Mbuae a Bible no dze ma

 Bible no ma yehu nsɛm a obesisi, mbrɛ ndzɛmba bɛyɛ, nye suban a nyimpa bɛda no edzi a ɔbɛkyerɛ dɛ yɛwɔ “wiadze no ewiei” ber no mu. (Matthew 24:3) Bible no frɛ dɛm mber no dɛ “nda a odzi ekyir” anaa “ewiei ber.”​—2 Timothy 3:1; Daniel 8:19.

Ebɛn nsɛm na Bible no aka dɛ obesisi wɔ “ewiei ber no” mu?

 Bible no kaa dɛ ndzɛmba pii bɔbɔ mu esisi, na ɔyɛ ‘asɛnkyerɛdze’ a ɔbɛma yehu dɛ yɛwɔ ewiei ber no mu. (Luke 21:7) Ma yɛnhwɛ dɛm ndzɛmba ahorow no bi:

 Akodzi pii bɔkɔ do wɔ wiadze mu beebiara. Jesus hyɛɛ nkɔm dɛ: “Ɔman bɔsoɛr ɔman do, na ahenman bɔsoɛr ahenman do.” (Matthew 24:7) Dɛmara so na Nyikyerɛ 6:4 ka biribi a ɔtse dɛm ho asɛm. Ɔka dɛ obi a ɔtse pɔnkɔ do a ogyina hɔ ma akodzi beyi ‘asomdwee efi asaase do.’

 Edzibankɔm. Jesus hyɛɛ nkɔm dɛ: “Ɔkɔm” bɛba. (Matthew 24:7) Nyikyerɛ nwoma no sanee so kaa obi a ɔtse pɔnkɔ fofor do ho asɛm. Ɔno dze nna ɔbɛma ɔkɔm pii aba wiadze yi mu.​—Nyikyerɛ 6:5, 6.

 Asaasewosow akɛse. Jesus kaa dɛ “asaasewosow bɛba mbeambea.” (Matthew 24:7; Luke 21:11) Dɛm asaasewosow akɛseakɛse a obesisi wɔ wiadze yi mu no bɛma nyimpa ehu amandze, na nyimpa a asaasewosow no bokunkum hɔn no dze ibi nnsii dɛm da.

 Yarba. Jesus hyɛɛ nkɔm dɛ nsanyarba a odzi ewu, anaa “ɔyardɔm” bɛba.

 Nsɛmbɔndzi. Ɔwɔ mu dɛ nsɛmbɔndzi hyɛɛ ase akyɛr dze, naaso Jesus kaa dɛ wɔ ewiei ber no mu no “emumuyɛ [nsɛmbɔndzi] bɔdɔɔ so.”​—Matthew 24:12.

 Nyimpa bɛsɛɛ asaase no. Nkɔnhyɛ a ɔwɔ Nyikyerɛ 11:18 no ka dɛ nyimpa ‘bɛsɛɛ asaase no.’ Nnyɛ ewudzisɛm na ndzɛmba bɔn a nkorɔfo bɛyɛ no nkotsee na ɔbɛsɛɛ asaase no, mbom wɔbɛyɛ ndzɛmba dze asɛɛ abɔdze a etwa hɛn ho ehyia no.

 Nyimpa no suban bɛsɛɛ koraa. Bible no ka wɔ 2 Timothy 3:1-4 dɛ nyimpa bɛyɛ ‘bɔnyiayɛfo, hɔn a wonndzi nokwar, hɔn a nkorɔfo runntum nnye hɔn nndzi ahyɛmu, anokumfo, hɔn a wonnyi ahohyɛdo, abɔyafo, hɔn a wɔmmpɛ papa, yimafo, etsiɔdzenfo, ahomemadofo.’ Dɛm suban bɔn yi, nyimpa bɛda no edzi ara ma wɔaabor do. Ntsi ɔfata paa dɛ wɔka dɛm aber yi ho asɛm dɛ ɔyɛ “awerɛhow ber.”

 Mbusua ahorow mu bɛtsetsew. Bible no hyɛɛ nkɔm wɔ 2 Timothy 3:2, 3 dɛ, nyimpa piinara rinnya “tsema” mma hɔn ebusuafo, na mbofra so bɛyɛ hɔn ‘awofo do asoɔdzen.’

 Ɔdɔ a nyimpa wɔ ma Nyankopɔn no bɛyew. Jesus kae too hɔ dɛ: “Dodowara hɔn dɔ bɔgow.” (Matthew 24:12) Dza nna Jesus rekyerɛ nye dɛ ɔdɔ a nyimpa dodowara wɔ ma Nyankopɔn no ano bɔgow. Dɛmara so na 2 Timothy 3:4 ka dɛ, wɔ nda a odzi ekyir no mu no, hɔn a wɔtse dɛm no ‘bɔdɔ enyigyedze asen Nyankopɔn.’

