Kɔ no mu nsɛm no do

Kɔ no mu nsɛm a wɔahyehyɛ no do

Nsɛm bi a Wɔakyerɛ Mu

Nsɛm bi a Wɔakyerɛ Mu

1 JEHOVAH

Nyankopɔn ne dzin nye Jehovah, na n’asekyerɛ nye dɛ, “Nyia Ɔma Ɔyɛ Hɔ.” Jehovah nye adze nyina do tumfo Nyankopɔn no, na ɔno na ɔbɔɔ adze nyina. Ɔwɔ tum a obotum dze ayɛ biribiara a ɔpɛ dɛ ɔyɛ no.

Hebrew kasa mu no, nna wɔdze akyerɛwmba anan na wɔdze kyerɛw Nyankopɔn ne dzin no. Wɔ Borɔfo kasa mu no, wɔdze akyerɛwmba YHWH anaa JHVH na wɔdze gyina hɔ ma Nyankopɔn ne dzin no. Nyankopɔn ne dzin no pue bɛyɛ mpɛn 7,000 wɔ tsetse Hebrew Bible nkyerɛwee mu. Wɔ wiadze nyina no, nyimpa dze dzin Jehovah a wɔakyerɛw no wɔ akwan soronko do dzi dwuma na wɔbɔ dzin no dɛ mbrɛ ɔtse wɔ hɔn kasaa mu.

Tsir 1, nky. 15

2 BIBLE NO FI NYANKOPƆN ANAA “NYAME AHOM MU”

Nyankopɔn nye Bible no ne Kyerɛwfo, naaso ɔnam nyimpa do kyerɛwee. Yebotum dze iyi atoto edwumawura bi a ɔma ne kyerɛwfo kyerɛw krataa ho. Edwumawura no no nsusui na ne nsɛm na ɔwɔ krataa no mu. Nyankopɔn nam no sunsum krɔnkrɔn no do na ɔmaa Bible akyerɛwfo no kyerɛɛw no nsusui too hɔ. Nyankopɔn no sunsum no kyerɛɛ hɔn kwan wɔ akwan ahorow pii do. Ɔtɔfabi a, ɔma wonya enyido-adzehu anaa wɔso daa, na wɔaakyerɛw ato hɔ.

Tsir 2, nky. 5

3 NGYINADONSƐM

Ɔyɛ nkyerɛkyerɛ a ɔwɔ Bible no mu a ɔkyerɛkyerɛ nokwasɛm mu. Dɛ nhwɛdo no, ngyinadosɛm a ɔnye dɛ, “fɛkuw bɔn sɛɛ bra pa” no ma yehu dɛ, hɛn anyɛnkofo botum enya hɛn do nsunsuando pa anaa nsunsuando bɔn. (1 Corinthfo 15:33) Afei so, ngyinadosɛm a ɔnye dɛ,  “dza nyimpa dua no, ɔnoara na obobu” no so ma yehu dɛ, dza yɛbɛyɛ biara no, yebotwa do aba.​—Galatiafo 6:7.

Tsir 2, nky. 12

4 NKƆNHYƐ

Iyi yɛ asɛm a ofi Nyankopɔn hɔ. Obotum ayɛ asɛm a ɔma yehu Nyankopɔn ne pɛ, abrabɔ ho akwankyerɛ, ahyɛdze anaa atsɛmbusɛm. Obotum so ayɛ asɛm a ɔfa dza obesi daakye ho. Nkɔnhyɛ pii a ɔwɔ Bible no mu no aba mu dadaw.

Tsir 2, nky. 13

5 NKƆNHYƐ AHOROW A ƆFA MESSIAH NO HO

Nkɔnhyɛ ahorow pii a ɔwɔ Bible no mu a ɔfa Messiah no ho no nyaa mbamu wɔ Jesus do. Hwɛ adakaba a wɔato dzin “ Nkɔnhyɛ Ahorow a Ɔfa Messiah no Ho.”

Tsir 2, nky. 17, ase hɔ asɛm.

6 JEHOVAH NO BOTAE MA ASAASE NO

Jehovah bɔɔ asaase no dɛ ɔnyɛ paradise a nyimpa a wɔdɔ no no na wɔbɛtsena do. Botae ntsi a ɔbɔɔ asaase no nnsesãe. Ɔnnkɛkyɛr, Nyankopɔn beyi emumuyɛ nyina efi hɔ, na ɔaama no nkorɔfo onnyiewiei nkwa.

