Be ka se isịnede

Be ka se isịnede

 NTE CHRISTIAN OKPODUDE UWEM

Yak Enenem Fi Ndikwọrọ Eti Mbụk

Yak Enenem Fi Ndikwọrọ Eti Mbụk

Ndi akanam akak fi ndikwọrọ ikọ? Esikak ediwak nnyịn ndusụk ini. Ntak esikakde? Ekeme ndidi ediwak owo ke efakutom nnyịn ẹsasua nnyịn, isimaha ndikpan̄ utọn̄ nnọ nnyịn, mîdịghe edi ke bụt esinam nnyịn ndineme nneme ye owo emi nnyịn mîdiọn̄ọke. Utọ n̄kpọ emi ekeme ndinam ukwọrọikọ odorode nnyịn. Edi Abasi emi inamde n̄kpọ inọ edi Abasi inemesịt, enye onyụn̄ oyom enenem nnyịn ndinam n̄kpọ esie. (Ps 100:2; 1Ti 1:11) Ndi ọmọfiọk ntak ita emi akpanade enenem nnyịn ndikwọrọ ikọ?

Akpa, eti mbụk oro ikwọrọde anam mme owo ẹnyene idotenyịn. Ediwak owo ke ererimbot emi inyeneke idotenyịn, edi nnyịn imekeme ndinam mmọ ẹnyene idotenyịn ke ini inọde mmọ “eti mbụk eti n̄kpọ.” (Isa 52:⁠7) Eti mbụk Obio Ubọn̄ ekeme ndinam nnyịn n̄ko ikop inemesịt. Ntem, mbemiso akade ukwọrọikọ, tie kere nti n̄kpọ oro Obio Ubọn̄ Abasi edinamde inọ nnyịn.

Udiana, eti mbụk emi ikwọrọde an̄wam mme owo ke nsio nsio usụn̄ onyụn̄ anam mmọ ẹdi ufan Abasi. Enye an̄wam mme owo ẹtre ndidu idiọk uwem ẹnyụn̄ ẹnyene idotenyịn ndidu uwem ke nsinsi. (Isa 48:​17, 18; Ro 1:16) Nnyịn itie nte mbon emi ẹsan̄ade ke ikọt ẹyom owo emi osopde. Kpa ye oro ndusụk owo mîyomke ẹnyan̄a mmọ, isụk ikaka iso iyom mbon oro ẹyomde ẹnyan̄a mmimọ.​—⁠Mt 10:​11-14.

Ọyọhọ ita, ukwọrọikọ anam ẹnọ Jehovah ubọn̄. Emi edi ata akpan ntak emi isikwọrọde ikọ. Jehovah enen̄ede ama nte nnyịn inamde utom ukwọrọikọ. (Isa 43:10; Heb 6:10) Enye ọnọ nnyịn edisana spirit esie man ikeme ndinam utom emi. Ke ntre, siben̄e Jehovah edisana spirit esie man okop idatesịt, sia idatesịt edi n̄kpọ kiet emi owụtde ke imenyene spirit Abasi. (Ga 5:22) Spirit Abasi ayan̄wam nnyịn ikûtịmede esịt, enye n̄ko edinyụn̄ anam nnyịn ikwọrọ ikọ uko uko. (Ut 4:31) Edisụk enenem nnyịn ndikwọrọ eti mbụk idem edieke mme owo ke efakutom nnyịn mîkpan̄ke utọn̄ inọ nnyịn.​—⁠Eze 3:⁠3.

Didie ke afo akpama ndinam utom ukwọrọikọ? Didie ke ekeme ndiwụt ke esinenem fi ndikwọrọ ikọ?

ẸSE VIDIO EMI, TIE KERE SE EKPEPDE MAN ESỊT ADAT FI, EKEM ẸBỌRỌ MME MBỤME EMI:

  • Ntak emi anade isikpep Ikọ Abasi kpukpru ini, idem ekpededi imesibiat ediwak hour ikwọrọ ikọ kpukpru ọfiọn̄?

  • Didie ke ikeme ndikpebe Mary?

  • Ini ewe ke afo esikpep onyụn̄ etie ekere Ikọ Abasi?

  • Nso ke esinen̄ede ama ke ini ọkwọrọde ikọ?