Raica sara na lewena

Na Website ni iVakadinadina i Jiova

Digia na Vosa vakaViti

16 JUNE, 2016
HAITI

Vakaicovitaki Ira na iVakadinadina na Matanitu o Haiti

Vakaicovitaki Ira na iVakadinadina na Matanitu o Haiti

PORT-AU-PRINCE, Haiti—E vakavinavinakataka e dua na valenivolavola ni matanitu e Haiti, na nodra sasaga eso mera vukei ira e vakaleqai na yagodra. Na sasaga va qori a soli kina e dua na icocovi vei ira na iVakadinadina i Jiova. A vakayacori na kena soqo ena ika3 ni Tiseba, 2015, me veitaudonui kei na siga era dau nanumi kina e veiyasa i vuravura o ira e vakaleqai na yagodra. A tiko ena soqo qori o Evans Paul a paraiminisita tiko ena gauna ya, qai taura na icovi ena vukudra na iVakadinadina i Jiova na nodra gusunivosa o Daniel Lainé me vaka e taba toka e cake.

E kaya na marama e iliuliu ni valenivolavola e qaravi ira na vakaleqai na yagodra e Haiti o Guerline Dardignac, ni “vakasakiti na veika e vakarautaka na isoqosoqo ni iVakadinadina i Jiova e Haiti me baleti ira e vakaleqai na yagodra. E kauaitaka na isoqosoqo na veika era gadreva o ira e vakaleqai na yagodra, me vaka na sala ena rawarawa kina na nodra veitosoyaki. E vakarawarawataka na veitaratara kei na vakayagataki ni iyaya vovou ni tuvanaki na soqoni kei na so tale na ka e vauca na sokalou ena vosa vagalu (vosa vagalu ni Merika). E vakarautaka tale ga na nodra ivola na mataboko kei na nodra vidio na galu.”

Qo na ikarua ni icovi e soli vei ira na iVakadinadina me baleta na nodra vukei ira e vakaleqai tu na yagodra. A soli vei ira na imatai ni icovi ena 2013, a kurei Haiti kina e dua na uneune vakaitamera. Era mate ena uneune e sivia na 222,000 na lewenivanua ra qai mavoa e rauta ni le 300,000. Qori e vakavuna me tubu ena 15 na pasede na kedra iwiliwili na lewenivanua e vakaleqai na yagodra. A soli na icovi vei ira na iVakadinadina nira vakarautaka ena nodra vanua ni sokalou e Cayes, Haiti, eso na ka ena vakarawarawataka nodra veitosoyaki o ira e vakaleqai na yagodra.

E kaya o Daniel Lainé: “Na icovi qo e vakaraitaka na yaga ni neimami sasaga me keimami vukei ira e vakaleqai na yagodra. Keimami marau tale ga ni okata na veivuke va qori ena neimami cakacaka ni veivakavulici ena iVolatabu.”

Gusunivosa:

Veiyasa i vuravura: David A. Semonian, Valenivolavola ni iTukutuku, 1-718-560-5000

Haiti: Daniel Lainé, 509-2813-1560