Nyimpa pii susu dɛ Native Americafo a wɔwɔ United States no tsetse mbea pɔtsee bi wɔ ɔman no ne nkurobaase ahorow mu. Naaso nokwasɛm nye dɛ, hɔn a wɔyɛ Native Americafo hɔn asefo no, hɔn mu ɔha mu nkyekyɛmu 70 tse nkurow akɛse mu. New York yɛ kurow a ɔsõ kyɛn kurow biara wɔ United States. Hɔ na wodzii Native Americafo hɔn afahyɛ bi a wɔato dzin “Gateway to Nations” ofi June 5-7, 2015. a Aber a Jehovah Adasefo binom a wɔwɔ New York tsee dɛ wobedzi dɛm afahyɛ yi no, wɔyɛɛ nhyehyɛɛ ntsɛmara dɛ wɔbɔkɔ ase. Ebɛnadze ntsi a?

Jehovah Adasefo kyerɛ hɔn Christianfo nwoma ahorow no ase kɔ kasa ɔhaha pii mu. Native Americafo hɔn kasaa ahorow tse dɛ Blackfoot, Dakota, Hopi, Mohawk, Navajo, Odawa, nye Plains Cree so kã ho bi. Dɛm ntsi, Adasefo no hyehyɛɛ pon nye trɔk ahorow a ɔyɛ fɛw dze hɔn nwoma ahorow no guguu do wɔ “Gateway to Nations” afahyɛ no ase. Nna krataaba a wɔato dzin You Can Trust the Creator! kã nwoma ahorow no ho.

Bio so, wɔayɛ nsɛm a wɔbɔ tsie nye video wɔ dɛm kasa ahorow yi mu dodowara mu wɔ hɛn wɛbsaet no do. Adasefo a wɔkɔr “Gateway to Nations” afahyɛ no ase no bɔɔ nsɛm a wɔbɔ tsie ahorow yi pii kyerɛɛ ahɔho a wɔpɛ biribi ehu a wɔaba afahyɛ no ase no. Nna dɛm ahɔho yi ahyɛ no nsew dɛ nwoma a wɔada no edzi, ndwom a wɔrobɔ, nye agor afofor a ɔrokɔ do wɔ afahyɛ no ase no mu dodowara yɛ dza ɔwɔ Borɔfo anaa Spanish kasa mu.

Nyimpa pii a wɔkɔr afahyɛ no bi no enyi gyee mbɔdzen a yɛbɔ dze kyerɛ nwoma ase kɔ Native Americafo hɔn kasaa ahorow pii mu no ho. Nnyɛ iyi nko na hɔn enyi gyee ho, na mbom Bible nkyerɛkyerɛ edwuma a yɛyɛ wɔ nkurow nye mbea pɔtsee a Native Americafo tsetsee no so. Ber a ɔbarimba bi a ɔyɛ edwuma wɔ afahyɛ no ase hun edwuma a yɛyɛ no, ɔserɛɛ dɛ yɛnye no mbɛyɛ Bible adzesua. Ɔkãa dɛ, “Medze enyigye hwɛ kwan dɛ hom bɛba abɛsera me, na hom nye me ebosũa Bible no!”

Native Americafo awarfo bi a wɔyɛ mmum baa pon a yɛahyehyɛ hɛn nwoma ahorow wɔ do no mu kor ho. Naaso, Adasefo a wɔwɔ hɔ no enntum annye hɔn enndzi nkɔmbɔ osiandɛ nna wɔnntse mmum kasa. Annkyɛr koraa na Ɔdasefo bi a oesũa mmum kasa bopuei hɔ. Ɔnye awarfo yi dzii nkɔmbɔ bɛyɛ minitsi 30, na ɔkyerɛɛ hɔn beebi a ɔbɛn hɔn a Jehovah Adasefo bɛyɛ hɔn ɔmantɔw ehyiadzi wɔ mmum kasa mu no.

Jehovah Adasefo bɔbor 50 na wɔdze hɔnho hyɛɛ dɛm Bible nkyerɛkyerɛ edwuma yi mu. Ahɔho a wɔbaa mbea ahorow a wɔahyehyɛ hɔn nwoma no wɔ ndaansa afahyɛ yi ase no gyee nwoma bɔbor 150.