Be ka se isịnede

Nte Ẹkpenịmde Mbono Esop Uwem ye Utom Nnyịn

Nte Ẹkpenịmde Mbono Esop Uwem ye Utom Nnyịn

Se Isịnede

1. Ẹdinịm mbono esop emi nte ẹtịn̄de ke N̄wed Mbono Esop Uwem ye Utom Nnyịn ye nte ẹwụtde ke n̄wed emi. Mbọk ẹdọhọ kpukpru mme asuanetop ẹben̄e idem ndinam se ẹnọde mmọ ẹnam. Ẹkeme n̄ko ndinọ mbon oro mîdịghe kan̄a mme asuanetop utịn̄ikọ eyen ufọkn̄wed edieke mmọ ẹnyịmede se Bible ekpepde, ẹdude uwem nte Bible ọdọhọde, ẹsinyụn̄ ẹdụkde mbono esop kpukpru ini.​—be p. 282.

NTỌN̄ỌIKỌ

 2. Minit kiet. Ke ẹma ẹkekwọ ikwọ ẹnyụn̄ ẹbọn̄ akam, etieibuot okpokoro Mbono Esop Uwem ye Utom Nnyịn eyetịn̄ ikọ ifan̄ emi edinamde mbono esop usen oro ọdọn̄ kpukpru owo. Enye ekpetịn̄ mme n̄kpọ oro ẹdinen̄erede inyene ufọn inọ esop.

MME AKPAN N̄KPỌ KE IKỌ ABASI

  3. Utịn̄ikọ: Minit duop. Ẹwet ibuotikọ ye akpan n̄kpọ iba m̀mê ita oro ẹdinemede ke N̄wed Mbono Esop Uwem ye Utom Nnyịn. Ebiowo m̀mê asan̄autom unamutom oro odotde ke ẹkpenọ utịn̄ikọ emi. Edieke itie Bible oro ẹkedọhọde ẹkot urua oro edide akpa ibuot n̄wed Bible, ẹyebre vidio  emi editịn̄de n̄kpọ iban̄a n̄wed Bible oro. Etịn̄ikọ ekeme ndiwụt nte vidio oro enyenede n̄kpọ ndinam ye ibuotikọ oro enye enemede. Edi, akpana enye okụt ete ke imeneme mme akpan n̄kpọ oro ẹsiakde ke N̄wed Mbono Esop Uwem ye Utom Nnyịn. Edieke ini odude, enye ekpenyene nditịn̄ n̄ko mban̄a mme ndise ye mme akpan n̄kpọ oro ẹsiode ẹwụt ke itie Bible oro ẹkedọhọde ẹkot urua oro. Ẹdọn̄ mme n̄kpọ emi man ẹda ẹdian ẹkpep esop n̄kpọ.

 4. Yom N̄kpọuto ke Ikọ Abasi: Minit duop. Enye emi edidi mbụme ye ibọrọ, inyeneke ntọn̄ọikọ ye utịtikọ. Ebiowo m̀mê asan̄autom unamutom oro odotde edinam. Sia ikpehe emi enyenede mbụme inan̄, enye ekeme ndibiere m̀mê minit ifan̄ ke idida ineme mbụme kiet kiet etiene se inen̄erede ibehe esop. Edi akpana enye obụp otuowo kpukpru mbụme inan̄ oro. Enye ekeme ndibiere n̄ko m̀mê ẹkpekokot kpukpru ufan̄ikọ Bible oro ẹsiakde ẹsịn ke akpa ye ọyọhọ mbụme iba. Mbon oro ẹbọrọde mbụme ẹkpebọrọ ke sekọn 30 m̀mê osụhọrede akan oro.