Tsir 3, nky. 1

7 SATAN ABƆNSAM

Satan nye ɔbɔfo a odzii kan tseew etũa tsiaa Nyankopɔn. Ne dzin Satan no kyerɛ “Ɔsoɛrtsiafo,” osiandɛ ɔkõ tsia Jehovah. Ne dzin Abɔnsam no so kyerɛ “Otwirfo.” Osiandɛ ɔkã Nyankopɔn no ho nsɛm a ɔnnyɛ nokwar, na ɔdaadaa nkorɔfo ntsi na wɔmaa no dzin Satan Abɔnsam no.

Tsir 3, nky. 4

  8 ABƆFO

Jehovah dzii kan bɔɔ abɔfo ber tsentsen ansaana ɔrobɔ asaase no. Ɔbɔɔ hɔn dɛ wɔntsena sor. Hɔn dodow bor ɔpepem ɔha. (Daniel 7:10) Wɔwɔ edzin nye su a ogu ahorow. Abɔfo anokwafo fi ahobrɛadze mu pow ɔsom a nyimpa pɛ dɛ wɔdze ma hɔn no. Ɔsor obiara ne dzibew na dwuma a odzi. Dwuma a wodzi no, bi nye dɛ; wɔsom wɔ Jehovah n’ahengua enyim, wɔdze Jehovah ne nsɛm kɛma afofor, wɔbɔ Jehovah no nkowaa a wɔwɔ asaase do no ho ban na wɔkyerɛ hɔn kwan, wodzi n’atsɛmbunsɛm do, na wɔboa asɛnka edwuma no. (Ndwom 34:7; Nyikyerɛ 14:6; 22:8, 9) Na daakye so, wɔnye Jesus bɔbɔ mu edzi akõ wɔ Har-Magedon kõ no mu.​—Nyikyerɛ 16:14, 16; 19:14, 15.

Tsir 3, nky. 5; Tsir 10, nky. 1

9 BƆN

Bɔn yɛ atsenka, nsusui anaa biribiara a yɛyɛ a otsia Jehovah anaa ɔnnye ne pɛ nnhyia. Osiandɛ bɔn tum sɛɛ yɛnye Nyankopɔn ntamu ebusuabɔ ntsi, ɔama hɛn mbra nye ngyinadonsɛm a ɔbɔboa hɛn mbrɛ ɔbɛyɛ a yɛrennhyɛ da nnyɛ bɔn. Ahyɛse no, Jehovah bɔɔ biribiara pɛpɛɛpɛr, naaso ber a Adam na Eve annyɛ setsie amma Jehovah no, wɔyɛɛ bɔn na wɔannyɛ nyimpa a wodzi mu bio. Wɔbɔɔ nkɔkora na mberwa na wowuwui. Osiandɛ yenyaa bɔn fii Adam hɔ ntsi na yenyinyin na yewuwu no.

Tsir 3, nky. 7; Tsir 5, nky. 3

10 HAR-MAGEDON

Iyi yɛ Nyankopɔn no kõ a ɔdze bɛsɛɛ Satan no wiadze yi na ɔdze eeyi emumuyɛsɛm nyina efi hɔ.

Tsir 3, nky. 13; Tsir 8, nky. 18

 11 NYANKOPƆN N’AHENDZI NO

Nyankopɔn n’Ahendzi no yɛ aban a Jehovah ahyehyɛ wɔ sor. Jesus Christ na oridzi tum wɔ do dɛ Ɔhen. Daakye, Jehovah nam Ahendzi no do beyi emumuyɛsɛm nyina efi hɔ. Nyankopɔn n’Ahendzi no bedzi asaase nyina do tum.

Tsir 3, nky. 14

12 JESUS CHRIST

Nyankopɔn bɔɔ Jesus ansaana ɔrobɔ biribi fofor biara. Jehovah somaa Jesus baa asaase do dɛ ombowu mma nyimpa nyina. Aber a wokum Jesus no, Nyankopɔn nyaan no. Seseiara, Jesus ridzi tum wɔ sor dɛ Nyankopɔn n’Ahendzi no do Hen.

Tsir 4, nky. 2

13 NKƆNHYƐ A ƆFA ADAPƐN 70 NO HO

Bible no hyɛɛ ber a Messiah no bɛba ho nkɔm too hɔ. Nna iyi bɛba mu wɔ ber pɔtsee bi a ɔyɛ adapɛn 69 n’ewiei. Dɛm ber yi hyɛɛ ase wɔ afe 455 A.H.B. na ɔbaa ewiei wɔ afe 29 H.B.

