Kɔ no mu nsɛm no do

MBABUN BISA DƐ

Ebɛnadze Ntsi Na Ɔsɛ Dɛ Mokɔ Nhyiamu Ahorow A Wɔyɛ Wɔ Ahendzi Asa Do No?

Ebɛnadze Ntsi Na Ɔsɛ Dɛ Mokɔ Nhyiamu Ahorow A Wɔyɛ Wɔ Ahendzi Asa Do No?

Dapɛn biara, Jehovah Adasefo yɛ nhyiamu mpɛn ebien wɔ mbea ahorow a wohyia mu som. Wɔfrɛ dɛm mbea ahorow no Ahendzi Asa. Ebɛnadze na ɔkɔ do wɔ hɔ, na na sɛ ekɔ nhyiamu no bi a, ebɛn mfaso na ibenya?

 Ebɛnadze na ɔkɔ do wɔ hɛn Ahendzi Asa do?

Ahendzi Asa yɛ bea a wosũa Bible no, na wɔkyerɛ mbrɛ obi botum dze no mu nsɛm no abɔ ne bra. Nhyiamu a wɔyɛ wɔ hɔ no botum aboa wo ma:

  • eesũa Nyankopɔn ho nokwasɛm.

  • aatse siantsir ntsi a nsɛm ahorow bi risisi ndɛ no ase.

  • aayɛ nyimpa papa.

  •  eenya anyɛnkofo pa.

Ana inyim? Wɔfrɛ mbea ahorow a Jehovah Adasefo hyia mu som no Ahendzi Asa, osiandɛ ne tsitsir no, Nyankopɔn N’ahendzi no ho nsɛm na wosusu ho wɔ hɔ.​—Matthew 6:​9, 10; 24:14; Luke 4:​43.

 Ebɛnadze ntsi na ɔsɛ dɛ ekɔ nhyiamu wɔ hɔ?

Nsɛm a ibosũa wɔ hɔ no bɔboa wo. Bible mu ngyinadonsɛm a wosusu ho wɔ Jehovah Adasefo nhyiamu ahorow ase no bɔboa wo ma ‘eenya nyansa.’ (Mbɛbusɛm 4:5) Iyi kyerɛ dɛ, Bible no botum aboa wo ma eesisi gyinae pa wɔ w’asetsena mu. Obotum so aboa wo ma eenya asetsena mu nsɛmbisa a ohia no ho mbue. No mu bi nye:

  • Ebɛnadze ntsi na Nyankopɔn bɔɔ nyimpa?

  • Aso ɔsɛ dɛ yɛbɔ Nyankopɔn sombo wɔ ɔhaw a yehyia no ho?

  • Sɛ yewu a, henfa na yɛkɔ?

Dza odzidzi do yi yɛ Bible mu ɔkasa ahorow a wɔma wɔ hɛn dapɛn ewiei nhyiamu ahorow ase no mu kakraabi pɛ:

  • Ebɛnadze Ntsi Na Ɔsɛ Dɛ Yɛma Bible No Kyerɛ Hɛn Kwan?

  • Henfa Na Ibenya Mboa wɔ Ɔfona Ber Mu?

  • Dza Nyankopɔn N’Ahendzi No Reyɛ Ama Hɛn Ndɛ.

“Mo skuulnyi bi baa hɛn nhyiamu da kor bi. Ɔnye m’ebusuafo tsenaa fakor, na yɛmaa ɔhwɛɛ hɛn mbuukuu a yɛdze yɛ adzesua no mu. Aber a yɛpoon adzesua no, ɔkãa kyerɛɛ me dɛ n’enyi gyee mbuae ahorow a afofor mae wɔ nsɛmbisa na mbuae ɔfã hɔ no ho papaapa. Ɔsanee so kãa dɛ hɔn asɔr no nntse dɛ hɛndze no, osiandɛ wonnyi mbuukuu a wɔdze sũa Bible no.”​—Brenda.

Ana inyim? No ho rinnhia dɛ itua sika ana ekɔ Ahendzi Asa do, na wɔnngyegye kɔlɛhyen biara wɔ ase so.

Sɛ ekɔ Ahendzi Asa do na enye Adasefo a wɔwɔ hɔ no bɔ a, ibenya nkuranhyɛ. Bible no ma yehu dɛ, ɔsɛ dɛ Christianfo hyia mu mbrɛ ɔbɛyɛ a wobotum ahyehyɛ hɔnho nkuran. (Hebrewfo 10:24, 25) Sɛ yɛnye nkorɔfo a wɔdze Nyankopɔn n’apɛdze nye afofor hɔn ehiadze dzi kan wɔ hɔn asetsena mu no bɔ a, ɔma hɛn enyi gye wɔ dɛm wiadze yi a pɛsɛankonya su ahyɛ mu ma yi mu.

“Obotum aba dɛ, da no nkɔ n’ewiei no, nna mo werɛ ahow na mabrɛ so, naaso nkorɔfo a wɔwɔ Ahendzi Asa do no ma m’ahom ka moho aber nyina. Sɛ yɛpon na sɛ morokɔ fie a, nna m’enyiwa agye na metse nka so dɛ menya ahoɔdzen a mihia na ama meetum ayɛ dza ɔsɛ dɛ meyɛ da fofor.”​—Elisa.

Ana inyim? Jehovah Adasefo Asafo ahorow bɔbor 120,000 na ɔwɔ wiadze nyina, na wohyia mu wɔ mbea bɔbor 60,000. Nkorɔfo a wɔba hɛn nhyiamu ahorow no dodow rinya nkɔenyim. Mbrɛ ɔbɛyɛ a dɛm nkorɔfo dodow nyina benya beebi ehyia mu asom ntsi, sɛ wɔkyekyɛ mu pɛpɛɛpɛr a, wosi Ahendzi Asa bɛyɛ 1,500 afe biara. *

^ nky. 20 Mbea a yehyia mu som no, sɛ epɛ dɛ ihu bi a, kɔ “Jehovah Adasefo Nhyiam Ahorow” ɔfã hɔ na klik “Hwehwɛ bea a ɔbɛn wo” no do.