  5. Edikot Bible: Minit inan̄ m̀mê osụhọrede akan oro. Ẹdinọ eyenete eren. Enye ekpenyene ndikot itie oro ẹnọde enye, itịn̄ke ntọn̄ọikọ m̀mê utịtikọ. Etieibuot okpokoro mbono esop eyenen̄ede an̄wam nditọ ufọkn̄wed ẹkot n̄wed ọfọn, ọdọnọ, onyụn̄ an̄wan̄a owo; ẹmenede ẹnyụn̄ ẹsụhọde uyo ke ebiet oyomde ẹnam ntre, ẹtuak ẹda esisịt ke ebiet ẹkpetuakde ẹda, ẹnyụn̄ ẹkot enye nte mmọ ẹsitịn̄de ikọ. Sia ndusụk itie Bible emi ẹdọhọde ẹkot esiniọn̄de akan ndusụk, akpana esenyịn Mbono Esop Uwem ye Utom Nnyịn ekere aban̄a ukeme eyen ufọkn̄wed kiet kiet mbemiso enye ọnọde mmọ edikot Bible.

KPEP NDIKWỌRỌ IKỌ ỌFỌN

 6. Minit efịt m̀mê osụhọrede akan oro. Ikpehe mbono esop enye emi ọyọnọ kpukpru owo ifet ndikpep se mmọ ẹdikwọrọde, onyụn̄ owụt nte ẹkpekwọrọde ikọ ẹnyụn̄ ẹkpepde owo n̄kpọ ọfọn. Nditọ ufọkn̄wed oro ẹnọde akpa ini ye mfiakn̄ka ẹkpetiene se idude ke akpa page N̄wed Mbono Esop Uwem ye Utom Nnyịn. Mme asuanetop ẹkeme ndimek ndinọ n̄wed m̀mê ndiwụt vidio oro esop Abasi ẹdọhọde isida ikpep mme owo n̄kpọ. Se ekemede nditịn̄ emi odude ke N̄wed Mbono Esop Uwem ye Utom Nnyịn enyene ikpehe emi ẹkotde, “Itien̄wed Emi Odu ke Mme Akpan N̄kpọ Isidade Ikpep Owo Bible.” Ikpehe emi eyenen̄ede an̄wam nnyịn ke utom ukwọrọikọ nnyịn. Nditọ ufọkn̄wed ẹdibiere m̀mê iyada ikpehe emi inam n̄kpọ ke ini ẹnọde mmọ n̄kpọ ẹnam. N̄wed Mbono Esop Uwem ye Utom Nnyịn owụt ini oro anade eyen ufọkn̄wed kiet kiet ada anam se ẹnọde enye; ndusụk ini n̄wed emi esinyụn̄ etịn̄ nte ẹyomde eyen ufọkn̄wed kiet kiet anam se ẹnọde enye. Ikpanaha eyen ufọkn̄wed ada n̄kpọ en̄wen emi mîsịneke ke se ẹkenọde enye edidian man ini esie emi ọyọhọde osụhọ okụre. Ndusụk mbon oro ẹnen̄erede ẹtịm idem ẹsikụre se ẹnọde mmọ ẹnam minit kiet m̀mê akande oro ke ososụhọ. Ẹkeme ndinọ mbiowo utịn̄ikọ eyen ufọkn̄wed ini ekededi oro ẹkụtde ke ọfọn ẹnam ntre.

 7. Mme Vidio Oro Ẹwụtde Nte Ikpọkwọrọde Ikọ: Kpukpru ọfiọn̄, ẹyesibre nsio nsio vidio emi owụtde nte ikpọkwọrọde ikọ ẹnyụn̄ ẹneme mme akpan n̄kpọ ke vidio oro. Mme vidio emi ẹdiwụt nte ikpọkwọrọde ikọ akpa ini oro isobode owo ye nte ikpanamde akpa ye udiana mfiakn̄ka. Etieibuot okpokoro Mbono Esop Uwem ye Utom Nnyịn edinam emi.

 8. Akpa Ini: Ẹkeme ndinọ eyenete eren m̀mê eyenete an̄wan utịn̄ikọ eyen ufọkn̄wed emi. Ke ini ẹnọde eyenete eren, andin̄wam ekpenyene ndidi eyenete eren n̄ko m̀mê owo ke ufọk mmọ. Ke ini ẹnọde eyenete an̄wan, andin̄wam ekpenyene ndidi eyenete an̄wan n̄ko m̀mê owo ke ufọk mmọ. Mmọ ẹkeme nditetie mîdịghe ẹdada. Eyen ufọkn̄wed ekpenyene ndikọm enyeneufọk nte ẹsinyụn̄ ẹkọmde owo ke edem mmọ. Ẹkpenyene nditiene se idude ke “Se Ekemede Nditịn̄” ke akpa page N̄wed Mbono Esop Uwem ye Utom Nnyịn.

