Jehovah Adasefo dze New World Translation of the Holy Scriptures no ma obiara a ɔpɛ dɛ ɔkenkan.

Ɔwɔ mu dɛ Bible ho edwumakuw pii ayeyɛ Bible ɔpepepem pii wɔ kasa ahorow pii mu dze, naaso osian ohia nye ɔsom mu nyiyimu ntsi nyimpa pii nnya Bible no wɔ hɔnanakasa hɔn kasaa mu. Iyi ntsi, Jehovah Adasefo kyekyɛ New World Translation no wɔ kasa bɔbor 115 mu a bo biara nnda do.

Susũ nhwɛdo ahorow yi ho hwɛ:

• Rwanda: Silvestre nye Venantie a wɔwɔ mba baanan kyerɛkyerɛ mu dɛ; “Yɛyɛ ehiafo paa, ntsi yenntum anntɔ Bible amma ebusuamunyi biara ennya nankasa ne Bible. Sesei dze, hɛn mu biara wɔ nankasa ne New World Translation Bible no wɔ Kinyarwanda kasa mu, na yɛbɔ mu kenkan Bible no dabiara da.”

  Anglican sɔfo bi a ɔwɔ dɛm man no mu kãa dɛ: “Iyi yɛ Bible bi a mutum kenkan tse ase. Ɔyɛ papa sen Bible afofor a makenkan no nyinara. Jehovah Adasefo kyerɛ nkorɔfo ho enyigye paa!”

• Democratic Republic of the Congo: Asɔrasɔr ahorow bi apow dɛ wɔbɔtɔn Bible no wɔ Lingala kasa mu​—kasa ahorow a odzi akotsen wɔ ɔman yi mu paa no mu kor​—ama Jehovah Adasefo.

  Ntsi ɔnnyɛ nwanwa dɛ, ofitsi aber a woyii New World Translation no edzi wɔ Lingala kasa mu no, Adasefo a wɔwɔ Congo no dze Bible yi edzi dwuma wɔ enyigye mu, na wɔakyekyɛ. Nokwasɛm nye dɛ, New World Translation yi dze enyigye abrɛ nkorɔfo ara ma aber a woyii no edzi wɔ Jehovah Adasefo ehyiadzi bi ase no, aporisifo a nna wɔwɔ agopramado hɔ no kedzii santsen no mu dɛ wɔrekɛgye hɔndze.

• Fiji: Nna Bible a ɔwɔ Fijian kasa mu no bo yɛ dzen ara ma Jehovah Adasefo no dze Borɔfo New World Translation no dzii dwuma mbom. Naaso wɔ afe 2009 mu no, Fijifo no nsa kãa New World Translation of the Christian Greek Scriptures (Ahyɛmu Fofor) no wɔ hɔn kurow mu kasa mu.

  Ɔbarimba bi enyi gyee mbrɛ New World Translation a ɔwɔ Fijian kasa mu no mu da hɔ no ho ara ma ɔserɛɛ dɛ wɔmma no bi. Naaso Adasefo a wɔwɔ no mpɔtamu hɔ no kãa dɛ, ɔsɛ dɛ ɔtweɔn bɛyɛ bosoom kor ana dza wɔakra no ebodu hɔn kurow mu hɔ. Osiandɛ nna no ho per no dɛ obenya nankasa ne Bible ntsi, otwaa kwan bɔbor kilomita 35 (akwansin 22) kehyiaa Ɔdasefo fofor bi a nna ɔwɔ New World Translation no bi a ɔdze bɛma no. Ɔbarimba no kãa dɛ: “Dɛm nkyerɛase yi yɛ papa koraa sen dza yɛtaa dze dzi dwuma no. No mu da hɔ, na ne ntseasee yɛ mberɛw.”

• Malawi: Aber a Davide hyɛɛ ase dɛ ɔnye Jehovah Adasefo rusũa adze no, Baptist asɔr no mufo a wɔwɔ no mpɔtamu hɔ no kɔr ne fie kɛgyee Bible a nna wɔdze ama no no. Ntsi, aber a woyii New World Translation no edzi wɔ Chichewa kasa mu no, nna ɔtse dɛ ma wɔayɛ n’akoma do adze ama no.

  Osiandɛ nna Bible ahorow no bo yɛ dzen wɔ Malawi ntsi, aber a wɔgyee Bible no fii Davide nsamu no, nna ɔrodwen ho dɛ ɔbɛyɛ dɛn enya fofor. Naaso aber a wɔmaa no New World Translation no kor no, ɔkãa dɛ: “Afei dze, menya Bible papa sen dza nna mowɔ no!”

Bɔbor mfirihyia 60 a abɛsen kɔ a woyii New World Translation ne fã a odzi kan no edzi wɔ Borɔfo kasa mu wɔ New York City ehyiadzi bi ase no, wɔhyɛɛ etsiefo no nkuran dɛ: Hom nkenkan mu. Hom nsũa . . . Hom mfa nhyɛ afofor nsa mu.” Mbrɛ ɔbɛyɛ ma Jehovah Adasefo etum ayɛ iyi no, woetsintsim New World Translation no bɔbor ɔpepem 175. Afei so, ibotum akenkan Bible no wɔ kasa bɛyɛ 50 mu wɔ hɛn Wɛbsaet yi do.