Yesi dɛn hu dɛ ɔbaa ewiei wɔ afe 29 H.B.? Adapɛn 69 no hyɛɛ ase wɔ afe 455 A.H.B. ber a Nehemiah dur Jerusalem na ɔhyɛɛ ase dɛ ɔrekyekyer kurow no bio no. (Daniel 9:25; Nehemiah 2:1, 5-8) Sɛ yɛkã dapɛn a, dza ɔba hɛn adwen mu nye ndaesuon. Adapɛn a ɔwɔ dɛm nkɔnhyɛ yi mu no nnyɛ adapɛn a no mu biara yɛ ndafua esuon, na mbom ɔyɛ adapɛn a no mu biara yɛ mfrenhyia esuon. Iyi nye nkɔnhyɛsɛm a ɔkyerɛ dɛ, “da kor nye afe kor” no hyia. (Nkanee 14:34; Ezekiel 4:6) Iyi kyerɛ dɛ, dapɛn biara ne tsentsen yɛ mfrenhyia esuon. Dɛm ntsi, adapɛn 69 no ne tsentsen bɛyɛ mfrenhyia 483 (69 x 7). Sɛ yɛkan mfrenhyia 483 fi afe 455 A.H.B. a, ɔdze hɛn bɛba ebesi afe 29 H.B. Dɛm afe yi mu ara pɛpɛɛpɛr na wonumaa Jesus ma ɔbɛyɛɛ Messiah no!​—Luke 3:1, 2, 21, 22.

 Nkɔnhyɛ kor noara sanee kãa dapɛn fofor bi ho asɛm a ɔno so ne tsentsen yɛ mfrenhyia esuon. Dɛm ber yi mu wɔ afe 33 H.B. no, nna woboku Messiah no. Afei, ofi afe 36 H.B. no, nna nnyɛ Jewfo nkotsee na wɔbɛkã Nyankopɔn n’Ahendzi no ho asɛm akyerɛ hɔn, na mbom amanaman nyina.​—Daniel 9:24-27.

Tsir 4, nky. 7

 14 BAASAKOR NKYERƐKYERƐ NO YƐ ATOR

Bible no kyerɛkyerɛ dɛ, Jehovah Nyankopɔn nye Ɔbɔadze no, na ɔbɔɔ Jesus ansaana ɔrobɔ ndzɛmba afofor nyina. (Colossaefo 1:15, 16) Jesus nnyɛ adze nyina do Tumfo Nyankopɔn no. Ɔannkã da dɛ ɔnye Nyankopɔn yɛ pɛr. Nokwasɛm nye dɛ, ɔnoara kãa dɛ: “Egya no sõ sen me.” (John 14:28; 1 Corinthfo 15:28) Naaso, ɔsom ahorow binom kyerɛkyerɛ dɛ, Nyankopɔn yɛ Baasakor: Egya no, Ɔba no nye sunsum krɔnkrɔn no. Kasafua “Baasakor” no nnyi Bible no mu mpo. Ɔyɛ ator nkyerɛkyerɛ.

Sunsum krɔnkrɔn no yɛ Nyankopɔn n’adzeyɛ tum, kyerɛ dɛ, no tum a enyiwa nnhu a ɔdze dzi dwuma ma ne pɛ yɛ hɔ. Sunsum krɔnkrɔn no nnyɛ nyimpa. Dɛ nhwɛdo no, “Sunsum Krɔnkrɔn bɛhyɛɛ” tsetse Christianfo no “amaama,” na Jehovah kãa dɛ: “Mubohue mo Sunsum egu honam nyina do.”​—Ndwuma 2:1-4, 17.

Tsir 4, nky. 12; Tsir 15, nky. 17

15 MBEAMUDUA

Nokwar Christianfo mmfa mbeamudua nndzi dwuma wɔ Nyankopɔn som mu. Ebɛnadze ntsi a?

