Kɔ no mu nsɛm no do

Kɔ no mu nsɛm a wɔahyehyɛ no do

 ESUADZE 6

Ebɛn Enyidado na Ɔwɔ Hɔ ma Ewufo?

Ebɛn Enyidado na Ɔwɔ Hɔ ma Ewufo?

1. Ebɛn asɛmpa na ɔwɔ hɔ a ɔfa ewufo ho?

Ber a Jesus dur Bethany a ɔbɛn Jerusalem no, nna ne nyɛnko Lazarus ewu ma oedzi ndaanan. Jesus na nyia oewu no ne nkyerɛbaa, Martha na Mary, kɔr beebi a nna woesie fun no. Annkyɛr na nyimpadɔm twaa hɔ hyiae. Twa ho mfonyin wɔ w’adwen mu hwɛ, enyigye a Martha na Mary nyae ber a Jesus nyaan Lazarus fii ewufo mu no!​—Kenkan John 11:21-24, 38-44.

Nna Martha nyim asɛmpa a ɔwɔ hɔ a ɔfa ewufo ho no dada. Nna onyim dɛ Jehovah benyan ewufo ma wɔaasan abɛtsena asaase do bio.​—Kenkan Job 14:14, 15.

2. Ebɛn tsebea na ewufo wɔ mu?

Nyankopɔn see Adam dɛ: “Huntuma nye wo, na huntuma mu na ebɛsan akɔ.”​—GENESIS 3:19.

Nyankopɔn dze asaase do huntuma bɔɔ nyimpa. (Genesis 2:7; 3:19) Nyimpa nnyɛ sunsum abɔdze a ɔtse honam nyimpadua mu. Osiandɛ yɛyɛ honam abɔdze ntsi, hɛn nyimpadua ne fã biara nnyi hɔ a ɔkɔ do yɛ edwuma ber a yeewu no. Sɛ yewu a, hɛn adwen no so wu na hɛn tsirmu nsɛm yew. Osiandɛ ewufo nnyim biribiara ntsi, Lazarus annkã hwee wɔ tsebea a ɔkɔr mu ber a owui no ho.​—Kenkan Ndwom 146:4; Ɔsɛnkafo 9:5, 6, 10.

Aso Nyankopɔn yɛ nkorɔfo ayaayaadze wɔ ogya mu wɔ hɔn wu ekyir? Osiandɛ Bible no kyerɛkyerɛ dɛ ewufo nnyim biribiara ntsi no, abɔnsamgyamu yɛ ator nkyerɛkyerɛ a ɔma nkorɔfo bɔ Nyankopɔn sombo wɔ dza ɔmmbaa n’adwen mu da no ho. Nkorɔfo a wɔyɛ hɔn ayaayaadze wɔ ogya mu no yɛ ekyiwadze ma no.​—Kenkan Jeremiah 7:31.

Hwɛ video a wɔato dzin Ebɛn Tsebea Na Ewufo Wɔ Mu?

 3. Ana ewufo botum nye atseasefo akasa?

Ewufo nnkotum akasa anaa mpo wɔaatse asɛm. (Ndwom 115:17) Naaso abɔfo no mu binom yɛ abɔfo bɔn. Wotum yɛ hɔn ho tse dɛ nyimpa a woewuwu no na wɔnye nkorɔfo kasa. (2 Peter 2:4) Jehovah kyir koraa dɛ yɛnye ewufo bɛkasa.​—Kenkan Deuteronomy 18:10, 11.

4. Woananom na wobenyan hɔn efi ewufo mu?

Wobenyan nyimpa ɔpepem pii a woewuwu no ma wɔaasan abɛtsena asaase do bio. Wobenyan nyimpa binom mpo a nna wonnyim Nyankopɔn na wɔyɛɛ ndzeyɛbɔn no.​—Kenkan Ndwom 37:29; Ndwuma 24:15.

Hɔn a wobenyan hɔn no benya hokwan esũa Nyankopɔn ho nokwasɛm, na wɔaakyerɛ dɛ wɔwɔ Jesus no mu gyedzi dze nam setsie a wɔbɛyɛ ama no no do. (Nyikyerɛ 20:11-13) Hɔn a wobenyan hɔn aba nkwa mu na wɔbɛyɛ ndzeyɛtsenenee no bɛtsena asaase do daa.​—Kenkan John 5:28, 29.

5. Ebɛnadze na owusoɛr no ma yehu fa Jehovah ho?

Nyankopɔn maa ne Ba no bowui maa hɛn mbrɛ ɔbɛyɛ a ewufo benya enyidado. Ntsi owusoɛr no ma yehu Jehovah no dɔ nye n’adom mbordo. Sɛ wonyan ewufo ba nkwa mu a, woana paa na w’enyi bɛgye ho dɛ ibohu no?​—Kenkan John 3:16; Romefo 6:23.