Raica sara na lewena

Na Website ni iVakadinadina i Jiova

Digia na Vosa vakaViti

1 NOVEBA, 2016
ITALI

Kurea e Dua na Yasa i Itali na Uneune

Kurea e Dua na Yasa i Itali na Uneune

A kurea e dua na yasa i Itali ena ika30 ni Okotova, 2016, e dua na uneune e 6.6 na kena kaukaua. Na iotioti ni uneune kaukaua me bau kurei Itali a se yaco sara ena 1980, sa qai dua tale qo. E rauta ni le 20 era mavoa, ia e laurai ena itukutuku sa bau tauri rawa ni sega ni dua e mate.

Na uto ni uneune qo e toka volekata na tauni o Norcia, na vanua vata ga a yaco kina e rua tale na uneune ena vica na siga yani e liu ena ika26 ni Okotova, 2016. Na imatai ni uneune e 5.5 na kena kaukaua, na kena ikarua ni oti e vica na aua e 6.1 na kena kaukaua.

Na uneune e yaco veitaravi qo e volekata na vanua a kurea e dua tale na uneune ena ika24 ni Okosita ra qai mate kina e rauta na le 300 na lewenivanua.

E tukuna na valenivolavola ni iVakadinadina i Jiova e Itali ni sega ni dua na nodra lewe ni lotu e mate se mavoa levu. E rua ga na vuvale iVakadinadina e talaraki na nodratou vale ena uneune a yaco ena ika26 ni Okotova, qai vakacacani nodra vale e levu tale na iVakadinadina. Nira se vakila tiko mada ga e levu na revurevu ni uneune ena Okosita, sa caka toka ga kina na veitaratara vei ira na iVakadinadina ena vanua e vakaleqai me rawa ni kilai na levu ni vakacaca kei na veivuke e gadrevi. Me vakataki ira ga na vo ni lewenivanua era vakaleqai ena uneune, levu na iVakadinadina era sa moce tu ga ena nodra motoka, lori vakavale se nodra vanua ni sokalou nira sega ni kila se vakacava tu na ituvaki ni nodra vale.

E cicivaka tiko na cakacaka ni vakacoko na iLawalawa Dauvakatulewa ni iVakadinadina i Jiova ena nodra itikotiko liu, qai vakayagataki kina na ilavo e dau cautaki me baleta na nodra cakacaka na iVakadinadina e veiyasa i vuravura. Era le 251,000 na iVakadinadina i Jiova e Itali.

Gusunivosa:

Veiyasa i vuravura: David A. Semonian, Valenivolavola ni iTukutuku, 1-718-560-5000

Itali: Christian Di Blasio, 39-06-872941