Kɔ no mu nsɛm no do

Ebɛnadze Ntsi Na Jehovah Adasefo Nngye Bɔgya?

Ebɛnadze Ntsi Na Jehovah Adasefo Nngye Bɔgya?

Ndaadaasɛm a wɔtaa kã

Akɔhwisɛm: Jehovah Adasefo nngye edur anaa eduyɛ nndzi, ntsi wɔnnkɔ adatserfo hɔ.

Nokwasɛm: Yɛhwehwɛ eduyɛ a oye sen biara ma hɛnho nye hɛn mbusua. Sɛ yɛyar a, yɛkɔ adatserfo a hɔnho awea mu wɔ eduyɛ anaa oprehyɛn a wɔmmfa bɔgya nnkã ho nnyɛ no hɔ. Hɛn enyi sɔ nkɔenyim a akɔ do wɔ ayarsa ahorow mu no. Nokwasɛm nye dɛ, eduyɛ a bɔgya nnkã ho a wɔdze boa Adasefo no, sesei dze nyimpa pii rinya do mfaso. Sesei dze, wɔ aman pii do no, ɔyarfo biara botum ekwetsir esian ahorow a ɔwɔ bɔgya a wɔdze ma mu no, a ibi nye yarba a wɔnam bɔgya do dze sãa, haw ahorow a ɔwɔ obi ne bɔgya a ɔnye ɔfofor ne dze nnhyia mu no, nye mfom a nduyɛfo no botum edzi wɔ bɔgyama no mu.

Akɔhwisɛm: Jehovah Adasefo gye dzi dɛ gyedzi na ɔsa obi yarba.

Nokwasɛm: Yɛmmfa hɛn ho nnhyɛ gyedzi ayarsa mu.

Akɔhwisɛm: Eduyɛ a bɔgya nnkã ho no bo yɛ dzen.

Nokwasɛm: Eduyɛ a bɔgya nnkã ho no, no bo wɔ famu. *

Akɔhwisɛm: Jehovah Adasefo pii, a mbofra kã ho, wuwu afe biara osian bɔgya a wɔnngye no ntsi.

Nokwasɛm: Dɛm asɛm yi nnyi ngyinado biara. Dabaa adatserfo yɛ oprehyɛn a ne yɛ yɛ dzen tse dɛ dza wɔyɛ wɔ akoma ho, dompe mu, nye akwaa a wɔsesã, a bɔgya nnkã ho. * Ayarfo a mbofra kã ho, a wɔnngye bɔgya no taa tse apɔw ntsɛm sen hɔn a wɔgye bɔgya no. * Mbrɛ ɔtse biara no, obiara runntum nnsi no pi dɛ ɔyarfo bi bowu osiandɛ ɔanngye bɔgya, anaadɛ ɔbɛtsena ase osiandɛ ɔagye bɔgya no ntsi.

Ebɛnadze ntsi na Jehovah Adasefo nngye bɔgya?

Iyi yɛ ɔsom ho asɛm, na nnyɛ eduyɛ no. Wɔ Bible no mu no, Apam Dadaw nye Apam Fofor no nyinara hyɛ hɛn pefee dɛ yɛntwẽ hɛnho mfi bɔgya ho. (Genesis 9:4; Leviticus 17:10; Deuteronomy 12:23; Ndwuma 15:28, 29) Afei so, Nyankopɔn bu bɔgya no dɛ ogyina hɔ ma nkwa. (Leviticus 17:14) Ntsi, nnyɛ setsie a yɛyɛ ma Nyankopɔn nkotsẽe ntsi na yɛnngye bɔgya, na mbom osian obu a yɛwɔ ma no dɛ hɛn Nkwamafo no so ntsi.

Adwensesã ahorow

Wobotum ayɛ oprehyɛn a ne yɛ yɛ dzen aber a bɔgya nnkã ho

Mber bi a abɛsen kɔ no, nna nduyɛfo pii bu eduyɛ a bɔgya nnkã ho no dɛ, ɔyɛ hũ na esian wɔ mu na ɔtse dɛ ma obi ridzi noho ewu, naaso ndaansa yi dɛm adwen no asesã. Dɛ nhwɛdo no, wɔ afe 2004 mu no, eduyɛ nwomasũa nwoma bi no mu asɛm bi kãe dɛ, “ɔrennkyɛr, akwan ahorow a woesiesie dɛ wɔmfa do nsa Jehovah Adasefo ayarfo yarba no bɛba abɛyɛ ɔkwan a wɔfa do sa obiara yarba.” * Nwoma Heart, Lung and Circulation no mu asɛm bi kãe wɔ afe 2010 mu dɛ “‘ɔnnsɛ dɛ wɔyɛ oprehyɛn a bɔgya nnkã ho ma J W [Jehovah Adasefo] nkotsẽe, na mbom ɔsɛ dɛ nduyɛfo dze dzi dwuma aber biara.”

Ndɛ, adatserfo mpempem pii a wɔwɔ wiadze nyina no yɛ oprehyɛn a ne yɛ yɛ dzen aber a bɔgya nnkã ho, na wɔkora ɔyarfo no no bɔgyaa do mbom. Wotum dze dɛm akwan ahorow yi a wɔfa do sa yarba a bɔgya nnkã ho yi dzi dwuma wɔ aman a worutu mpon mpo mu, na ayarfo pii a wɔnnyɛ Jehovah Adasefo so kã dɛ wɔpɛ.

^ nky. 8 Hwɛ Transfusion and Apheresis Science, Ɔfã 33, No. 3, kr. 349.

^ nky. 10 Hwɛ The Journal of Thoracic and Cardiovascular Surgery, Ɔfã 134, No. 2, nkr. 287-288; Texas Heart Institute Journal, Ɔfã 38, No. 5, kr. 563; Basics of Blood Management, kr. 2; nye Continuing Education in Anaesthesia, Critical Care & Pain, Ɔfã 4, No. 2, kr. 39.

^ nky. 10 Hwɛ The Journal of Thoracic and Cardiovascular Surgery, Ɔfã 89, No. 6, kr. 918; nye Heart, Lung and Circulation, Ɔfã 19, kr. 658.

^ nky. 14 Continuing Education in Anaesthesia, Critical Care & Pain, Ɔfã 4, No. 2, krataafã 39.