  1.  Wɔdze mbeamudua edzi dwuma wɔ ator som mu ber tsentsenntsen. Tsetseber mu no, nna hɔn a wɔsom abɔdze dze dzi dwuma wɔ hɔn som mu. Afei so, nna abosonsɔrfo dze dzi dwuma wɔ banyin na basia nda mu a ɔkã hɔn som mu afahyɛ amandze ho. Mfrenhyia 300 a odzi kan wɔ Jesus no wu ekyir no, nna Christianfo mmfa mbeamudua nndzi dwuma wɔ hɔn som mu. Naaso, mfe pii ekyir no, Rome Ɔhempɔn Constantine maa mbeamudua bɛyɛɛ Christianfo ahyɛnsewdze. Wɔdze ahyɛnsewdze yi dzii dwuma dɛ wɔdze robɔ mbɔdzen ama Christiansom agye dzin. Naaso, nna mbeamudua nye Jesus Christ nnyi hwee yɛ. New Catholic Encyclopedia no kã dɛ: “Nna wɔdze mbeamudua dzi dwuma ansaana Christiansom reba. Afei so, nna hɔn a wɔnnyɛ Christianfo dze dzi dwuma.”

  2.    Jesus ennwu wɔ mbeamudua do. Greek kasafua a wɔkyerɛɛ ase “mbeamudua” no, dza ɔkyerɛ ankasa nye “dua a wɔdze esi hɔ,” anaa “mpuna.” The Companion Bible kã dɛ: “Biribiara nnyi Greek kasa mu a wɔdze kyerɛɛw [Ahyɛmu Fofor] no a ɔkyerɛ ndua ebien a wɔdze abea mu.” Ntsi, ɔnnyɛ mbeamudua do na wɔsɛɛn Jesus, mbom dua tsentsen kor a wɔdze esi hɔ do.

  3.  Jehovah mmpɛ dɛ yɛdze ehonyi anaa ndzɛmba ho ahyɛnsewdze bedzi dwuma wɔ hɛn som mu.​—Exodus 20:4, 5; 1 Corinthfo 10:14.

Tsir 5, nky. 12

16 NKAADZI NO

Jesus hyɛɛ n’esuafo no dɛ, wɔnhyɛ no wu Nkaadzi no ho fa. Wɔhyɛ dɛm fa yi afe biara wɔ Nisan 14. Iyi nye da a nna Israelfo no dzi Apaho afahyɛ no. Wɔdze paanoo na wenyin a ogyina hɔ ma Jesus no honam nye no bɔgyaa no fa obiara enyim wɔ Nkaadzi no ase. Hɔn a wɔnye Jesus bɔbɔ mu edzi tum wɔ sor no na wodzi paanoo no na wɔnom wenyin no bi. Hɔn a wɔwɔ enyidado dɛ wɔbɛtsena ase daa wɔ asaase do no fi obu mu kɔ Nkaadzi no bi, naaso wonndzi paanoo no anaa wɔnnom wenyin no bi.

Tsir 5, nky. 21

17 ƆKRA

Wɔdze kasafua “ɔkra” dzi dwuma wɔ New World Translation Borɔfo Bible no mu dze kyerɛ (1) nyimpa, (2) abowa anaa (3) nyimpa anaa abowa no nkwa. Nhwɛdo ahorow bi nye yi:

  • Nyimpa. “Wɔ Noah nda no . . . akra kakra, mekyerɛ baawɔtwe, nyaa nkwa wɔ nsu no mu.” (1 Peter 3:20) Kasafua “akra” a wɔdze dzii dwuma wɔ ha no kyerɛ nyimpa​—Noah na ne yer, hɔn mba baasa no nye hɔn yernom.

  •  Abowa. “Nyankopɔn see dɛ, Nsu no ndɔ mbowa [“akra,” NWT, ase hɔ asɛm] a wɔkeka hɔnho a nkwa wɔ hɔn mu menyamenya na ntumbowa nkyin asaase do wɔ ɔsor wienyi. Na Nyankopɔn see dɛ, Asaase nwo mbowa a nkwa wɔ hɔn mu [“akra,” NWT, ase hɔ asɛm] dɛ mbrɛ hɔn su tsetsee, ofiembowa, nye nketsebowa, nye asaase mbowadoma dɛ mbrɛ hɔn su tsetsee: na ɔyɛɛ dɛm.”​—Genesis 1:20, 24.

  • Nyimpa anaa abowa no nkwa. Jehovah kãa kyerɛɛ Moses dɛ: “Nyimpa a wɔhwehwɛ wo nkwa no [“wɔhwehwɛ wo kra,” NWT, ase hɔ asɛm] nyinara ewuwu.” (Exodus 4:19) Ber a nna Jesus wɔ asaase do no, ɔkãa dɛ: “Emi nye oguanhwɛfo pa no: oguanhwɛfo pa no dze no nkwa [“ne kra,” NWT, ase hɔ asɛm] to hɔ ma nguan no.”​—John 10:11.

