Raica sara na lewena

Na Website ni iVakadinadina i Jiova

Digia na Vosa vakaViti

O vuniwai Gabriele Hammermann, e dairekita ni Keba ni Veivakararawataki e Dachau, e vakaraitaka tiko na itaba ni ivakananumi kei Max Eckert ena gauna e vakamacala tiko kina.

9 JULAI, 2018
JAMANI

Sa Qai Kilai Levu: Vakananumi o Max Eckert ena Keba ni Veivakararawataki e Dachau

Sa Qai Kilai Levu: Vakananumi o Max Eckert ena Keba ni Veivakararawataki e Dachau

A vakayacori ena ika7 ni Me, 2018 e dua na soqo ena vanua e dau tiko kina e liu na Keba ni Veivakararawataki e Dachau. E qai vakaraitaki vei ira na le 200 era tiko kina e dua na ivakananumi me baleti Brother Max Eckert. A vesu tu ena keba qori me sivia e rua na yabaki ni bera ni vakau i Mauthausen, e dua tale na keba voravora sara e tiko e Austria. Ia e sega ni lesu bula i vale. E levu era sega ni kilai koya ni bera ni mate, ia qo sa qai kilai ena vuku ni nona yalodina ina nona vakabauta.

Na itaba ni Keba ni Veivakararawataki e Dachau e liu na vanua a vesu tu kina o Max Eckert ni bera ni vakau i Mauthausen.

Mate o Max Eckert ena keba qo ni veivakararawataki e Mauthausen.

E dikevi ena kena itukutuku o Brother Eckert ni dua na turaga e yalodina vua na nona Kalou. Erau totogitaki vakaveiwatini ena itekitekivu ni 1935 ni rau vakamacalataka tiko na nodrau vakabauta. E biu mai na nona cakacaka ni sega ni vinakata na nodra kuila na Nazi. A dua tale ga vei ira na le 600 na iVakadinadina i Jiova yalodoudou e bala e valeniveivesu e Dachau ena 1937. Oti tale e rua na yabaki e vakau ina keba o Mauthausen, na vanua era mate kina e le 90,000 ena vuku ni veika vakaloloma e vakayacori vei ira. Ena ika21 ni Feperueri 1940, a vakau e dua na itukutuku vei wati Brother Eckert, e tukuni tu kina va qo: “Mate nikua o watimu ena keba. Qiriti ratou na ovisa.” Se qai yabaki 43 o Brother Eckert.

A vakaitavi ena soqo qo o vuniwai Gabriele Hammermann, e dairekita tale ga ni Keba ni Veivakararawataki e Dachau. E kaya: “O ira na Gonevuli ni iVolatabu [na yaca era kilai kina na iVakadinadina i Jiova ena gauna ya] era vakacacani ena vuku ni nodra vakabauta nira sega ni via lewe ni isoqosoqo ni Nazi, salututaki Itala, se vakaitavi ena ivalu.” E tomana: “Dua na ka nodra dau dokai ira na Gonevuli ni iVolatabu qo na vo ni kaivesu, ra qai vakabibitaka na nodra yalodina tu ga kei na nodra dau tu vakarau ni veivuke.”

E vakamacalataka tale ga o Brother Wolfram Slupina, e dua na mata ni iVakadinadina i Jiova e Jamani, ni levu era tiko ena soqo ya era sega ni kilai Brother Eckert. E kaya: “E sega ni tiko qo e dua na itaba kei Max Eckert.” Ia na kena ivakananumi ga e “kilai levu kina ena nona yalodina [o Brother Eckert] kei na dei ni nona vakabauta qai sega ni soro koso me yacova sara nona mate.”

E macala ga ni na nanuma vinaka tu o Jiova na vakabauta kei na yalodina i Max Eckert, vaka kina o ira na vo ni iVakadinadina i Jiova era mate ena vuku ni nodra vakabauta.—Iperiu 6:10.