 Hɔn a wɔyɛ dɛ gyama wɔrosom Nyankopɔn. Bible no kae wɔ 2 Timothy 3:5 dɛ, nyimpa piinara bɛka dɛ wɔrosom Nyankopɔn, naaso wɔremmfa Nyankopɔn ne mbra nnyɛ hwee wɔ hɔn asetsena mu.

 Nyimpa piinara bɛtse Bible nkɔnhyɛ ahorow ase yie. Daniel nwoma no hyɛɛ nkɔm dɛ, wɔ “ewiei ber no” mu no, nyimpa piinara bɛtse Bible no ase yie, na nkɔnhyɛ ahorow a yɛreka ho asɛm yi so ka ho bi.​—Daniel 12:4.

 Wɔbɛka asɛmpa no wɔ wiadze nyina. Jesus hyɛɛ nkɔm dɛ: “Ahenman ho asɛmpa yi, wɔbɛka wɔ wiadze nyina dze edzi amanaman nyina dase.”​—Matthew 24:14.

 Atwetwesifo bɔdɔɔ so. Jesus kae too hɔ dɛ, nyimpa piinara remmfa adanse a ɔkyerɛ dɛ yɛwɔ ewiei mber mu no nnyɛ hwee. (Matthew 24:37-39) Sɛ yɛhwɛ 2 Peter 3:3, 4 no a, ɔma yehu dɛ nyimpa bɛyɛ dza ɔkyɛn dɛm mpo. Ɔkaa dɛ, adanse a ɔkyerɛ dɛ yɛwɔ ewiei mber no mu no, nyimpa piinara besi ho atwetwe, na wɔbɛka dɛ dɛm nsɛm no nnkyerɛ hwee.

 Nkɔnhyɛ ahorow no nyina bɔbɔ mu esisi. Jesus annka dɛ wɔ ewiei mber no mu no, nkɔnhyɛ no mu kakraabi pɛ anaa no mu pii na obesisi. Mbom ɔkaa dɛ, dɛm nkɔnhyɛ ahorow no nyina bɔbɔ mu esisi.​—Matthew 24:33.

Yɛtse “nda a odzi ekyir” no mu anaa?

 Nyew. Nsɛm a orisisi wɔ wiadze, nye Bible no mu akontaabu ma yehu dɛ, nda a odzi ekyir no hyɛɛ ase wɔ afe 1914. Ɔyɛ dɛm afe yi ara so na Wiadze Ko I no hyɛɛ ase. Sɛ epɛ dɛ ihu dɛ nsɛm ahorow a orisisi wɔ wiadze yi mu no da no edzi dɛ yɛwɔ nda a odzi ekyir no mu a, hwɛ video yi:

 Nyankopɔn n’Ahendzi hyɛɛ ase dzii adze wɔ sor wɔ afe 1914. Ndzɛmba a odzii kan yɛe no mu kor nye dɛ, wɔpaam Satan na esunsum fi no fii sor, na wɔtoow hɔn kyen asaase yi do na worunntum nnkɔ sor hɔ bio. (Nyikyerɛ 12:7-12) Sɛ yɛhwɛ suban bɔn a nyimpa reda no edzi nye ndzɛmba bɔn a wɔreyɛ wɔ ewiei mber yi mu no a, ɔma yehu dɛ Satan na ɔhyɛ ekyir. Iyi ama nda a odzi ekyir no mu ayɛ dzen paa.​—2 Timothy 3:1.

 Nda a no mu ayɛ dzen yi ama nyimpa piinara ayɛ basaa. Dza ɔhaw hɔn kɛse ndɛ mpo nye dɛ, asomdwee nnyi nyimpa ntamu. Iyi ma binom suro dɛ annhwɛ a daakye nyimpa runntum nntsena asaase yi do.

 Ɔwɔ mu, nyimpa binom so wɔ hɔ a dza orisisi wɔ wiadze yi mu no haw hɔn, naaso wɔwɔ enyidado dɛ daakye ndzɛmba bɛyɛ yie. Wɔgye dzi paa dɛ ɔrennkyɛr Nyankopɔn n’Ahendzi no beyi ɔhaw ahorow a ɔwɔ wiadze nyina no efi hɔ. (Daniel 2:44; Nyikyerɛ 21:3, 4) Wɔdze abotar rotweɔn dɛ Nyankopɔn bedzi no bɔhyɛ do, na wɔma asɛm a Jesus kae no kyekye hɔn werɛ. Ɔkaa dɛ: “Na nyia obetsim ekodu ewiei no, ɔno na wɔbɛgye no nkwa.”​—Matthew 24:13; Micah 7:7.