Kɔ no mu nsɛm no do

Jehovah Adasefo Yɛ Dɛn Tua Hɔn Som Edwuma No Ho Kaw?

Jehovah Adasefo Yɛ Dɛn Tua Hɔn Som Edwuma No Ho Kaw?

Ntoboa ahorow a Jehovah Adasefo fi hɔn pɛ mu yi no nye ɔkwan tsitsir a yɛfa do tua hɛn asɛnka edwuma no ho kaw. Wɔnngyegye kɔlɛhyɛn biara wɔ hɛn nhyiamu ahorow ase, na wɔnnhwɛ kwan dɛ ɔsom no mufo no botua tithe biara so. (Matthew 10:7, 8) Mbom no, wɔdze ntoboa adaka esisi nhyiamu asa ahorow no do, na ama obiara a ɔpɛ dɛ oyi ntoboa no dze aato mu. Naaso wɔnnda hɔn a woyi ntoboa no edzi.

Siantsir kor a yetum dze hɛn sika dzi dwuma yie nye dɛ yennyi asɔfo biara a yetua hɔn kaw. Nkyii so wonntua Adasefo no kaw wɔ efiefi asɛnka edwuma no ho, na yennsisi mbea ahorow a yɛsom no so kuntann.

Wɔdze ntoboa ahorow a wɔdze mona Jehovah Adasefo edwumayɛbea nkorbata ahorow no bi boa mbea ahorow a atoyerɛnkyɛm esisi, wɔdze bi boa asɛmpatserɛwfo nye ahwɛfo akwantufo, wɔdze bi boa sisi mbea ahorow a yɛsom wɔ aman ahorow a worutu mpon do, afei wɔdze bi tsintsim Bible nye Christianfo nwoma ahorow na wɔdze mona.

Nyimpa biara si ne gyinae dɛ obeyi ntoboa dze aboa etua n’asafo no mu kaw ahorow, wiadze nyina edwuma no ho kaw, anaa n’ebien nyinara. Ofi ber to ber no, asafo biara dze hɔn sikasɛm ho amandzɛɛbɔ ma n’asafo no mufo no.