Kɔ no mu nsɛm no do

Ibu Bible no Dɛ Ɔyɛ Nwoma Bɛn?

Ibu Bible no Dɛ Ɔyɛ Nwoma Bɛn?

Isusu dɛ ɔyɛ . . .

  • nwoma a wɔdze nyimpa nyansa kɛkɛ akyerɛw?

  • anansesɛm nwoma?

  • Nyankopɔn Asɛm?

 DZA BIBLE NO KYERƐKYERƐ NYE YI

‘Kyerɛwsɛm biara fi Nyankopɔn ahom mu.’2 Timothy 3:16, Nwoma Krɔnkrɔn, Fante Bible.

MFASO A IYI BƐMA ENYA

Asetsena mu nsɛmbisa a ohia no ho mbuae.Mbɛbusɛm 2:1-5.

Akwankyerɛ a odzi mu wɔ w’asetsena mu.Ndwom 119:105.

Ndaamba ho enyidado.Romefo 15:4.

 ASO YEBOTUM AGYE DZA BIBLE NO KYERƐKYERƐ ATO MU?

Nyew, nsɛm ebiasa a odzidzi do yi bɔboa hɛn:

  • Bible no mu nsɛm hyia pɛpɛɛpɛr ma ɔyɛ nwanwa. Nyimpa bɛyɛ 40 na wɔkyerɛw Bible no. Wɔdze mfe bɔbor 1,600 kyerɛwee. Akyerɛwfo no mu dodowara anntsena ase wɔ ber kor mu. Naaso, Bible no mu nsɛm hyia pɛpɛɛpɛr na ɔhyɛ Nyankopɔn ne dzin enyimnyam. Nkyii so, ɔkamfo no tumdzi kyerɛ.

  • Bible no mu abakɔsɛm yɛ nokwar. Mpɛn pii no, wiadze yi mu abakɔsɛm akyerɛwfo nnka hɔn man nkõgudzi ho asɛm. Dza ɔnye iyi bɔ ebira no, Bible akyerɛwfo annyɛ dɛm. Wɔkãa hɔn sintɔ nye hɔn man nkõgudzi ho asɛm.2 Mbermunsɛm 36:15, 16; Ndwom 51:1-4.

  • Bible no mu nkɔnhyɛ ba mu aber nyina. Nna Bible akã ato hɔ bɛyɛ mfe 200 dɛ tsetse kurow Babylon no bɔbɔ. Na iyi baa mu pɛpɛɛpɛr. (Isaiah 13:17-22) Bible no kyerɛɛ mbrɛ Babylon kurow no bodua abɔ. Na mpo ɔbɔɔ ɔsahen a ɔbɛma kurow no abɔ no dzin—Cyrus!Isaiah 45:1-3.

    Bible mu nkɔnhyɛ afofor pii so aba mu pɛpɛɛpɛr. Dɛm pɛpɛɛpɛr na yɛhwɛ kwan dɛ asɛm a ofi Nyankopɔn hɔ no bɛyɛ.2 Peter 1:21.

 SUSU ASƐMBISA YI HO

Ɔkwan bɛn do na Nyankopɔn Asɛm botum aboa wo wɔ w’asetsena mu?

Bible no dze asɛmbisa yi ho mbuae ma wɔ ISAIAH 48:17, 18 nye 2 TIMOTHY 3:16, 17.