Kɔ no mu nsɛm no do

Aso Jehovah Adasefo Yɛ Sumase Kuw?

Aso Jehovah Adasefo Yɛ Sumase Kuw?

Oho, Jehovah Adasefo nnyɛ sumase kuw. Mbom no, yɛyɛ Christianfo a yɛbɔ mbɔdzen dɛ yebedzi Jesus Christ ne nhwɛdo ekyir, na yɛdze ne nkyerɛkyerɛ aabɔ hɛn bra.

Ebɛnadze nye sumase kuw?

Asɛmfua “sumase kuw” no kyerɛ ndzɛmba ahorow pii ma nyimpa ahorow pii. Naaso, susũ nsusũi ahorow ebien bi a nkorɔfo taa nya, nye siantsir a ɔmmfa hɛn ho no ho.

  • Binom susũ dɛ sumase kuw kyerɛ ɔsom bi a wɔaba fofor anaa wɔnngye nnto mu. Jehovah Adasefo mmfaa ɔsom fofor biara mbɔbɔɔ adze. Mbom no, ɔkwan a Christianfo a wodzi kan a wɔayɛ hɔn nhwɛdo nye nkyerɛkyerɛ ho kyerɛwtohɔ wɔ Bible mu no faa do somee no, dɛm kwan no ara na yɛfa do. Yedzi hɔn nhwɛdo no ekyir. (2 Timothy 3:​16, 17) Yɛgye dzi dɛ, sɛ ɔba no ɔsom ho nsɛm mu a, Nwoma Krɔnkrɔn no nkotsẽe na yebotum egyina do akyerɛ dza ɔsɛ dɛ yɛgye to mu.

  • Binom susũ dɛ sumase kuw yɛ nyamesom kuw bi a hɔnho yɛ hu na wɔwɔ nyimpa kwankyerɛfo. Jehovah Adasefo mmbu nyimpa biara dɛ ɔno nye hɔn kandzifo anaa kwankyerɛfo. Mbom no, yɛdze gyinapɛn yi a Jesus dze sii hɔ maa n’ekyirdzifo no yɛ edwuma: ‘ɔbaako nye hom Kwankyerɛfo, ɔnye Christ.’​—Matthew 23:10.

Jehovah Adasefo som no mmbɛn sumase kuw ho beebiara, mbom no hɔn som no dze mfaso brɛ no mufo no nye afofor a wɔwɔ mpɔtamu hɔ so. Dɛ nhwɛdo no, hɛn som edwuma no aboa nyimpa pii ma woedzi suban bɔn ahorow bi a wɔaka hɔn hɔ no do, ibi nye ndubɔn nom nye asabow. Nkyii so, wɔ wiadze mfɛndzanan nyina no, yɛkyerɛ akenkan nye akyerɛw, na iyi aboa nyimpa mpempem pii ma woesũa akenkan nye akyerɛw. Na yɛsan so boa wɔ atoyerɛnkyɛm ber mu. Yɛyɛ edwumadzen dze nya nkantando pa wɔ afofor do dɛ mbrɛ Jesus hyɛɛ n’ekyirdzifo no dɛ wɔnyɛ no ara pɛr.​—Matthew 5:​13-​16.