CAMEK piciulriamek? Makut ilait arcaqalriit apyutet yuut aptelrit. Makunek aptetungatuten:

  • Agayutem-qaa auluksugakut?

  • Anguyat cakviullret-llu iquklitciqut-qaa?

  • Calarceta tuquaqamta?

  • Neryuniurkangqertut-qaa tuqullret?

  • Qaillun agayuciqsia Agayutem-llu niillrua?

  • Qaillun nalketciqsia nunanirqelria yuucirkamek?

Naken makut apyutet kiukaitnek yuarciqsit? Kalikavigmun pikuvet nalkuciquten amllernek kiukerciyukluteng pilrianek naaqsuutnek. Ataucim kalikam ayuqenrita alla kalikaq. Allat-llu piciunganateng tau͡gaam cimiraqluteng.

Tau͡gaam, atauciq kalikaq kemyunarqelrianek imangqertuq. Piciulriaruq tauna. Jesus Christ-aq qanellruq agayullermini Agayutemun: “Elpet qaneryaran piciulriaruuq.” (John 17:17) Mayirpak nallunritaput una Agayutem Qaneryaraqa. Wani kalikami tangerciqan Agayutem Qaneryara makut apyutet kiullrii taringnaqluteng piciuluteng-llu.

 Agayutem-qaa Auluksugakut?

CIIN TAUMEK APTA: Yuugukut ellarpagmi amllelrianek imangqerluni nangtequtenek elluartenritellrianek-llu. Amlleret Agayulirtet elicatut cakviulput Agayutem pisquciqai.

AGAYUTEM QANERYARA WATEN ELICARTUQ: Agayutem assiilngut pivkaryuitai. “Piciuguq Agayutem assiilngurmek caliyuilucia, cuqciaqami-llu assirluki piuratuluki.” qanertuq Job 34:12. Agayutem yuut kenekluki picirkalillui. Tua-llu Jesus-am elicallruakut waten agayusqeluta: “Atavut qilagmetellria . . . Angayuqauviin tekilli; pisqucin nunam qaingani piuli qilagmitun.” (Matthew 6:9, 10) Agayutem cakneq kenekn͡gamikut elliin piullni piciurtevkarciqa.​—John 3:16.

Naaqiu una-llu Genesis 1:26-28; James 1:13; cali 1 Peter 5:6, 7.

Anguyat Cakviullret-llu Iquklitciqut-qaa?

CIIN TAUMEK APTA: Anguyam amlleret cali yuut tuquavkargai. Wangkuta tamamta nallunritaput cakviulput.

AGAYUTEM QANERYARA WATEN ELICARTUQ: Agayutem assirluta uitavkarciqakut nunam qaingani. Angayuqauviani, qilam atanruvii, yuut “uptenqiggngaunateng-llu anguyagnaluteng.” Tau͡gaam, elliit “Nuussirpateng nunamun itumcissuutngurciiqait.” (Isaiah 2:4) Agayutem iquklitciqait cakviullriit elluartenritellriit-llu. Agayutem Qaneryaran akqutii: ‘Agayutem . . . Elliin-llu aluviit tamalkuita perrirciqai iingitnek. Tuqumek-llu pitangqenrirciquq, iluteqelriit, neplilalriit, nangteqelriit-llu, ciuqliit pelluata.’​—Revelation 21:3, 4.

Naaqiu una-llu Psalm 37:10, 11; 46:9; cali Micah 4:1-4.

Calarceta Tuquaqamta?

CIIN TAUMEK APTA: Amlleret ellarpiim Agayuviit elicarituut tuquaqamta caa ilumteni tuquyuiteniluku. Ilait ukvetuut tuqullret allamun yuuretetuniluki, wall’u cali qanatetuniluta. Allat-llu ukvetuut tuqullret ikayuutuniluki wall’u akngirluki, waten-llu Agayutem assiitelriit ayagcessluki kenerpagmun.

AGAYUTEM QANERYARA WATEN ELICARTUQ: Yuut tuquaqameng, temii anernera-llu tapeqlutek piunrirlartuk “tau͡gken tuqumalria camek nalluluni,” qanertuq Ecclesiastes 9:5. Tuqullret elpeggritut canek casciganateng-llu,​—anerteqelriit-llu aknirciiganaki,​—wall’u ikayurciiganaki.​—Psalm 146:3, 4.

Naaqiu una-llu Genesis 3:19 cali Ecclesiastes 9:6, 10.

 Neryuniurkangqertut-qaa Tuqullret?

CIIN TAUMEK APTA: Anerteqsugtukut, assirluta ilaput ilakluki. Eluciqaput wangkuta neryuniulput ataam tangersugluki ilaput tuqullret.

