Mbuae a Bible no dze ma

 Sɛ yesuro dɛ yebowu a, ɔnnyɛ bɔn osiandɛ owu yɛ hɛn tamfo. Dɛm ntsi yɛyɛ dza yebotum biara dze bɔ hɛn nkwa ho ban. (1 Corinthfo 15:26) Naaso, atorsɛm a nyimpa binom ka fa owu ho anaa gyedzihun ama binom enya owu ho suro a ɔmmfata, na iyi dze hɔn ayɛ ‘nkowaa hɔn nkwa nda nyina.’ (Hebrewfo 2:15) Sɛ yehu nokwasɛm a ɔfa owu ho a, ɔremma owu ho suro nnkyekyer hɛn. Afei so, ɔbɛma hɛn enyi agye wɔ asetsena mu.​—John 8:​32.

Nokwasɛm a ɔfa owu ho

•   Ewufo nnyim hwee. (Ndwom 146:4) Ɔnnsɛ dɛ isuro dɛ sɛ iwu a wɔbɛyɛ wo ayakayakadze anaa ebɛtse yaw bi osiandɛ Bible no dze owu toto nda ho.​—Ndwom 13:3; John 11:11-14.

•   Ewufo runntum nnyɛ hɛn hwee. Sɛ hɔn a nna wokyir hɛn kɔkɔɔkɔ no mpo wu a, hwee ara nnyi hɔ a wobotum dze ayɛ hɛn. (Mbɛbusɛm 21:16) Bible no ka dɛ: “Hɔn enyitan na hɔn enyiber o, ahera dada.”​—Ɔsɛnkafo 9:6.

•   Sɛ obi wu a, ɔno ara nnkyerɛ dɛ enyidado nyina asa. Nyankopɔn ahyɛ bɔ dɛ obenyan hɔn a woewuwu no aba nkwa mu bio.​—John 5:28, 29; Asomafo Ndwuma 24:15.

•   Nyankopɔn ahyɛ bɔ dɛ ber bi bɛba a “owu nnyi hɔ bio.” (Nyikyerɛ 21:4) Bible no ka dɛm aber no ho asɛm dɛ: “Atseneneefo benya asaase no edzi, na wɔaatsena mu daa,” kyerɛ dɛ, worunnsuro dɛ wobowu.​—Ndwom 37:29.