Raica sara na lewena

21 JANUERI, 2014
RUSIA

IROGO VOU: Guce na Sasaga me Vakatabui na JW.ORG

IROGO VOU: Guce na Sasaga me Vakatabui na JW.ORG

ST. PETERSBURG, Rusia—Ena ika7 ni Okosita, 2013, a vakarota na mataveilewai e ra ena korolevu o Tver ena vualiku kei Moscow, me vakatabui e Rusia taucoko na website na jw.org.

Era dau rai ena website na jw.org e vica vata na udolu e veiyasa i vuravura, era dau taleitaka tale ga na dauvakadidike. Ia e tokoni ira na vakailesilesi na mataveilewai me vakatabui na website. A vakataulewa na mataveilewai, ia a sega ni bau taro ina Watchtower Bible and Tract Society of New York se me kerea e dua na ivakamacala mai na isoqosoqo ni iVakadinadina i Jiova me baleta na website. Era kerea na iVakadinadina i Jiova me rogoca tale na kisi na matavelewai levu e Tver, qai tuvanaki me vakayacori qori ena 22 Janueri, 2014.

E sivia ni 160,000 na iVakadinadina i Jiova e Rusia era dau vakayagataka na website na jw.org ena nodra cakacaka vakalotu, kei na nodra vulica yadudua se vakavuvale na iVolatabu. Ni sega ni saumi na itukutuku vakaivolatabu e vakarautaki ena website, era dau rai tale ga kina e rauta ni 142 na milioni na lewe i Rusia. Ia era sa na sega ni cakava rawa qori ke sega ni veisau na lewa ni mataveilewai. O koya e uqeta na vakayagataki ni website e Rusia e rawa sara ga ni wili me daubasulawa. E kaya e dua na parofesa e kenadau ena vakadidike vakalotu o Yekaterina Elbakyan, ni jw.org e “iloloma vei ira na dau vakadidike ena veika vakalotu. E levu na ka e rawa ni vulici kina, qai matata na ivakamacala. E rawarawa na kena vakamacalataki na veika titobu vakayalo kei na ivakavuvuli e vauca na itovo. Ni o rai ena website, e vaka ga o curuma tiko na nodra vale na iVakadinadina i Jiova.”

E kaya o Grigory Martynov na nodra gusunivosa na iVakadinadina i Jiova e Rusia: “E yaga dina na website na jw.org vei ira na via kila na iVolatabu ena noda vanua, qai sega ni tokona na veika vakapolitiki se vakabisinisi.” E kaya tale o Grigory ni sa tu na vakanuinui ni na vakadonuya na mataveilewai levu e Tver mera vakayagataka tiko ga na lewe i Rusia na website na jw.org.

E kaya o J. R. Brown e gusunivosa ni itikotiko liu ni iVakadinadina i Jiova e Niu Yoka: “E ivukevuke yaga ni vakadidike na website na jw.org, e nuitaki qai yaga vakalevu e veiyasa i vuravura na ivakasala ni vuvale e tiko kina. Era rai ena website qori e veisiga e rauta ni le 900,000 mera wilika kina na itukutuku e vakarautaki ena 600 vakacaca na vosa. E sega ni dua na yavu me nanumi kina ni na veivakaleqai na itukutuku qori.”

Gusunivosa:

Veiyasa i vuravura: J. R. Brown, Valenivolavola ni iTukutuku, talv. +1 718 560 5000

Rusia: Grigory Martynov, talv. +7 812 702 2691

22 Janueri, 2014 IROGO VOU: Dua na qaqa vakairogorogo nikua vei ira na iVakadinadina i Jiova, ni a veisautaki kina na lewa a tauca taumada na mataveilewai e ra me vakatabui e Rusia taucoko na website vakadonui ni iVakadinadina i Jiova na jw.org. E kaya na mataveilewai levu ena gauna e rogoca tale kina na kisi, ni sega ni dodonu na lewa e tauca na mataveilewai e ra ena ika7 ni Okosita, 2013 baleta e sega ni dua na yavu vakalawa me vakatabui kina na website. E kaya o J. R. Brown na gusunivosa mai na itikotiko liu ni iVakadinadina i Jiova: “Era marautaka na qaqa qo na iVakadinadina e veiyasa i vuravura. Kena ibalebale sa rawa nira vakayagataka tiko ga na lewe i Rusia taucoko na website totoka qo.”