    Afei so, sɛ obi fi ne “kra nyina mu” yɛ biribi a, ɔkyerɛ dɛ ofi ne pɛ nye dza ɔwɔ nyinara mu yɛe. (Matthew 22:37; Deuteronomy 6:5) Nkyii so, wobotum dze kasafua “ɔkra” akyerɛ akɔndɔ a abɔdze bi wɔ anaa tumfor a ɔyɛ. Wobotum afrɛ obi a oewu anaa fun dɛ ɔkra a oewu.​—Nkanee 6:6; Mbɛbusɛm 23:2; Isaiah 56:11; Haggai 2:13 (NWT, ase hɔ nsɛm.)

Tsir 6, nky. 5; Tsir 15, nky. 17

18 SUNSUM

Hebrew na Greek nkasafua a wɔkyerɛɛ ase “sunsum” wɔ New World Translation Borɔfo Bible no mu no botum akyerɛ ndzɛmba ahorow pii. Naaso mpɛn pii no, wɔdze kyerɛ biribi a nyimpa n’enyiwa nnkotum ehu tse dɛ, mframa anaa nyimpa nye mbowa hɔn ahom. Dɛm nkasafua yi so botum akyerɛ esunsum abɔdze nye sunsum krɔnkrɔn no a ɔyɛ Nyankopɔn n’adzeyɛ tum no. Bible no nnkã dɛ, biribi hyɛ nyimpa mu a ɔkɔ do tsena ase wɔ nyimpa no wu ekyir.​—Exodus 35:21; Ndwom 104:29; Matthew 12:43; Luke 11:13.

Tsir 6, nky. 5; Tsir 15, nky. 17

 19 GEHENNA

Nna Gehenna yɛ bɔnsa bi a ɔbɛn Jerusalem a wɔhyew nwura nye ndzɛmba fun wɔ hɔ. Dase biara nnyi hɔ a ɔkyerɛ dɛ, wɔ Jesus n’aber do no, nna wɔyɛ mbowa anaa nyimpa a wonnwui ayaayaadze anaa wɔhyew hɔn wɔ dɛm bɔnsa yi mu. Ntsi, Gehenna nngyina hɔ mma beebi a enyiwa nnhu a wɔyɛ nyimpa a woewuwu no ayaayaadze na wɔhyew hɔn daa wɔ hɔ. Ber a Jesus kãa hɔn a wɔbɔtow hɔn egu Gehenna ho asɛm no, nna ɔsɛɛ pasaa ho asɛm na ɔrekã.​—Matthew 5:22; 10:28.

Tsir 7, nky. 20

20 HƐN EGYA A ƆWƆ SOR MPAABƆ

Iyi nye mpaa a Jesus kyerɛɛ n’esuafo no ber a nna ɔrekyerɛ hɔn mbrɛ wɔmbɔ mpaa no. Wɔsan so frɛ no Ewuradze Mpaabɔ anaa mpaabɔ ho nhwɛdo no. Dɛ nhwɛdo no, Jesus kyerɛɛ hɛn dɛ, yɛmbɔ mpaa wɔ dɛm kwan yi do dɛ:

  • “Wo dzin ho ntsew”

    Yɛbɔ mpaa dɛ, Jehovah ntsew ne dzin ho wɔ atorsɛm biara a wɔakã afa no ho. Iyi tse dɛm mbrɛ ɔbɛyɛ a, obiara a ɔwɔ sor anaa asaase do no dze obu nye enyidzi bɛma Nyankopɔn ne dzin no.

  • “W’ahendzi mbra”

    Yɛbɔ mpaa dɛ, Nyankopɔn n’Ahendzi no nsɛɛ Satan wiadze yi, ondzi asaase do tum na ɔnyɛ asaase no paradise.

  • “Wɔnyɛ wo pɛ wɔ asaase do”

    Yɛbɔ mpaa dɛ, Nyankopɔn no botae nyɛ hɔ mbrɛ ɔbɛyɛ a nyimpa asomberɛwfo a wodzi mu botum atsena ase daa wɔ Paradise, dɛ mbrɛ nna Jehovah pɛ dɛ ɔyɛ ber a ɔbɔɔ nyimpa no.

