Mbuae a Bible no dze ma

 Nyankopɔn bu nyimpa paa, dɛm ntsi ɔdze obiara ne pɛ ama no, na ɔama kwan dɛ obiara nsi dza ɔpɛ ho gyinae. Dza obi bɛyɛ no, Nyankopɔn nnhyehyɛɛ nntoo hɔ na dɛmara so na nnyɛ nkrabea na ɔbɛkyerɛ mbrɛ hɛn asetsena bɛyɛ. Ɔwodze ma yɛnhwɛ dza Bible no ka fa asɛm yi ho.

•   Nyankopɔn bɔɔ hɛn wɔ no suban do. (Genesis 1:26) Nyimpa nntse dɛ mbowa a wofi awosu mu yɛ adze no. Osiandɛ Jehovah bɔɔ hɛn wɔ no suban do ntsi, yetum da suban bi tse dɛ ɔdɔ na atsɛntsenenee edzi. Jehovah tum yɛ dza ɔpɛ biara na dɛmara so na ɔdze hokwan a ɔtse dɛm no ama nyimpa.

•   Kwan bi do no, hɛnankasa na yebotum akyerɛ mbrɛ hɛn abrabɔ bowie. Dɛm ntsi, Bible no hyɛ hɛn nkuran dɛ yentsie Nyankopɔn ne ndze, kyerɛ dɛ, yɛmfa n’asɛm nyɛ edwuma. Sɛ yɛyɛ dɛm a, ɔkyerɛ dɛ yɛpɛ nkwa. (Deuteronomy 30:19, 20) Dza Nyankopɔn reka akyerɛ hɛn yi, sɛ ɔmmfaa obiara ne pɛ mmaa no nna ɔreka dɛm a, nkyɛ ntseasee nnyi mu na ɔkyerɛ dɛ ne tsirmu yɛ dzen so. Nyankopɔn nnhyɛ hɛn dɛ dza ɔbɛka biara yɛnyɛ mbom n’adzeserɛ a ɔdze roto hɛn enyim nye dɛ: “Ao kɛtseankyɛ eyɛɛ aso maa me mbrasɛm! Nkyɛ w’asomdwee ayɛ dɛ esutsen.”​—Isaiah 48:18.

•   Nnyɛ nkrabea bi na ɔbɛkyerɛ dɛ obesi obi yie anaa orinnsi no yie. Sɛ yɛpɛ dɛ osi hɛn yie a, ɔnodze ɔsɛ dɛ yɛyer hɛnho yɛ edwuma. Bible no ka dɛ: “Biribiara a edze wo nsa bɛka dɛ ereyɛ no, fa w’ahoɔdzen yɛ.” (Ɔsɛnkafo 9:10) Ɔsan so ka dɛ: “Mbɔdzembɔ adwen dze adze dodow nko ba.”​—Mbɛbusɛm 21:5.

 Hɛn pɛ a Nyankopɔn dze ama hɛn no yɛ akyɛdze paa, osiandɛ ɔma yefi hɛn “akoma nyinara” mu dɔ no. Nokwasɛm nye dɛ, dɛmara so na yɛpɛ dɛ yɛyɛ.​—Matthew 22:37.

Biribiara na Nyankopɔn dze no tum no yɛ anaa?

 Bible no ma yehu dɛ Nyankopɔn nye adze nyina do Tumfo no na no tum nnyi ano. Sɛ ɔka dɛ ɔreyɛ biribi a, adze biara nnyi hɔ a obotum esiw no kwan. (Job 37:23; Isaiah 40:26) Naaso nnyɛ biribiara na ɔdze no tum no yɛ. Sɛ yɛbɛyɛ mfatoho a, nna Babylonfo no tan Nyankopɔn no nkorɔfo naaso Bible ka dɛ Nyankopɔn hyɛɛ noho do wɔ hɔn ho. (Isaiah 42:14) Ndɛ so dɛmara na ɔtse. Nyimpa binom wɔ hɔ a, hɛn pɛ a Nyankopɔn dze ama hɛn no, wɔdze yɛ ndzɛmba a ɔhaw nkorɔfo naaso Nyankopɔn ahyɛ noho do wɔ hɔn ho. Naaso Nyankopɔn remma wɔnnyɛ dɛm daa.​—Ndwom 37:10, 11.