Kɔ no mu nsɛm no do

Kɔ no mu nsɛm a wɔahyehyɛ no do

 ESUADZE 27

Ebɛn Mfaso na Yenya Fi Ahendzi Asa Nwomakorabea no Do?

Ebɛn Mfaso na Yenya Fi Ahendzi Asa Nwomakorabea no Do?

Israel

Czech Republic

Benin

Cayman Islands

Ana ebɛpɛ dɛ eyɛ nhwehwɛmu bi dze ma wo Bible mu nyimdzee nya nkɔenyim anaa? Ana wo ho per wo dɛ ibohu kyerɛwsɛm, onyimpa, beebi anaa adze bi a wɔakã ho asɛm wɔ Bible mu no yie? Anaa adwen ho pɛn dɛ ibia Nyankopɔn Asɛm botum aboa wo ma eenya wo haw ano edur? Sɛ dɛm dze a, kɛyɛ nhwehwɛmu wɔ Ahendzi Asa nwomakorabea hɔ.

Hɔ na yenya ndwindadze a yɛdze yɛ nhwehwɛmu. Obotum aba dɛ nnyɛ Bible ho nwoma a Jehovah Adasefo ayɛ a ɔwɔ wo kasaa mu no nyinara na ewɔ bi. Naaso wɔ Ahendzi Asa nwomakorabea hɔ no, nwoma ahorow a woetsintsim no ndaansa yi ara no bi wɔ hɔ. Ibia ibotum enya Bible nkyerɛase ahorow, nkasafua nkyerɛase nwoma a odzi mu, anaa nhwehwɛmu nwoma afofor so wɔ hɔ. Ibotum akɛyɛ nhwehwɛmu wɔ nwomakorabea hɔ ansaana wɔaahyɛ Christianfo nhyiamu ase anaa aber a wɔapon no. Sɛ kɔmpiwta so wɔ hɔ a, ibia ibotum enya Watchtower Library so wɔ do. Iyi yɛ kɔmpiwta do dwumadzi bi a hɛn asafo nwoma ahorow pii wɔ do. Ɔwɔ ɔfã bi so a ibotum abɔ asɛntsir, kasafua anaa kyerɛwsɛm bi dze ayɛ nhwehwɛmu.

Ɔboa hɔn a wonya dwumadzi wɔ Asɛnka Nye Asetsena Nhyiamu no mu no. Ahendzi Asa do nwomakorabea yi botum aboa wo yie aber a irisiesie wo dwumadzi ahorow no. Asɛnka Nye Asetsena Nhyiamu do hwɛfo no na ɔhwɛ nwomakorabea yi do. Ɔyɛ n’asodzi dɛ ɔbɔhwɛ dɛ nwoma ahorow a wɔaba fofor no bi wɔ hɔ, na ɔhwɛ dɛ wɔahyehyɛ nwoma ahorow no so kama. Ɔno anaa wo Bible kyerɛkyerɛfo no botum aboa wo ma eehu dza epɛ dɛ ehwehwɛ no. Naaso, ɔnnsɛ dɛ wɔfa nwoma biara a ɔwɔ nwomakorabea hɔ no fi Ahendzi Asa no do. Afei so, yɛpɛ dɛ yɛhwɛ nwoma ahorow yi yie na yɛannkyerɛkyerɛw mu.

Bible no kã dɛ sɛ yebohu “Nyame no ho nyimdzee” a, ɔwɔ dɛ yenya ɔpɛ dɛ yɛbɔhwehwɛ “no dɛ akoradze a ohuntsa.” (Mbɛbusɛm 2:1-5) Ahendzi Asa nwomakorabea no botum aboa wo ma aahyɛ ase ahwehwɛ dɛm nyimdzee yi.

  • Ebɛn ndwindadze ahorow a wɔdze yɛ nhwehwɛmu na ibi wɔ Ahendzi Asa nwomakorabea hɔ?

  • Woananom na wobotum aboa wo ma eenya nwomakorabea no do mfaso yie?