Kɔ no mu nsɛm no do

Dwumadzi Bi A Wɔdze Faa Intanɛt Do Kɔr Mbea Ahorow

Dwumadzi Bi A Wɔdze Faa Intanɛt Do Kɔr Mbea Ahorow

Watch Tower Bible and Tract Society of Pennsylvania yɛɛ hɔn afrenhyia nhyiamu a otsĩa 129 wɔ Memenda, October 5, 2013 mu. Nyimpa a hɔn dodow yɛ 257,294 na wofi aman 21 do kɔr dwumadzi no ase anaa wɔhwɛe wɔ Intanɛt do. Da a odzi hɔ no, woyii dwumadzi no dɛ video maa Adasefo afofor hwɛɛ bi. Sɛ wɔka ne nyina bɔ mu a, nna etsiefo no hɔn dodow yɛ 1,413,676, na wofi aman 31 do. Dze besi seseiara a yɛrekasa yi, afrenhyia nhyiamu yi yɛ nhyiamu kɛse a ɔkyɛn biara a Jehovah Adasefo ayɛ, na etsiefo no hɔn dodow no bor etsiefo 1,327,704 a wɔhwɛɛ dwumadzi soronko a wɔyɛe wɔ Mexico nye Central America wɔ April 28, 2013 mu no do.

Ofitsi afe 1920 reba no, Jehovah Adasefo dze ehyiadzi ahorow a wɔyɛ no fa tɛlɛfon nye radio do dze kɔ aman ahorow do ma etsiefo a wɔwɔ hɔ no nya mu kyɛfa. Seseiara dze, abaɛfor Intanɛt adaworom ntsi, etsiefo a wɔwɔ mbea a atsew no ho mpo tum hwɛ dwumadzi ahorow a ɔtsetse dɛm ber a dwumadzi no rokɔ do no anaa ber a woewie dwumadzi no. William yɛ Jehovah Adasefo no mu kor wɔ United States. Afe 1942 mu no, ɔkɔr ehyiadzi wɔ Richmond, Virginia, na otsiee dwumadzi no nyina wɔ tɛlɛfon do. Ber a ɔdze iyi rototo afrenhyia nhyiamu a wɔyɛe wɔ afe yi mu no ho no, dza ɔkãe nye dɛ: “Sɛ inya ho kwan hwɛ dwumadzi no ankasa a, inya do mfaso kɛsenara. Irunntum mmfa biribiara nntoto iyi ho.”

Edwumayɛfo a wɔwɔ Jehovah Adasefo edwumayɛbea ahorow no dze afe nye no mboree yɛɛ Intanɛt no ho edwuma. Ndɔnhwer mpempem pii na wɔdze yɛɛ edwuma no nyina wiei. Memenda a nna wɔdze dwumadzi no bɛfa Intanɛt do no, hɔn a wɔwɔ Intanɛt ho nyimdzee no tsenaa dan bi mu wɔ da no mu nyina wɔ Brooklyn, New York, kyinkyiim mfir no no mfunuma. Woyii dwumadzi no wɔ mbea 15 a hɔn ndɔnhwer gu ahorow mu. Ryan kã hɔn a wɔhyehyɛɛ Intanɛt ho mfir no na wɔbɔɔ ho ban no ho. Ɔkãa dɛ, “Nda a wɔfrɛ no nda, bi mpo anntɔ hɛn enyi do. Nyimpa dodow a wonyaa dwumadzi no do mfaso no maa yehun dɛ hɛn fona annyɛ gyan.”

Wɔrohwɛ dwumadzi no wɔ Katherine, Etsifi Mantɔw Mu, Australia