Raica sara na lewena

Na Website ni iVakadinadina i Jiova

Digia na Vosa vakaViti

21 OKOTOVA, 2016
ITALI

Veivakacegui na iVakadinadina ni Oti na Uneune e Itali

Veivakacegui na iVakadinadina ni Oti na Uneune e Itali

ROMA—Era veisoliyaka ena Seviteba 2016, na iVakadinadina i Jiova e veiyasa i vuravura na Vale ni Vakatawa me baleta na vakacegu. E usutu ni nodra veitalanoa ena vula lavotaki qori na ulutaga “O na Kunea e Vei na Vakacegu?” Era ogaoga sara na iVakadinadina e Itali ena kena wasei na itukutuku veivakacegui ena iVolatabu, ni kurea oti e dua na yasa i Itali na uneune. E 6.2 na kaukaua ni uneune qai vakacaca ena yasayasa o Lazio, Marche, kei Umbria ena ika24 ni Okosita, 2016. Era mate kina e voleka ni 300 na lewenivanua, e sivia na le 2,000 e vakacacani nodra vale.

E kaya o Christian Di Blasio na nodra gusunivosa na iVakadinadina i Jiova e Itali: “Na cakacaka lavotaki qo a kena inaki mera vakacegui kina na lewe i vuravura ena ituvaki cava ga era sotava, ia e Itali, keimami kauaitaka vakalevu na veika dredre era sotava o ira era vakaleqai ena uneune, kei ira na vakaitavi ena cakacaka ni vakacoko.”

E 15 na ivavakoso ni iVakadinadina i Jiova e tiko ena yasayasa a kurea na uneune, ia e sega ni mate se mavoa levu e dua na iVakadinadina. E vakarusai ga na nodratou vale e tolu na iVakadinadina, na nodra vale eso tale e vakacacani. E kaya o Mr. Di Blasio ni so na iVakadinadina a vakacacani na nodra vale, era lai veivakacegui tale vei ira era tiko veitikivi ena mekesini me baleta na vakacegu. Eso na iVakadinadina era donuya na uneune a yaco e liu, era lai veitalanoa kei ira na vakaleqai ena uneune a qai yaco e muri. E kaya tale o Mr. Di Blasio: “Era kaya o ira na veivuke ni vakacegui ira dina na itukutuku ena iVolatabu, era via vukei ira e levu tale era rarawa tu mera vakila tale ga na vakacegu qori.”

Gusunivosa:

Veiyasa i vuravura: David A. Semonian, Valenivolavola ni iTukutuku, 1-718-560-5000

Itali: Christian Di Blasio, 39-06-872941