JULAI 1, 2026
RUSIA

iMawi ina imatau: O Brother Roman Khorikov, Brother Yuriy Khorikov, kei Brother Kirill Severinchik

‘Vukei Au na Masu Meu Kua ni Yalolailai’

SARAVA/ROGOCA

Ena ika19 ni June 2026, e kaya na mataveilewai Surgut City Court of the Khanty-Mansi Autonomous Area—Yugra ni ratou cala o Brother Roman Khorikov, Brother Yuriy Khorikov, kei Brother Kirill Severinchik. E dua na tacida e vakatatabutaki me ono na yabaki va na vula, e dua me ono na yabaki ono na vula, kei na dua tale me va na yabaki.

Kedratou iTukutuku

Roman Khorikov

Sucu: 1988 (Surgut)

Papitaiso: 2009

Me baleti koya: E dau cakacaka tu vakamekeniki. Vakamau kei Filiya ena 2020. A totogitaki tale ga na tamai Roman o Yuriy, ena kisi vata ga qori

Beitaki: Tuvanaka qai vakailavotaka na cakacaka e vakavuna na tikoyavavala

iTotogi: Vakatatabutaki me ono na yabaki va na vula

Ka e Tukuna

Na cava e vukei iko mo vosota na ituvaki dredre qori?

Ena gauna dredre qori, e vaka me curu oso noqu vakasama niu waraka tiko na lewa mai vei ratou na vakailesilesi. Au rarawa qai lomaleqa tale ga. Ia na masu e dua na ka bibi e vukei au meu kua ni yalolailai. Au na tukuna vei Jiova na ka kece e tu e lomaqu, qai saga meu raica na sala e sauma kina noqu masu. Noqu cakava qori e vukei au meu vakasamataki Jiova tiko ga qai volekati koya, e solia tale ga vei au na vakacegu.

Yuriy Khorikov

Sucu: 1967 (Matanitu Makawa kei Rusia)

Papitaiso: 2004

Me baleti koya: E dau cakacaka ena baqe. Vakamau kei Irada ena 1987. E dua na luvedrau tagane kei na yalewa. Na luvedrau tagane o Roman, e totogitaki ena kisi vata ga qori

Beitaki: Tuvanaka qai vakailavotaka na cakacaka e vakavuna na tikoyavavala

iTotogi: Vakatatabutaki me ono na yabaki ono na vula

Ka e Tukuna

Na cava e vukei iko me donu tiko ga nomu rai?

E kaya na Vosa Vakaibalebale 24:10 “Ke o yalolailai ena siga ni rarawa, ena lailai na nomu kaukaua.” Au saga me donu tiko ga noqu rai meu kua kina ni yalolailai. E bibi tale ga meu vakasamataka na inuinui. Au dau saga meu vakananuma tiko ga nida sa tu qo ena iotioti ni veisiga, sa na voleka tale ga ni oti na ituvaki dredre qo. Niu talaucaka na lomaqu vei Jiova, au vakila kina na vakacegu. Au vakavinavinakataka tale ga nodrau veitokoni kei na veikauaitaki o watiqu kei na luvequ yalewa, ni rau dau vakayaloqaqataki au ena ka rau tukuna kei na ka e rau cakava.

Eda nuidei ni o Jiova e kila na veika era gadreva na nona tamata qai tu vakarau me vukei ira.—Same 121:3, 4.

Raica Tale Ga

IROGO MAI VEIYASA I VURAVURA

Vesu ena Vuku ni Nodra Vakabauta—Veivanua

Veivanua era vesu kina na iVakadinadina i Jiova kei na ituvaki era sotava, ena vuku ni nodra vakabauta kei na nodra dodonu.