Raica sara na lewena

TISEBA 3, 2014
DENMARK

Veiuqeti na iVakadinadina i Jiova e Denmark ena Veisele e Sega ni Soli Kina na Dra

Veiuqeti na iVakadinadina i Jiova e Denmark ena Veisele e Sega ni Soli Kina na Dra

COPENHAGEN, Denmark—Era tukuna na tabana ni itukutuku rogolevu e Denmark ni sa dua na iwalewale vou ni kena vakavinakataki na dra (blood management) ena veiqaravi vakavuniwai ena Koroturaga o Copenhagen. E tukuna na niusiveva na Kristeligt Dagblad, “e rawa nira bula e levu na tauvimate era sele ke sega ni soli vei ira na dra. E caka qo ena vukudra sara ga na iVakadinadina i Jiova.” Ena vuku ni nodra vakabauta vakaivolatabu na le 8,000,000 vakacaca na iVakadinadina i Jiova e vuravura raraba, wili kina na le 14,000 vakacaca na iVakadinadina era tiko e Denmark, era qara na veiqaravi vakavuniwai vinaka duadua e sega ni tauri kina na dra.

E kilai na valenibula e Denmark e vuravura raraba me dau soli kina vakalevu na dra, lai sivia sara na vo ni valenibula e Urope ena 50-100 na pasede. Na ulutaga “Bloodless Surgery is Gaining Ground” (Levu era sa Vinakata na Veisele e Sega ni Soli Kina na Dra) ena website ni Politiken e vakamacalataka, “ena vukudra na iVakadinadina i Jiova era qara na vuniwai na isosomi” ni veiqaravi e dau soli kina na dra. Nira qaravi ira na iVakadinadina, era sa tekivu vakayagataka na vuniwai eso na iwalewale me kua ni drodro vakalevu na dra (blood conservation), me vaka na vakayagataki ni wainimate ni bera na veisele e vakatokai na erythropoietin, na iron kei na B-complex vitamin, kei na vakayagataki ni antifibrinolytic ni oti na veisele. E vakamacalataka na Copenhagen Post, “ena veiyabaki e lima ina tini na iVakadinadina i Jiova e caka vei ira na veisele lelevu ni mateniuto ena Aarhus University Hospital Skejby” e sega ni soli kina na dra.

Era sa vakadinadinataka na vuniwai e Denmark na rerevaki ni vakayagataki ni dra ena nodra veiqaravi. E lalawataka na valenibula na Rigshospitalet mai Copenhagen ena 2009, na veiqaravi me vakavinakataki kina na dra. E kaya na niusiveva na Berlingske ni sa sega ni vakayagataki vakalevu na dra, “e sega ni yaco kina e levu na leqa se mate.” Era sa duavata tale ga ena sasaga qori na vo ni valenibula ena Koroturaga, kei na so tale na valenibula mai na veiyasana.

E vakamacalataki tale ga ena Berlingske na ka e tukuna o Vuniwai Morten Bagge Hansen, e dauvakadidike qai iliuliu ni vanua e dau maroroi kina na dra (blood bank) ena Rigshospitalet. E vakamacalataka o koya na kena vakalailaitaki na vakayagataki ni dra e Denmark “e dua na cavuikalawa levu e yaga vei ira na tauvimate.” Qai kuria na Denmark Radio kei na Kristeligt Dagblad na ivakamacala i Vuniwai Astrid Nørgaard, na Dairekita ni Tabana ni Veiqaravi Vakavuniwai e Rigshospitalet, e tukuna “ke sega o ira na iVakadinadina i Jiova, ke da sega ni vakila na yaga ni veisele e sega ni soli kina na dra.”

Gusunivosa:

Veiyasa i vuravura: J. R. Brown, Valenivolavola ni iTukutuku, talv. +1 718 560 5000

Denmark: Erik Jørgensen, talv. +45 59 45 60 00