Ubieresịt iyakke ata ediwak mme Christian ẹdụk ekọn̄—ndien ediwak idụt ẹkpono ubieresịt mmọ. Kọmiti Esop Edidiana Mme Idụt Emi Esede Aban̄a Unen Oro Mme Owo Ẹnyenede ẹbiere ete ke Turkey ẹnyene ndikpono unen nditọ mmọ ntre.

Ke ikpe oro Kọmiti oro ẹkebierede ke March 29, 2012, mmọ ẹma ẹtebe Cenk Atasoy ye Arda Sarkut emi ẹdide nditọ Turkey ikpe. Owo iba emi ẹdi Mme Ntiense Jehovah emi mînyịmeke ndidụk ekọn̄ ke ntak se mmọ ẹnịmde ke akpanikọ.

Atasoy ye Sarkut ẹma ẹsiwet n̄wed ndien ndien ẹnọ mme itieutom ukara ẹban̄a se ubieresịt mmọ mîyakke mmọ ẹnam, ẹnyụn̄ ẹdọhọ ke mmimọ iyanam utom obio emi mîdịghe utom ekọn̄. Kpa ye oro, ẹma ẹsụk ẹnyịk mmọ ẹte ẹdụk ekọn̄. Sarkut akanam utom nte udiana andikpep ke ufọkn̄wed ntaifiọk. Ẹma ẹsio enye ke utom ke ini ekọn̄ ẹkedọhọde ke imọn̄ ikot ufọkn̄wed oro ikpe.

Ke ubiereikpe oro Kọmiti emi ẹkenọde, mmọ ẹma ẹdọhọ ke unen oro owo enyenede nditre ndidụk ekọn̄ ke ntak ubieresịt esie “asan̄a kiet ye unen ifụre ekikere, ubieresịt, ye eke ido ukpono oro owo enyenede,” nte Ọyọhọ Ibet 18 Eke Esop Ofụri Ererimbot Kaban̄a Unen Owo ye Eke Ukaraidem ọdọhọde. Kọmiti emi ẹma ẹbiere n̄ko ete ke unen emi owo enyenede ndibiere n̄kpọ ke ntak ubieresịt esie mi “anam owo ekededi odot nditre ndidụk ekọn̄ edieke ido ukpono m̀mê se enye enịmde ke akpanikọ mînyịmeke enye odụk.

Ikebịghike Esopikpe Europe Oro Esede Aban̄a Unen Owo ẹkebiere ikpe iba emi ẹnyụn̄ ẹbietde enye emi n̄ko. Ke kiet ke otu ikpe iba emi Esop oro ẹkebierede do, ẹma ẹdọhọ ke “Turkey nditre ndinọ owo utom en̄wen utu ke utom ekọn̄ edi ndibọ owo unen oro enye enyenede nditre ndidụk ekọn̄ ke ntak ubieresịt esie,” emi Ediomi Europe Oro Aban̄ade Unen Owo ọnọde.

Toto ke ini emi Ido Ukpono Christ ọkọtọn̄ọde ke mme owo ẹketọn̄ọ nditre ndidụk ekọn̄ ke ntak ubieresịt. E. W. Barnes, ekewet ke n̄wed esie oro The Rise of Christianity, ete: “Ẹma ẹtịm ẹdụn̄ọde ntọt oro odude, [ẹkụt] ke tutu esịm eyo Marcus Aurelius [akwa edidem Rome emi akakarade ọtọn̄ọde ke 161 esịm 180 E.N.], ke Christian ndomokiet ikodụkke ekọn̄; ndien ke owoekọn̄ ndomokiet emi akabarede edi Christian ikakaha iso inam utom ekọn̄.