Kɔ no mu nsɛm no do

Ebɛnadze Nye Bible Adzesũa?

Ebɛnadze Nye Bible Adzesũa?

Jehovah Adasefo yɛ Bible adzesũa ho nhyehyɛɛ dze bua nsɛmbisa ahorow bi tse dɛ:

  • Woana nye Nyankopɔn?

  • Aso Nyankopɔn dwen mo ho ankasa?

  • Mebɛyɛ dɛn ama m’awar eetu mpon?

  • Mebɛyɛ dɛn enya enyigye wɔ asetsena mu?

Nsɛm a nkorɔfo taa bisa fa hɛn Bible adzesũa ho nhyehyɛɛ no ho mbuae ahorow na odzidzi do yi.

Ɔkwan bɛn do na wɔyɛ adzesũa no? Yɛfa asɛntsir bi tse dɛ “Nyankopɔn” anaa “awar,” nna yɛahwehwɛ kyerɛwnsɛm ahorow a ɔfa dɛm asɛntsir no ho no mu. Aber a yɛdze kyerɛwnsɛm ahorow no yeyɛ ntotoho no, yehu dza Bible mua no kyerɛkyerɛ fa asɛntsir no ho, na ɔno so kyerɛ dɛ yɛma Bible no ankasa kyerɛkyerɛ no ho mu.

Yɛdze nwoma What Does the Bible Really Teach? no dzi dwuma na aaboa ma Bible no sũa aayɛ mberɛw. Dɛm nwoma yi kã dza Bible no kyerɛkyerɛ ankasa fa Nyankopɔn ho, Jesus, hɛn daakye, nye nsɛntsir ahorow pii.

Sɛ wɔnye obi sũa Bible a, otua ahen? Wonntua hwee, na bo biara nnda nwoma no a wɔdze sũa adze no so do.

Adzesũa no gye ber tsentsen ahen? Nyimpa pii yi bɛyɛ dɔnhwer kor si hɔ dapɛn biara nye hɛn sũa Bible no. Naaso yennyi mber tsentsen pɔtsẽe bi a yɛnye obi sũa adze. Wo nhyehyɛɛ anaa w’adagyer na ɔbɛkyerɛ mber tsentsen a yɛnye wo bosũa adze.

Sɛ mekã dɛ wɔnye me mbosũa Bible no a, ebɛn asɛm besi? Sɛ ekã dɛ wɔnye wo mbosũa Bible no a, Jehovah Adasefo no mu kor bɛba abɛsera wo wɔ bea nye ber a oye ma wo. Onyii no dze minitsi kakraabi bɛkyerɛ wo mbrɛ yesi sũa Bible no. Sɛ w’enyi gye ho a, nna aatoa do.

Sɛ mepen do dɛ wɔnye me nsũa Bible no a, aso ɔsɛ dɛ mebɛyɛ Jehovah Adasefo no mu kor a? Daabi. Jehovah Adasefo enyi gye ho paa dɛ wɔdze Bible no bɛkyerɛkyerɛ nkorɔfo, naaso yɛnnhyɛ obiara mma ɔmmbɛyɛ hɛn som no munyi da. Mbom, yefi obu mu da dza Bible no kyerɛkyerɛ edzi, eso yɛgye to mu dɛ obiara wɔ hokwan dɛ ɔpaw dza ɔbɛgye edzi.​—1 Peter 3:15.