AGAYUTEM QANERYARA WATEN ELICARTUQ: Amlleret tuqullret unguirciqut. Jesus-am akqutellruq “qungunetellriit erinii niiciiqaat, anluteng-llu.” (John 5:28, 29) Ayuqluku Agayutem nutem pisquciqellra, yuut unguillret neryuniungqertut anerteqellerkameggnek nunakegtarmi. (Luke 23:43) Una ciunerkaput akqutengqertuq nangteqsunata nangyuilngurmek-llu yuucirkangqerlluta. Agayutem Qaneryara qanertuq: “Ellualriit piksaguciiqaat nuna, uitavikarkauluku akwarpak.”​—Psalm 37:29.

Naaqiu una-llu Job 14:14, 15; Luke 7:11-17; cali Acts 24:15.

Qaillun Agayuciqsia Agayutem-llu Niillrua?

CIIN TAUMEK APTA: Yuut ukvengqelriit agayutut. Amlleret tau͡gaam umyuarteqlartut agayullrit kiuyuitniluki.

AGAYUTEM QANERYARA WATEN ELICARTUQ: Jesus-am elicalruakut agayuaqamta. “Piicakuvci pulengtaaryaqunaci nallumalriacetun.” (Matthew 6:7) Agayutmun niicequmakumta agayuaqamta, agayuarkauggukut pisquciatun. Agayutem pisqucia eliterarluku tua-llu agayuluten tuaten. Qanertuq 1 John 5:14: “Elliini civuuratailamta canek kaigakumta elliin pisqutkekiinek, niicimallerkarput nalirrukenritarput.”

Naaqiu una-llu Psalm 65:2; John 14:6, 14; cali 1 John 3:22.

Qaillun Nalketciqsia Nunanirqelria Yuucirkamek?

CIIN TAUMEK APTA: Amlleret yuut ukverumaut akiim, arcaqutem, kenegnam-llu nunaniryugcetciqait. Tua-llu cucukluki tamakut, tau͡gaam nunaniryugpegnateng.

AGAYUTEM QANERYARA WATEN ELICARTUQ: Jesus-am nallunritevkalrui nunaniryugkamek qanerluni: “Atawaugut imkut Agayutem qaneryaraanek niitellriit aturluki-llu!” (Luke 11:28) Nutaan atawaulerput nalketciqaput elitengnaqkumteggu Agayun, pisqucia-llu. Tauna ilumun piuragput. Tauna piciulria nalketciqan Agayutem Qaneryarani. Nallunrinaku piciulria nallunaiciiquq ca arcaqelria wall’u arcaqanrilnguk. Agayutem Qaneryarat piciulriit maligtaqukumteki umyuamteggun callemteggun-llu yuucirput assirikanirciquq nunaniqluni-llu.

Naaqiu una-llu Proverbs 3:5, 6, 13-18 cali 1 Timothy 6:9, 10.

 Tangerqeraput arvinlengen aptelret Agayutem Qaneryarain kiulret. Elicugtuten-qaa cali? Ilumun, elicugtuten cali Agayutmek. Makunek-llu aptellrungatuteng: ‘Agayutem auluqsukumikut ciin ukanirpak assilngut pivkarlartaki cakviurceluta-llu? Qaillun utumarcetciqsia ilama yuuciryara?’ Agayutem Qaneryarai kiukegtarangqertuq makunek aptellernek allanek-llu apyutnek.

Tau͡gaam, amlleret capersutut naaqlerkai Agayutem Qaneryara. Ilait umyuarteqlartut Agayutem Qaneryara taksiiyagniluku naaqelraa taringnaunani-llu. Nalleksugaten-qaa Agayutem Qaneryaran kiullriit? Elicukuvet Jehovah-am Nallunairustiit ikayurciqaten malrugnek elicarcutekun.

Ciumek, uum kalikam Maligtaqukuvgu Agayun Yuucillren Iquiciiquq ikayurciqaten Agayutem Qaneryarain kiuluki apyutet arcaqalriit. Aipa-llu elicarsutenguq akiinani. Akiinaku-llu, Jehovah-am Nallunairustiit elicarciqaten Agayutem Qaneryaranek nani piullerpeni erenret akuliitni. Amlleret yuut ellarpagmi ikayullruat uuggun elicarcutuggun. Amlleret yuut waten qanellrut eliteraluteng: “Piciulria nalkaqa!”

Allamek nalkusngaitukut arcaqalriamek qelkenarqellriamek. Agayutem Qaneryarai piciuralria pegceciqai makut tuunriyarat angalkuit, aliingutet, uunguciitet-llu. Neryiuniumek, picirkamek, ilukegcimek-llu cikituakut. Jesus-aq qanertuq: “Piciuneq-llu nallunriciiqerci, piciunrem-llu angiciiqaaci.”​—John 8:32.