Ke September 26, 2012, Esop Ayaraiwat ke Ukraine ama ọdọhọ mbon oro ẹkeyomde ndida inọ mbọ Mme Ntiense Jehovah isọn̄ ke Ukraine ẹyak isọn̄ oro ẹnọ Mme Ntiense. Mi ke n̄kọk itieutom Mme Ntiense Jehovah odu ke Ukraine.

Mme Ntiense Jehovah ẹkedep isọn̄ emi ke 1998. Edi ke 2008, owo emi akanyamde isọn̄ emi ọnọ Mme Ntiense ama afiak anyam enye ọnọ N̄ka Mbre Mbuba emi ẹkotde LLC. Ntre ke ẹsisan̄a ẹyịp isọn̄ owo ke Ukraine.

Akpa esop emi ẹkemende ikpe emi ẹka ọkọdọhọ ke N̄ka Mbre Mbuba emi enyene isọn̄ oro, onyụn̄ ọdọhọ Mme Ntiense Jehovah ẹsion̄o idem ẹkpọn̄.

Edi ke December 2011, esop usion̄o ikpe ama edikụt ke Mme Ntiense Jehovah ẹkebem iso ẹdep isọn̄ oro, onyụn̄ ọbọ isọn̄ mmọ ayak ọnọ mmọ. Esop emi ama onyụn̄ ọdọhọ N̄ka Mbre Mbuba oro ke April 2012 ete osion̄o idem ọkpọn̄ isọn̄ oro ke ini mmọ ẹkedọhọde ke imọn̄ ision̄o ikpe oro. Emi owụt ke Mme Ntiense Jehovah enyene isọn̄ oro. Edi n̄ka mbre emi ẹma ẹsụk ẹsion̄o ikpe oro ẹka esop en̄wen ke Lviv. Ke ọfiọn̄ ita ama ekebe, esop usion̄o ikpe oro ama ọdọhọ N̄ka Mbre Mbuba oro ke Mme Ntiense Jehovah enyene isọn̄ oro, ke esop emi ọkọdọhọde ke N̄ka Mbre Mbuba enyene isọn̄ oro ikekpehe edinen ikpe.

Edi N̄ka Mbre Mbuba ikenyịmeke kpukpru emi. Ntre mmọ ẹma ẹfiak ẹsion̄o ikpe oro ẹka Esop Ayaraiwat ke Ukraine. Ke September 26, Esop Ayaraiwat emi ama ọdọhọ mmọ ẹduọk odudu ndien, ke idịghe mmọ ẹnyene isọn̄ oro. Utịt ikpe oro ekedi oro.

Ekpedi mmọ ẹma ẹbọ isọn̄ oro, ọkpọwọrọ ke ibuot itieutom Mme Ntiense Jehovah ke Ukraine ye akamba isọn̄ emi mîbọpke n̄kpọ kan̄a do akpatak. Ndien emi ekpenen̄ede afịna utom Abasi emi Mme Ntiense Jehovah ẹnamde ke Ukraine.