Bi a edze woho ahyɛ nantsew a odzi awar enyim mu mber kakra nye yi, naaso w’adwen mu nnhyɛ da ara nntsen wo wɔ ho. Sɛ ɔba no dɛm a, ebɛyɛ w’adze dɛn? Ebɔtoa do anaa ibotwa do? Dza yɛrebɛka ho asɛm yi bɔboa wo ma eehu dza ibotum ayɛ.

Dza yɛrebɛka ho asɛm

•  Aber a w’adwen mu nntsen wo

•  Aber a irisi gyinae

•  Aber a esi gyinae dɛ ibotwa do

 Aber a w’adwen mu nntsen wo

 Sɛ banyin na basia bi nantsew mber kakra a, bi a ekyir yi wɔbɛba ebohu dɛ saana ɔsor dza hɔn biara enyi gye ho nye dza hɔn mu biara pɛ koraa. Dɛ mfatoho no:

•   Bi a nna kor enyi gye ho dɛ ɔbɔkɔ akɛtsena mpoano naaso ɔfofor no enyi gye ho dɛ ɔbɔkɔ akɔfow nkoko.

•   Anaadɛ kor pɛ kasa na n’enyi gye ho dɛ wɔbɔkɔ nyimpa mu naaso kor no nntse dɛm.

•   Ebɔhwɛ no, nna kor nntaa nndzi nokwar naaso kor no bɔ mbɔdzen dɛ obedzi nokwar aber nyina.

 Hyɛ no nsew dɛ nsonsonee wɔ dza yɛaka no mu biara mu. Dza odzi kan no fa dza hɔn mu biara enyi gye ho; dza otsia ebien no fa suban a hɔn mu biara wɔ ho; dza otsia ebiasa no fa ntsetsee a hɔn mu biara nyae ho.

 Dwen ho hwɛ: Sɛ ɔba no dɛ hom nantsew no kowie awar mu a, dza yɛabobɔ do yi mu hendze na ɔbɛyɛ dzen ama wo paa dɛ ibedzi ho dwuma? Na no mu hendze na hom beenu nyinara botum ayɛ ho biribi?

 Awarfo botum enya enyigye wɔ hɔn awar mu ɔmmfa ho dɛ ɔsor hɔn mu biara no suban anaa dza hɔn mu biara enyi gye ho no. Kaa dɛ, tse a wɔtse hɔnho ase no nnkyerɛ dɛ aber biara hɔn adwen hyia wɔ ndzɛmba ho. Ɔtɔfabi a, no ho behia dɛ awarfo no mu kor bɔ mbɔdzen dɛ dza no hokafo no enyi gye ho no, noara so n’enyi bɛgye ho. Anaadɛ ɔsɛ dɛ kor bɔ mbɔdzen dɛ obosua suban pa ahorow bi a no hokafo no wɔ no. a

 Naaso iyinom nyinara da nkyɛn a, no ho hia papaapa dɛ ehwɛ hu dɛ ntsetsee a obi a epɛ dɛ ewar no no nyae nye dza woara so nyae no hyia. Dɛ bi a dza egye dzi, kwan a isi bɔ wo bra nye mbrɛ isi hu papa na bɔn no nye nedze behyia. Naaso sɛ ihu dɛ ɔnye nedze no nnhyia a, ɔno hom botum etwa do.

 Dɛ mfatoho no, susu hɔn a wonnyi ɔsom kor mu no ho hwɛ. Nwoma bi a wɔato dzin Fighting for Your Marriage ka dɛ: “Nhwehwɛmu ama abɛda edzi dɛ, awarfo a ɔsor ɔsom a hɔn mu biara wɔ mu no, ɔreyɛ ara nye yi nna woegyaa awar.”

 Bible mu afotusɛm: “Mma hom nye hɔn a wɔnngye nndzi mmbɔ mu nnyɛ adze, osiandɛ orunntum nnyɛ yie.”​—2 Corinthfo 6:14, Good News Translation.

 Aber a irisi gyinae

 Bible no ka dɛ hɔn a wɔwar no “behyia ɔhaw na hɔn werɛ bɔhow.” (1 Corinthfo 7:28, The New English Bible) Ntsi sɛ edze woho ahyɛ nantsew a odzi awar enyim mu na irihyia ɔhaw ahorow a, mma ɔnnyɛ wo nwanwa.

 Sɛ akasakasa nketsenketse bi soɛr wɔ hom ntamu a, ɔnnsɛ dɛ hom nya adwen dɛ ɔsɛ dɛ hom twa hom nantsew no do. Mbom hom mbisa homho dɛ, ‘Yebotum esiesie asɛm no ma asomdwee aaba anaa?’ Kaa dɛ, sɛ hom war a hom behia su a ɔtse dɛm.

 Bible mu afotusɛm: “Hom nkyerɛ ayamuyie nye ayamuhyehye mma homho nkorkor; hom mfa nkyekyɛ homho.”​—Ephesusfo 4:32.

 Sɛ akasakasa bi a no mu yɛ dzen soɛr wɔ hom ntamu, anaa dɛ ɔreyɛ ara nye yi nna akasakasa asoɛr wɔ hom ntamu a, bi a ɔno bɛkyerɛ dɛ ɔrennyɛ papa dɛ hom toa nhyehyɛɛ no do. Ɔbɛyɛ papa dɛ hom twa do ntsɛmara ansaana wɔaka ekyir.

 Asɛm no korakora nye dɛ: Sɛ nyimpa a epɛ dɛ ewar no no, innhu no yie, anaa ɔyɛ wo dɛ ennsoo awar a, mma mmbu w’enyi nngu do!

 Bible mu afotusɛm: “Ɔbadwembanyi hu mbusu, na ɔdze noho suma: na adwenharnyi dze, ɔnam n’enyim araa kɔtɔ mbusu no mu.”​—Mbɛbusɛm 22:3.

 Aber a esi gyinae dɛ ibotwa do

 Sɛ banyin na basia bi si gyinae dɛ wobotwa hɔn nantsew a odzi awar enyim no mu a, ɔyɛ yaw paa. Naaso sɛ hom beenu no anaa hom mu kor mpo adwen mu nnhyɛ da ara nntsen no wɔ hom nantsew no ho a, ɔbɛyɛ papa dɛ hom botwa do.

 Ebɛyɛ no dɛn? Ɔnnyɛ papa dɛ ebɛfa tɛst mɛsegye anaa email do etwa do, gyedɛ bi a siantsir bi ntsi ɔsɛ dɛ eyɛ no dɛm. Mbom, pɛ ber na bea a ɔfata na hom beenu no nkɛtsena hɔ nka ho asɛm.

 Bible mu afotusɛm: ‘Hom mu nyimpa biara nka nokwar nkyerɛ ne nyɛnko.’​—Zechariah 8:16.

 Sɛ enye nyimpa no twa do a, ɔno kyerɛ dɛ wo nsa esi famu anaa? Oho. Kaa dɛ nantsew a odzi awar enyim no boa wo ma isi gyinae; dɛ ebɔwar nyimpa no anaa eronnwar no. Sɛ hom twa do mpo a, ibotum esua biribi efi dza osii no mu.

 Bisa woho dɛ: ‘Ebɛnadze na nantsew a odzi awar enyim yi ama mehu afa moho? Biribi wɔ hɔ a ɔsɛ dɛ musua ansaana maawar anaa? Sɛ medze moho hyɛ nantsew a odzi awar enyim mu bio a, ebɛn nsesa na mebɛyɛ?’