me Vakatetei na Yaca i Jiova e Vuravura Taucoko (Jehovah’s Name to Be Declared in All the Earth).

Sarasara tiko eso na tacida ena dua na rumu era maroroi tu kina na iVolatabu e vakatokai me “The Bible and the Divine Name.

Era sarava tiko na gade yani na vidio e vakadewataki ina vosa vagalu e kena ulutaga, “iLawalawa era Vakatokai ena Yaca i Jiova” (A People for Jehovah’s Name.)

Sarava tiko qo e dua na ilawalawa e rauta ni 500 na itaba e vakamacalataki ena vosa vagalu, qai okati kina na vidio “Photo-Drama of Creation.”