Raica sara na lewena

21 FEPERUERI, 2020
ISIRELI

Sevutaki na iVolatabu vakaIperiu e Isireli

Sevutaki na iVolatabu vakaIperiu e Isireli

Ratou marautaka vakalevu na vuvale qo na nodratou iVolatabu se qai sevutaki

“E tiko qo e dua na neitou iloloma na iLawalawa Dauvakatulewa.” Qori na ka e kaya o Brother Geoffrey Jackson, e dua vei ratou na lewe ni iLawalawa Dauvakatulewa ena gauna e sevutaka kina na New World Translation of the Hebrew Scriptures ena vosa vakaIperiu ni gauna qo. A vakayacori na soqo lavotaki qori ena ika11 ni Janueri 2020, ena Romema Arena e Haifa, e Isireli. Era tiko kina e 2,125.

E kaya o Brother David Simozrag, e veiqaravi tiko ena Tabana ni iTukutuku e Isireli: “E laurai ni sivia e walu na milioni ena neimami yasayasa era vosa vakaIperiu. Keimami kila ni na yaga vakalevu na Tanakh * ena vosa vakaIperiu ni gauna qo vei ira na tu ena yalava.” Na iVolatabu e sevutaki qo e vica vei ira na vakadewa ni gauna qo, sa tu vakarawarawa vei ira na dauwiliwili vakaIperiu.

Sa vakadewataki taucoko se vakatikina ena 186 na vosa na New World Translation. Me vaka ga nodra lavetaka na vunivola na ivolavivigi ni iVolatabu vakaIperiu, era sasaga tale ga vagumatua na tacida ena timi ni vakadewa ena vosa vakaIperiu mera vakavotuya donu na vakasama ena iVolatabu qori. E sivia e tolu na yabaki nodra vakadewataka tiko. E kaya e dua vei ratou na timi ni vakadewa: “Me matata vei ira e levu na dauwiliwili era vosa vakaIperiu e dua na ibalebale ni tikinivolatabu se mera kila na iVolatabu taucoko, era dau rai ena nodra ivakamacala eso tale, se ena so tale na ivakadewa ni iVolatabu. Ia na iVolatabu e sevutaki qo, e vukei ira na lewenivanua nikua mera kila vinaka sara ga na ibalebale ni tikinivolatabu.”

Ratou vakaraitaka tiko e dua na vuvale nodratou iVolatabu vakaIperiu ena vosa ni gauna qo

E kaya e dua na tacida: “E rawa ni vica vata na yabaki na kena sega tu ni matata vua e dua na dauwiliwili e dua na iwase levu ni iVolatabu na Tanakh. Ia qo sa matata vua na ka e wilika, e donu tale ga.” Era le 2,000 kece na dautukutuku ena yalava e qarava na valenivolavola ni tabana e Isireli, e 603 vei ira na tacida qori era vosa vakaIperiu. Era na vakayagataka vinaka sara ga na iloloma talei qo ‘mera vaqaqara ena lawa i Jiova mera cakava sara.’—Esera 7:10.

^ para. 3 Ni vakatauvatani kei na vo ni iVolatabu, e duatani na kena tuvani na iVolatabu vakaIperiu. E tolu na kena iwasewase: na Torah (Lawa), na Nevi’im (Parofita) kei na Ketuvim (Volavola). E yavutaki na Tanakh mai na imatai ni tolu na matanivola ena iwasewase qori.