Tsir 8, nky. 2

 21 WERDAM NO

Jehovah na ɔdze werdam no mae mbrɛ ɔbɛyɛ a ɔbɛgye nyimpa efi bɔn nye owu mu. Nna werdam no yɛ bo a ɔsɛ dɛ wotua dze gye nkwa a odzi mu a nyimpa a odzi kan, Adam hweree no, na wɔdze siesie ebusuabɔ a nyimpa nye Nyankopɔn wɔ a ɔasɛɛ no. Nyankopɔn somaa Jesus baa asaase do mbrɛ ɔbɛyɛ a obowu ama ndzebɔnyɛfo nyina. Osian Jesus no wu no ntsi, nyimpa nyina wɔ hokwan dɛ wɔtsena ase daa na wɔyɛ nyimpa a wodzi mu.

Tsir 8, nky. 21; Tsir. 9, nky. 13

22 EBƐNADZE NTSI NA AFE 1914 YƐ AFE TSITSIR?

Nkɔnhyɛ a ɔwɔ Daniel tsir 4 no ma yehu dɛ, Nyankopɔn dze n’Ahendzi no besi hɔ wɔ afe 1914.

Nkɔnhyɛ no: Jehovah maa Ɔhen Nebuchadnezzar soo daa a ɔyɛ nkɔnhyɛ a ɔfa dua kɛse bi a nna ɔsɛ dɛ wotwa to famu ho. Adaaso no mu no, nna wɔdze dadze na boran bɛkyekyer dua no no ndwow dusin mbrɛ ɔbɛyɛ a ɔnnkɛfefɛw kesi dɛ mber esuon botwa mu. Iyi ekyir no, dua no bɛsan afefɛw bio.​—Daniel 4:1, 10-16.

Dza nkɔnhyɛ no kyerɛ ma hɛn: Dua no gyina hɔ ma Nyankopɔn no tumdzi. Mfe pii a abɛsen kɔ no, ahemfo a nna wɔwɔ Jerusalem no tsenaa Jehovah n’egua do dzii Israelman no do tum. (1 Mbermunsɛm 29:23) Naaso, dɛm ahemfo no enndzi nokwar ennkesi ewiei, ntsi hɔn tumdzi no baa ewiei. Wɔsɛɛ Jerusalem wɔ afe 607 A.H.B. Dɛm ber no na “mber esuon” no hyɛɛ ase. (2 Ahemfo 25:1, 8-10; Ezekiel 21:25-27) Ber a Jesus kãa dɛ, “amanamamfo betsiatsia Jerusalem do ekodu dɛ amanaman aber no bɔsõ” no, nna “mber esuon” no ho asɛm na ɔrekã. (Luke 21:24) Ntsi, “mber esuon” no ammba ewiei ber a nna Jesus wɔ asaase do no. Jehovah bɔɔ anohoba dɛ, ɔbɛpaw Ɔhen wɔ “mber esuon” no ewiei. Ɔhen fofor yi, Jesus, no  tumdzi no dze nhyira pii a ɔtsena hɔ daa bɛbrɛ Nyankopɔn no nkorɔfo a wɔwɔ asaase nyinara do no.​—Luke 1:30-33.

“Mber esuon” no ne tsentsen: “Mber esuon” no ne tsentsen yɛ mfe 2,520. Sɛ yɛkan mfe 2,520 fi afe 607 A.H.B. a, ɔdze hɛn besi afe 1914. Dɛm afe yi mu na Jehovah yɛɛ Jesus a ɔyɛ Messiah no Ɔhen wɔ Nyankopɔn n’Ahendzi no do wɔ sor.

Yesi dɛn nya mfe 2,520 no? Bible no kã dɛ, mber ebiasa na fã ne tsentsen yɛ ndafua 1,260. (Nyikyerɛ 12:6, 14) Ntsi, “mber esuon” yɛ ndafua 1,260 no mbɔho ebien anaa ndafua 2,520. Osian nkɔnhyɛ asɛm a ɔkã dɛ, “da kor nye afe kor” ntsi, ndafua 2,520 no ne tsentsen yɛ mfrenhyia 2,520.​—Nkanee 14:34; Ezekiel 4:6.

Tsir 8, nky. 23

23 BƆFOPANYIN MICHAEL

Kasafua “bɔfopanyin” no kyerɛ dɛ, “abɔfo nyina hɔn hen.” Bible no mu no, bɔfopanyin kor pɛr na wɔkã no ho asɛm, ɔno nye Michael.​—Daniel 12:1; Jude 9.

