Raica sara na lewena

Na Website ni iVakadinadina i Jiova

Digia na Vosa vakaViti

21 JULAI, 2014
AUSTRIA

Vakacaucautaki na iVakadinadina i Jiova ena Keba ni Veivakararawataki e Gusen

Vakacaucautaki na iVakadinadina i Jiova ena Keba ni Veivakararawataki e Gusen

SELTERS, Jamani—A dolavi ena Sigatabu, ika13 ni Epereli, 2014, na ivakananumi me baleti ira na 450 na iVakadinadina i Jiova era vesu donuya nodra veiliutaki na Nazi ena keba ni veivakararawataki e Mauthausen kei Gusen mai Austria. Era tiko ena soqo ni ivakananumi qori e sivia na 130 na vulagi.

Nira yaco yani na iVakadinadina ena keba ni veivakararawataki e Mauthausen, e vakarerei ira na iliuliu ni keba ni kaya: “Ena sega ni drobula e dua na Gonevuli ni iVolatabu.” Dua vei ira na vesu o Martin Poetzinger, a qai lewe ni iLawalawa Dauvakatulewa ni iVakadinadina i Jiova ena dua na gauna e muri e Brooklyn, Niu Yoka. A vesu me ciwa na yabaki e Dachau, Mauthausen, kei Gusen. E kaya me baleta na veika e sotava e Mauthausen: “Era vakayagataka na ovisa vakalecaleca ni Jamani (Gestapo) na sala kece era nanuma me keimami cakitaka kina na neimami vakabauta.”

Era kau eso na iVakadinadina era vesu tu e Mauthausen ina dua tale na keba lailai e Gusen. Na inaki levu ni keba qo me “keba ni veivakamatei,” e dau caka kina e veisiga na veivakamatei e nakiti se lalawataki. Era dau sota vakaiwasewase ena bogi na iVakadinadina mera veivosakitaka na veitikinivolatabu era nanuma rawa. Era cakava qori me kaukaua tiko ga kina na nodra vakabauta. Dua na iVolatabu a bau toka vei ira a wasewasei na tabana mera wilika kece na iVakadinadina. Era dau vunitaka e ruku ni davodavo ra qai wilika ena gauna era galala kina.

Era qaseqasetaka tale ga na iVakadinadina nodra wasea na itukutuku vakaivolatabu vei ira tale eso. Eratou vuli iVolatabu sara kina e lima na kaivesu ni Poladi, ratou qai papitaiso ena dua na tavu kau. A vunau tale ga vua e dua na iliuliu ni vakailesilesi ni valeniveivesu o Franz Desch, e qai dua na iVakadinadina i Jiova na vakailesilesi qori.

E gusunivosa ni iVakadinadina i Jiova e Austria o Wolfram Slupina, e kaya: “Keimami marau nira nanumi na iVakadinadina ena nodra vakabauta kei na yaloqaqa nira vesu tu ena keba e Mauthausen kei Gusen. E dodonu me nanumi qai vakatotomuri na nodra veikauaitaki kei na nodra yalololoma, ni a vakayacori vei ira na veika tawadodonu.”

Gusunivosa:

Veiyasa i vuravura: J. R. Brown, Valenivolavola ni iTukutuku, talv. +1 718 560 5000

Austria: Wolfram Slupina, talv. +49 6483 41 3110