Kɔ no mu nsɛm no do

Ebɛnadze Na Jehovah Adasefo Gye Dzi?

Ebɛnadze Na Jehovah Adasefo Gye Dzi?

Dɛ Jehovah Adasefo no, yɛbɔ mbɔdzen dɛ yebedzi Christiansom a Jesus bɛkyerɛkyerɛe na n’asomafo no dzii ekyir no ekyir. Hɛn gyedzi etsitsir ahorow no na woetwa no tsia wɔ ase ha yi.

  1. Nyankopɔn. Yɛsom nokwar Nyankopɔn kor no, Adze Nyina do Tumfo a ɔyɛ Ɔbɔadze no, nyia ne dzin dze Jehovah no. (Ndwom 83:18; Nyikyerɛ 4:​11) Ɔno nye Abraham Nyankopɔn, Moses Nyankopɔn, nye Jesus Nyankopɔn.​—Exodus 3:6; 32:11; John 20:17.

  2. Bible. Yebu Bible no dɛ ɔyɛ Nyankopɔn ne nkrasɛm a ofi n’ahom mu a ɔdze ama nyimpa. (John 17:17; 2 Timothy 3:​16) Yɛdze hɛn gyedzi ahorow no gyina Bible mu nwoma ahorow 66 no nyinara do, a “Ahyɛmu Dadaw” nye “Ahyɛmu Fofor” no nyinara kã ho. Ɔbemfo Jason D. BeDuhn kyerɛkyerɛɛ iyi mu ma ɔfatae aber a ɔkãe dɛ, Jehovah Adasefo dze “hɔn gyedzi nye hɔn ndzeyɛɛ ahorow gyina dza Bible kyerɛkyerɛ ankasa no do a wɔmmfa hɔn nsusui biara nnkã ho.” *

    Ɔwɔ mu dɛ yɛgye Bible mu no nyina dzi dze, naaso ɔnnkyerɛ dɛ yɛnngye nsusui fofor biara nnto mu. Yɛgye to mu dɛ Bible no n’afã ahorow bi wɔ hɔ a ɔyɛ kasakoa, na ɔnnsɛ dɛ yɛfa no dɛ mbrɛ ɔtse noara.​—Nyikyerɛ 1:1.

  3. Jesus. Yedzi Jesus Christ ne nkyerɛkyerɛ nye ne nhwɛdo ekyir, na yedzi no nyi dɛ hɛn Agyenkwa nye Nyankopɔn Ba. (Matthew 20:28; Ndwuma 5:​31) Ntsi, yɛyɛ Christianfo. (Ndwuma 11:26) Naaso, yeebosũa wɔ Bible no mu dɛ Jesus nnyɛ Adze Nyina do Tumfo Nyankopɔn no, na Kyerɛwnsɛm mu ngyinado biara nnyi hɔ a ɔfoa Baasakor nkyerɛkyerɛ no do.​—John 14:28.

  4. Nyankopɔn n’Ahendzi no. Iyi yɛ aban ankasa a ɔwɔ sor, na ɔnnyɛ biribi a ɔwɔ Christianfo akoma mu. Ɔbɛba ebesi nyimpa aban nyinara ananmu, na ɔaama Nyankopɔn ne tsirmpɔw ma asaase yi aayɛ hɔ. (Daniel 2:​44; Matthew 6:​9, 10) Obedzi dwuma ahorow yi ndaansa yi ara, osiandɛ Bible mu nkɔnhyɛ da no edzi dɛ yɛtse “nda a odzi ekyir no mu.”​—2 Timothy 3:​1-5; Matthew 24:​3-​14.

    Jesus yɛ Nyankopɔn n’Ahendzi no do Hen wɔ sor. Ɔhyɛɛ ase dzii hen fi afe 1914.​—Nyikyerɛ 11:15.