Nyankopɔn n’abɔfodɔm anokwafo no, Michael nye hɔn Panyin. Nyikyerɛ 12:7 kã dɛ: “Michael nye n’abɔfoe . . . na dragon nye n’abɔfoe no wɔkoẽ.” Nyikyerɛ nwoma no ma yehu dɛ, Jesus nye Nyankopɔn n’abɔfodɔm no do Panyin. Ntsi, Michael yɛ dzin fofor a wɔdze frɛ Jesus.​—Nyikyerɛ 19:14-16.

Tsir 9, nky. 4

24 NDA A ODZI EKYIR NO

Dɛm asɛm yi kyerɛ ber a nsɛm etsitsir besisi wɔ asaase do wɔ ber a ɔaka kakra ma Nyankopɔn n’Ahendzi no aasɛɛ Satan no wiadze yi. Wɔsan dze nsɛm bi tse dɛ, “wiadze ewiei” nye “nyimpa Ba ne ba,” dzi dwuma wɔ Bible no mu dze kyerɛ dɛm ber kor yi ara. (Matthew 24:3, 27, 37) “Nda a odzi ekyir no” hyɛɛ ase wɔ afe 1914 ber a  Nyankopɔn n’Ahendzi no hyɛɛ ase dzii tum wɔ sor no, na ɔbɛba ewiei wɔ Har-Magedon ber a wɔasɛɛ Satan no wiadze yi.​—2 Timothy 3:1; 2 Peter 3:3.

Tsir 9, nky. 5

25 OWUSOƐR

Sɛ wɔkã owusoɛr a, ɔyɛ ber a Nyankopɔn enyan obi a oewu aba nkwa mu bio no. Owusoɛr nkorkor akron na wɔayɛ ho kyerɛwtohɔ wɔ Bible no mu. Elijah, Elisha, Jesus, Peter, nye Paul nyina nyaan ewufo. Ɔda edzi dɛ, Nyankopɔn no tum na ɔboaa nyimpa yi ma wɔyɛɛ anwanwadze ahorow yi nyina. Jehovah abɔ anohoba dɛ, obenyan “hɔn a wɔtsen nye hɔn a wɔnntsen” nyina aba nkwa mu bio wɔ asaase do. (Ndwuma 24:15) Bio so, Bible no kã dɛ wobenyan nyimpa binom akɔ sor. Iyi yɛ ber a wobenyan hɔn a Nyankopɔn apaw hɔn, anaa ɔasera hɔn, no ma wɔnye Jesus akɛtsena sor no.​—John 5:28, 29; 11:25; Philippifo 3:11; Nyikyerɛ 20:5, 6.

Tsir 9, nky. 13

26 ESUMANSƐM

Esumansɛm nye dɛ, obi nye esunsum bedzi nkitaho, dɛ ɔyɛ tsenn anaa obodua obi tse dɛ nkongyaayinyi anaa ɔkɔmfo do. Nkorɔfo dze hɔnho hyɛ esumansɛm mu osiandɛ wɔgye ator nkyerɛkyerɛ a ɔnye dɛ, sɛ nyimpa wu a no sunsum kɔ do tsena ase dɛ saman a ɔwɔ tum no dzi. Bio so, abɔfo bɔn no anaa esunsum fĩ no bɔ mbɔdzen dɛ wɔbɛma nyimpa ayɛ Nyankopɔn do asoɔdzen. Nworaba mu hwɛ, ebisa, nkongyaayi, abayidze, gyedzihun nye abosonkɔm nyina kã esumansɛm ho. Mbuukuu, magazine ahorow, senẽ, mfonyin nye ndwom ahorow bi mpo ma ɔyɛ dɛ gyama esian biara nnyi nkongyaayi, esumansɛm, nye abɔfo bɔn a yɛnye hɔn bedzi nkitaho no mu. Eyiyɛ ho amandze ahorow bi tse dɛ, afɔr a wɔbɔ ma ewufo, eyiyɛ ho afahyɛ ahorow, kunayɛ ho amandze ahorow nye epesi ho  amandze ahorow nyina kã nkitaho a wɔnye abɔfo bɔn no bedzi no ho. Nkorɔfo taa nom ndubɔn ber a wɔrobɔ mbɔdzen dɛ wɔdze tum a ofi esunsum fĩ hɔ bedzi dwuma no.​—Galatiafo 5:20; Nyikyerɛ 21:8.

