Be ka se isịnede

Be ka se isịnede

 NTE CHRISTIAN OKPODUDE UWEM

Ẹdiana Kiet Ẹkwọrọ Ikọ ke Efakutom Emi Ẹsemde Nsio Nsio Usem

Ẹdiana Kiet Ẹkwọrọ Ikọ ke Efakutom Emi Ẹsemde Nsio Nsio Usem

Mme owo ẹsinen̄ede ẹma ndikpan̄ utọn̄ ke ini ẹkwọrọde ikọ ẹnọ mmọ ke usem emana mmọ. Ekeme ndidi ntak edi oro Jehovah akanamde ‘mme Jew emi ẹbakde Abasi’ ẹnyụn̄ “ẹtode kpukpru idụt oro ẹdude ke idak ikpaenyọn̄” ẹkop eti mbụk ke “usem emana” mmọ ke Pentecost isua 33 C.E., kpa ye oro edide etie nte enyene usem emi kpukpru mmọ ẹkediọn̄ọde, utọ nte Hebrew m̀mê Greek. (Ut 2:​5, 8) Mfịn, mme esop oro ẹsinịmde mbono esop ke nsio nsio usem ẹkeme ndikwọrọ ikọ ke ukem efakutom sia ẹsemde nsio nsio usem ke efakutom oro. Didie ke mme asuanetop ke esop kiet kiet ẹkeme ndidiana kiet n̄kwọrọ ikọ ke efakutom oro man owo idikwọrọ ikọ inọ owo oro ẹma ẹkekọkwọrọ ikọ ẹnọ tutu edi se enyeneufọk ayatde esịt?

  • Ẹneme nte ẹdinamde emi (N̄ke 15:22): Mme esenyịn utom ke mme esop oro ẹkpenyene ndineme nte ẹdikwọrọde ikọ ke utọ efakutom oro. Edieke efakutom mme esop oro ẹsemde usem en̄wen mîkponke, mmọ ẹkeme ndidọhọ mbufo ẹkûkwọrọ ikọ ke mme ufọk oro ẹsemde usem esop mmimọ. Edi edieke mme esop emi ẹsemde usem en̄wen mîsikemeke ndikụre efakutom mmọ sia efakutom mmọ ẹdude ke nsio nsio itie, mmọ ẹkeme ndidọhọ mbufo ẹkwọrọ kpukpru ufọk, ndien ke ini ẹkụtde owo emi esemde usem esop mmimọ, emi amade etop Bible, mbufo ẹnam mmimọ idiọn̄ọ. (od 93 ¶37) Mîdịghe mmọ ẹkeme ndidọhọ esop oro ẹn̄wam mmimọ ẹyom owo ekededi oro esemde usem mmimọ, ndien ekem ẹwet adres esie ẹnọ mmimọ. (km 7/⁠12 5, ekebe) Ti ke ẹkeme ndisem nsio nsio usem ke ufọk kiet. Edi ikpanaha ẹnọ enyịn̄ ye nọmba ufọk owo edieke ukara idụt mbufo ẹkpande utọ n̄kpọ oro.

  • Ẹbere ye ndutịm oro ẹnamde (Eph 4:16): Ẹtiene ndausụn̄ ekededi oro esenyịn utom esop mbufo ọnọde. Edieke enyenede eyen ukpepn̄kpọ Bible oro mînen̄ekede idiọn̄ọ usem esop mbufo, dọhọ owo ke esop m̀mê otu oro ẹsemde usem esie ekpep enye n̄kpọ sia ikọ Abasi esisọp odụk owo esịt ke usem emi enye enen̄erede ọdiọn̄ọ.

  • Ẹtịm idem ọfọn (N̄ke 15:28; 16:⁠1): Edieke owo emi okụtde ke ufọk ke efakutom mbufo esemde usem en̄wen, domo ndikwọrọ ikọ nnọ enye. Ke ini etịmde idem, emekeme ndikere mban̄a nsio nsio usem oro ẹsisemde ke efakutom mbufo, onyụn̄ osio Bible ye mme vidio ke usem oro ọdọn̄ ke fon m̀mê tablet fo. Omonyụn̄ ekeme ndida JW Language n̄kpep nte ẹsikọmde owo ke ndusụk usem oro.