  5. Nkwagye. Ɔnam Jesus ne werdam afɔrbɔ no do na yetum nya ɔgye fi bɔn nye owu mu. (Matthew 20:28; Ndwuma 4:​12) Sɛ nyimpa botum enya dɛm afɔrbɔ yi do mfaso a, nnyɛ gyedzi nkotsẽe na ɔsɛ dɛ wonya wɔ Jesus mu, na mbom ɔsɛ dɛ wɔsesã hɔn asetsena kwan na wɔma wonuma hɔn so. (Matthew 28:19, 20; John 3:​16; Ndwuma 3:​19, 20) Obi ndwuma na ɔkyerɛ dɛ ne gyedzi tse ase. (James 2:​24, 26) Naaso, ɔnnyɛ biribi a yɛbɛyɛ ntsi na yebenya nkwagye​—mbom ɔyɛ “Nyankopɔn adom” ntsi.​—Galatiafo 2:​16, 21.

  6. Ɔsor. Jehovah Nyankopɔn, Jesus Christ, nye abɔfo anokwafo no wɔ sunsum atsenae. * (Ndwom 103:19-​21; Ndwuma 7:​55) Wobenyan nyimpa kakraabi​—144,000​—akɔ sor ma wɔnye Jesus ekedzi hen wɔ Ahendzi no mu.​—Daniel 7:​27; 2 Timothy 2:​12; Nyikyerɛ 5:​9, 10; 14:​1, 3.

  7. Asaase. Nyankopɔn bɔɔ asaase no dɛ ɔnyɛ adasamba hɔn fie daapem. (Ndwom 104:5; 115:16; Ɔsɛnkafo 1:4) Nyankopɔn dze apɔwmudzen a odzi mu nye onnyiewiei nkwa wɔ paradise wɔ asaase yi do behyira nyimpa a wɔyɛ setsie.​— Ndwom 37:11, 34.

  8. Bɔn nye amandzehu. Iyinom hyɛɛ ase aber a Nyankopɔn n’abɔfoe no mu kor tseew etũa no. (John 8:​44) Dɛm ɔbɔfo yi a n’etuatsew ekyir no wɔbɛfrɛɛ no “Satan” nye “Abɔnsam” no, daadaa nyimpa awarfo beenu a wodzi kan no ma wɔbɛkãa no ho, na iyi dze nsunsuando bɔn abrɛ hɔn asefo. (Genesis 3:​1-6; Romefo 5:​12) Mbrɛ ɔbɛyɛ ma woeesiesie abrabɔ ho nsɛm a Satan maa ɔsoɛree no, Nyankopɔn ama kwan ma bɔn nye amandzehu akɔ do. Naaso ɔremma iyi nnkɔ do daa.

  9. Owu. Nyimpa a wowu no fi nkwa mu. (Ndwom 146:4; Ɔsɛnkãfo 9:​5, 10) Wɔnnyɛ hɔn ayakayakadze wɔ hellgya anaa abɔnsamgya biara mu.

    Nyankopɔn nam owusoɛr do benyan nyimpa ɔpepepem pii efi owu mu. (Ndwuma 24:15) Naaso, hɔn a hɔn wunyan ekyir no wɔbɔpow dɛ wobosũa Nyankopɔn akwan no, wɔbɛsɛɛ hɔn daa a wonnyi owusoɛr ho enyidado biara.​—Nyikyerɛ 20:14, 15.

  10. Ebusua. Yɛdze Nyankopɔn ne gyinapɛn ma awar a ɔdze sii hɔ ahyɛse no dɛ awar nyɛ nhyehyɛɛ a ɔda ɔbanyin kor pɛr nye basia kor pɛr ntamu no yɛ edwuma, na edwamambɔ nkotsẽe nye dza wotum gyina do gu awar. (Matthew 19:​4-9) Yɛgye to mu kofee dɛ nyansa a ɔwɔ Bible mu no boa mbusua ma osi hɔn yie.​—Ephesusfo 5:22–​6:1.

  11. Hɛn som. Yɛnnsom mbeamudua, mfonyin anaa biribi fofor biara ne sɛso. (Deuteronomy 4:​15-​19; 1 John 5:​21) Ndzɛmba etsitsir a yɛyɛ wɔ hɛn som mu no bi nye:

  12. Hɛn ahyehyɛdze no. Wɔahyehyɛ hɛn ayɛ hɛn asafo ahorow, na mpanyimfo kuw hwɛ asafo biara do. Naaso, mpanyimfo yi nnyɛ asɔfo, na wonntua hɔn kaw. (Matthew 10:8; 23:8) Yenntua tithe, na wɔnngyegye kɔlɛhyɛn biara wɔ hɛn nhyiamu ahorow no ase da. (2 Corinthfo 9:7) Ntoboa ahorow a nyimpa a wɔnnda hɔn edzin edzi yiyi na yɛdze boa hɛn dwumadzi ahorow no.