Tsir 10, nky. 10; Tsir 16, nky. 4

27 JEHOVAH NO TUMDZI

Jehovah nye adze nyina do Tumfo Nyankopɔn, na ɔno na ɔbɔɔ wiadze nye no mu ndzɛmba nyinara. (Nyikyerɛ 15:3) Osiandɛ ɔyɛ adze nyina Wura ntsi, ɔwɔ tum dɛ odzi n’abɔdze nyina do. (Ndwom 24:1; Isaiah 40:21-23; Nyikyerɛ 4:11) Ɔahyɛ mbra ama n’abɔdze nyina. Jehovah noara so na ɔwɔ tum dɛ ɔpaw ahemfo. Sɛ yɛda ɔdɔ na obu edzi kyerɛ Nyankopɔn a, yɛdze da no edzi dɛ yɛtaa no tumdzi no ekyir.​—1 Mbermunsɛm 29:11.

Tsir 11, nky. 10

28 NYINSEN-TUGU

Nyinsen-tugu yɛ hyɛ a wɔhyɛ da kum abofra a ɔhyɛ yafun mu. Ɔnnyɛ akwanhyia anaa biribi a osi ber a nyimpadua no reyɛ n’edwuma yie no. Sɛ ɔbaa bi nya fa yafun a, abofra no nnyɛ ne nã no honam fã bi kɛkɛ. Mbom no, abofra no no nkwa yɛ soronko fi ne nã nedze ho.

Tsir 13, nky. 5

29 BƆGYA A WƆDZE DZI DWUMA WƆ AYARSA MU

Iyi yɛ eduyɛ a wɔdze bɔgya, ndzɛmba etsitsir anan a ɔbɔ mu yɛ bɔgya no mu kor anaa obi no bɔgyaa a wɔatwe esi hɔ dadaw dzi dwuma wɔ mu. Bio so, wotum twe obi nankasa no bɔgyaa si hɔ na ekyir yi, wɔaasan dze ama no. Ndzɛmba etsitsir anan a ɔbɔ mu yɛ bɔgya no nye, bɔgya mu nsu, bɔgya mu nkwambowa kɔkɔɔ, bɔgya mu nkwambowa fitaa nye bɔgya mu nkwambowa tɛtɛrba.

Tsir 13, nky. 13

 30 NTSẼA

Bible no mu no, asotwe nnyɛ kasafua fofor a ɔkyerɛ “ntsẽa.” Sɛ wɔtsẽa hɛn a, ɔma yenya ntsetsee, nkyerɛkyerɛ nye nkaenyim a ɔbɛtsen hɛn ma yaayɛ nyimpa pa. Jehovah nntsẽa nyimpa wɔ etsirmɔdzen kwan do. (Mbɛbusɛm 4:1, 2) Jehovah ayɛ ntsẽa ho nhwɛdo a odzi mu ama awofo. Kwan a ɔfa do dze ntsẽa ma no dzi mu papaapa. Iyi tum ma obi enyi bɛgye ntsẽa ho. (Mbɛbusɛm 12:1) Jehovah dɔ n’asomfo, na ɔtsetse hɔn. Ɔma hɔn ntsetsee a otum sesã hɔn nsusui bɔn biara, na iyi boa hɔn ma wohu mbrɛ wobotum esusu ndzɛmba ho yie, na wɔaayɛ hɔn adze wɔ ɔkwan a ɔsɔ Nyankopɔn n’enyi do. Wɔ awofo afamu no, boa a wɔbɔboa hɔn mba ma woeehu siantsir a ɔsɛ dɛ wɔyɛ setsie no kã ntsẽa ho. Bio so, kyerɛ a wɔbɛkyerɛkyerɛ hɔn ma wɔaadɔ Jehovah na wɔaatse ngyinadonsɛm a ɔwɔ n’Asɛm Bible no mu no ase, na wɔdze eedzi dwuma no kã ntsẽa a ɔsɛ dɛ wɔdze ma hɔn mba no ho.

Tsir 14, nky. 13

31 MBƆNSAM ANAA ESUNSUM FĨ

Wɔyɛ esunsum abɔdze a yenntum mmfa hɛn enyiwa nnhu hɔn, na hɔn ahoɔdzen so bor nyimpa dze do koraa. Mbɔnsam anaa esunsum fĩ no yɛ abɔfo bɔn. Wɔbɛyɛɛ abɔfo bɔn ber a wɔannyɛ setsie amma Nyankopɔn no. Iyi maa wɔbɛyɛɛ Nyankopɔn n’atamfo. (Genesis 6:2; Jude 6) Wɔkɛkãa Satan ho ma wɔtseew Jehovah no do etũa.​—Deuteronomy 32:17; Luke 8:30; Ndwuma 16:16; James 2:19.

Tsir 16, nky. 4