Raica sara na lewena

22 NI JANUERI, 2018
ISIRELI

Vakaraitaki mai Tel Aviv na Veika Era Sotava na iVakadinadina i Jiova ena Gauna i Itala

Vakaraitaki mai Tel Aviv na Veika Era Sotava na iVakadinadina i Jiova ena Gauna i Itala

TEL AVIV—E rauta ni 1, 700 na lewenivanua era osota yani na itikotiko e Hatachana ena ika26 ni Noveba ina ika2 ni Tiseba, 2017 ni vakaraitaki kina na kedra italanoa na iVakadinadina i Jiova. Na veika e tu ena vanua ni sarasara qori e vakaraitaka na veivakacacani era sotava na iVakadinadina i Jiova ena veiliutaki i Itala.

E vakaraitaki tale ga e keri eso na vidio kei na itaba, kei na isulu e cula ena liga era dau dara na iVakadinadina ena keba ni veivakararawataki. Na ka e talei duadua kina na sarasara ena vanua qori, ni vakaraitaki kina e 27 na droini era lavetaki mai ena ivola i Johannes Steyer (1908-1998) e vakatokai “The Buchenwald Series.” E iVakadinadina i Jiova o Mr. Steyer, a bula tu ni oti e tini na yabaki nona vesu toka ena keba ni veivakararawataki e Buchenwald, Mauthausen, Sachsenburg, kei Sachsenhausen. Ena veiyabaki ni 1970, a vakaotia kina o koya na nona ivola na droini ni veika a sotava ena gauna e vesu tu kina.

E vakaraica tiko na vulagi na isulu e cula e liga era dau dara na iVakadinadina i Jiova ena gauna era vesu tu kina.

Parofesa Emeritus Yair Auron

E kaya o Yair Auron e dua na daunitukutuku makawa, e parofesa tale ga ena Univesiti na Tel Aviv Open me baleta na vanua ni sarasara qori: “Dua na ka noqu nanumi ira na itabagone era vuli tiko ena sekeneri, e bibi mera raica na veika qo, ni levu vei keimami e lailai sara na ka keimami kila me baleti ira na iVakadinadina i Jiova. Levu vei keimami e Isireli keimami sega sara ga ni kila na veika me baleti ira na iVakadinadina i Jiova kei na kedra italanoa ena gauna i Itala.”

E kaya na mata ni iVakadinadina i Jiova e Isireli o Mauro Trapanese: “E sega wale ga ni vinakati mera kila na lewenivanua na veika rarawa era sotava na iVakadinadina i Jiova ena veiliutaki i Itala, ia mera kila tale ga na ka talei e yaco ena ituvaki qori. Kena ivakaraitaki, era sega ni kila e levu era lai sarasara yani nira rawa ni sere na iVakadinadina i Jiova mai na keba ni veivakararawataki ke ra cakitaka ga nodra vakabauta. E totoka na veivakasarasarataki ni vakaraitaki kina na itukutuku matailalai va qori, e dina tale ga.”

Parofesa Gideon Greif

E kaya o parofesa Gideon Greif e dua na daunitukutuku makawa me baleta na veika e yaco e Auschwitz: “Era tamata vinaka na iVakadinadina i Jiova, e vinaka cake vei ira mera vakacacani qai vakamatei era na sega ga ni cakitaka na ka era vakabauta kei na nodra lewaeloma e vakavulici.”

Dr. Batya Brutin

Ni oti nona sarasara o Dr. Batya Brutin e dua na daunitukutuku makawa ena itaba kei na droini ni Holocaust, e kaya: “Au kila ni ka eda vulica ena ka era sotava na iVakadinadina i Jiova ena gauna i Itala, ena rawa ni vukei keda meda veisautaka noda ivakarau me rawa ni vukei keda meda vakavinakataka na ituvaki kei vuravura.”

E vakayacori ga vakadua na sarasara qori ena nodra veiqaravi o ira na tuvanaka na kena caka, ia era kerea eso tale na tabana ni vuli era lai sarasara yani ke tu eso tale na kedra itukutuku na iVakadinadina i Jiova mera rawa ni vakayagataka.

Gusunivosa:

Veiyasa i vuravura: David A. Semonian, Valenivolavola ni Tabana ni iTukutuku, +1-845-524-3000

Isireli: Mauro Trapanese, +972-54-568-1912