    Akwankyerɛ Kuw a ɔyɛ kuw ketseaba bi a no mufo no yɛ Christianfo a hɔnho akokwaa no, na wɔdze akwankyerɛ ma Jehovah Adasefo a wɔwɔ wiadze nyina. Iyinom som wɔ hɛn wiadze nyina edwumayɛbea tsir hɔ.​—Matthew 24:45.

  13. Hɛn koryɛ. Hɛn gyedzi ahorow no ma yɛyɛ kor wɔ wiadze yi mu beebiara. (1 Corinthfo 1:​10) Yɛbɔ mbɔdzen so dɛ yɛremma biribiara mmpaapaa hɛn mu, dɛ ɔyɛ kasa a yɛkã, ɔman a yefi mu, sikasɛm tsebea, honam enyihwɛbea, anaa dzibew wɔ asetsena mu no. (Ndwuma 10:34, 35; James 2:4) Naaso ɔmmfa ho dɛ yɛyɛ kor no, obiara tum si nankasa ne gyinae. Ɔdasefo biara sisi gyinae ma ɔnye ne tsibowa a ɔdze Bible atsetse no no hyia.​—Romefo 14:​1-4; Hebrewfo 5:​14.

  14. Hɛn ndzeyɛɛ. Yɛbɔ mbɔdzen da ɔdɔ a pɛsankonya nnyi mu edzi wɔ hɛn ndzeyɛɛ nyina mu. (John 13:34, 35) Yekwetsir ndzeyɛɛ a Nyankopɔn kyir, a bɔgya a wɔdze dzi dwuma ɔkwan bɔn do, dɛ bi a yɛbɛgye anaa yɛbɔtwe ama obi so kã ho. (Ndwuma 15:28, 29; Galatiafo 5:​19-​21) Yɛpɛ asomdwee, na yɛmmfa hɛn ho nnhyehyɛ akodzi mu. (Matthew 5:9; Isaiah 2:4) Yɛkyerɛ obu ma aban a yɛhyɛ n’ase no, na yedzi ne mbra ahorow no do mpɛn dodow a iyi mma yɛnnyɛ asoɔdzen anaa seanntse nntsia Nyankopɔn mbra no.​—Matthew 22:21; Ndwuma 5:​29.

  15. Yɛnye afofor ntamu ebusuabɔ. Jesus hyɛe dɛ: “Dɔ wo nyɛnko dɛ wankasa woho.” Ɔsan so kãa Christianfo ho asɛm dɛ “wommfi wiadze.” (Matthew 22:39; John 17:16) Ntsi yɛbɔ mbɔdzen dɛ ‘yɛbɛyɛ papa ama nyimpa nyina.’ Naaso ne nyina ekyir no, yenngyina ɔfã biara wɔ amansɛm mu, na yekwetsir dɛ yɛnye nyamesom ekuw afofor benya anyɛnkofa pampee. (Galatiafo 6:​10; 2 Corinthfo 6:​14) Naaso, yɛkyerɛ obu ma gyinae ahorow a afofor sisi wɔ dɛm nsɛm yi mu no.​—Romefo 14:12.

Sɛ ewɔ Jehovah Adasefo gyedzi ahorow no ho nsɛmbisa afofor bi wɔ hɔ a, ibotum akenkan hɛn ho nsɛm pii wɔ hɛn Wɛbsaet yi do, enye hɛn edwumayɛbea nkorbata no mu kor edzi nkitaho, akɔ nhyiamu wɔ hɛn Ahendzi Asa a ɔbɛn wo no mu, anaa enye Adasefo a wɔwɔ wo mpɔtamu hɔ no mu kor akasa.

^ nky. 4 Hwɛ Truth in Translation, krataafã 165.

^ nky. 10 Wɔatow abɔfo bɔn no efi sor akyen, ɔwɔ mu dɛ wɔda ho ara wɔ sunsum atsenae dze.​—Nyikyerɛ 12:​7-9.