1. Ciin Agayutem quyurtellruaki Israelite-at yuksugluki?

Agayutem quyurtellrui Abraham-am kinguliarneri yuknaluki alerquutnek-llu cikirluki. “Israel”-amek yunʼi acillrui aulukesqelluki-llu piciulria ukveq qaneryaraminek-llu. (Psalm 147:19, 20) Israel-akun atawaqercetniarai tamalkuita yuut atanruviitni.—Naaqiu Genesis 22:18.

Agayutem cucukellrui Israelite-at nallunairusteksugluki. Nallunritevkallrui qaillun yuut atawaqerciqellratnek maligtaqukatki Agayutem alerquutai. (Deuteronomy 4:6) Israelite-akun allat yuut nallunrillruat piciulria Agayun.—Naaqiu Isaiah 43:10, 12.

2. Ciin agayumalriit quyurtelartat Jehovah-am pisqutii pitekluki?

Agayutem nakmikenrillrui Israelite-armiut, Jehovah-am-llu nakmiin cikiutekluku Jesus-am maligtaqustiinun. (Matthew 21:43; 23:37, 38) Israelite-at taukut cimillret maa-i Jesus-amun maligtaqustenguut kevgiurtut Jehovah-amun nallunairustenguluteng.—Naaqiu Acts 15:14, 17.

Jesus-am quyurtellrui maligtaqusteni qaneryariusqelluki maligtaqustelisqelluki-llu nunani. (Matthew 10:7, 11; 24:14; 28:19, 20) Maa-i mana caliaq pellugniarartuq, Agayutem-llu iquklitevkarniararai assiilnguut nunam qaingani. Jehovah-am maa-irpak quyurtai yugugaat nunani piciulriamun ukverutmun. (Revelation 7:9, 10) Agayumalriit quyungqaut atauciuluteng cacetuqulluteng ikayuqulluteng-llu. Ayuqluteng elicarituut Agayutem Qaneryaraanek quyurtaqameng.—Naaqiu Hebrews 10:24, 25.

 3. Qaillun maa-irpak ayagnillruat Jehovah-am Nallunairustiit?

Nalliini 1870-im amllenrilnguut elitnaulriit Qaneryaramek ataam nalkellruat nalluyagutellret piciulriit Qaneryaraami. Ayagnivkallra Jesus-am maligtaqustiin qaneryariuresqellrat taukut nallunritellruat. Taukut-llu nunam qaingani qaneryariungluteng Angayuqauvigmek. Atengluteng-llu 1931-ami Jehovah-am Nallunairustiit-nek.—Naaqiu Acts 1:8; 2:1, 4; 5:42.

4. Qaillun Jehovah-am Nallunairustiit quyungqat?

Ciuqlirmi ukvelriit quyungqaviatni nunani ikayurtengqellruut ataucimek ciuliqagtemek. Taukut-llu nallunritat Jesus-aq Atanrullra quyurrvigmi. (Acts 16:4, 5) Maa-irpak-llu ayuqulluki Jehovah-am Nallunairustiit nunarpagmi ikayutengqertut elisngalrianek Angutet Ciuliqagtet. Alerqularat Jehovah-am Nallunairustiit calivitni mumigciaqata, kalikaliuraqata, aruqaqata-llu Qaneryaram elicungcarsutaitnek 700-aq cipluku yuut qaneryaraateggun. Ellarpagmi ukverumalriit quyurrviatni 110,000-at cipluki, Angutet Ciuliqagtet Agayutem Qaneryaraanek cacetuquvkalarai ayuqucirturluki-llu apertuutnek. Tamalkuitni quyurrvigni elisngalriit agayumalriit angutet kevgiutnguulartut murilkestenguluteng-llu. Ukut angutet kenekluki aulukai Agayutem maligtaqustai.—Naaqiu 1 Peter 5:2, 3.

Jehovah-am Nallunairustiit quyungqaut qaneryariurkauluteng qaneryaraaqegtarmek maligtaqusqelluki-llu. Eneniitni yuut qaneryariurtuukut-llu Apostle-acetun. (Acts 20:20) Piciulriamek elicarituukut Agayutem Qaneryaraanek eliculrianun. Jehovah-am Nallunairustiit kiingan quyurnaluten pilanritut, tau͡gaam ilakelriarukut Aatamta kenekluta. Ilakukut anngaqutellriatun alqaqutellriatun-llu aulukulluta. (2 Thessalonians 1:3) Jehovah-am yui quyungqameng quyasqluku ikayusqluki-llu allat, atawaqapigluteng ilakelartut nunam qaingani.—Naaqiu Psalm 33:12; Acts 20:35.