 9. Mfiakn̄ka: Ẹkeme ndinọ eyenete eren m̀mê eyenete an̄wan utịn̄ikọ eyen ufọkn̄wed emi. Ke ini ẹnọde eyenete eren, andin̄wam ekpenyene ndidi eyenete eren n̄ko. Ke ini ẹnọde eyenete an̄wan, andin̄wam ekpenyene ndidi eyenete an̄wan n̄ko. (km 5/97 p. 2) Mmọ ẹkeme nditetie mîdịghe ẹdada. Eyen ufọkn̄wed ekpenyene ndinam n̄wụt se ẹkpetịn̄de ke ini ẹfiakde ẹka ẹbịne owo oro akakpan̄de  utọn̄ akpa ini emi ẹkekwọrọde ikọ ẹnọ enye. Ẹkpenyene nditiene se idude ke “Se Ekemede Nditịn̄” ke akpa page N̄wed Mbono Esop Uwem ye Utom Nnyịn.

 10. Ukpepn̄kpọ Bible: Ẹkeme ndinọ eyenete eren m̀mê eyenete an̄wan utịn̄ikọ eyen ufọkn̄wed emi. Ke ini ẹnọde eyenete eren, andin̄wam ekpenyene ndidi eyenete eren n̄ko. Ke ini ẹnọde eyenete an̄wan, andin̄wam ekpenyene ndidi eyenete an̄wan n̄ko. (km 5/97 p. 2) Mmọ ẹkeme nditetie mîdịghe ẹdada. Ke ini ẹnọde fi ukpepn̄kpọ Bible, kûtịn̄ n̄kpọ emi owụtde ke ẹyom nditọtọn̄ọ ukpepn̄kpọ Bible idaha oro, edi yak otuowo ẹkụt nte afo osụk ekpepde owo n̄kpọ. Ufọn idụhe ndikọm enyeneufọk m̀mê ndidọhọ enye ke iyom nditọn̄ọ mi m̀mê ke iyom nditre mi mfịn ibọhọke se ẹsede fi edi oro. Idịghe ibet ke ana okot kpukpru ikpehe, inyụn̄ idiọkke ndikot edieke amade. Akpan n̄kpọ emi ẹyomde nditọete ẹkụt edi eti usụn̄ emi ẹkpenịmde ukpepn̄kpọ Bible.

 11. Utịn̄ikọ: Eyenete eren ke ẹdinọ utịn̄ikọ eyen ufọkn̄wed enye emi. Enye okponyụn̄ ọnọ nte ẹsinọde utịn̄ikọ ofụri owo.

NTE CHRISTIAN OKPODUDE UWEM

 12. Ke ẹma ẹkekwọ ikwọ, ikpehe enye emi edidi minit 15. Ndusụk ini, ẹdinam n̄kpọ kiet m̀mê iba kpọt. Se ẹdinemede ayan̄wam kpukpru nnyịn ida se ikpepde ke Bible idu uwem. Ibọhọke ẹsiak akpan owo emi ẹdọhọde anam, mbiowo m̀mê mme asan̄autom unamutom oro ẹdotde ẹdinam n̄kpọ ke ikpehe enye emi. Edi edieke edide “Se Ẹyomde Ẹneme ke Esop,” ebiowo edinam.

  13. Ukpepn̄kpọ Bible Esop: Minit edịp ye duop m̀mê osụhọrede akan oro. Ẹkpenọ ebiowo emi enen̄erede ọdiọn̄ọ ndikpep n̄kpọ. (Ke mme esop oro mbiowo mîwakke, ẹkeme ndinọ mme asan̄autom unamutom emi ẹfiọkde ndikpep n̄kpọ.) Otu mbiowo ẹdibiere m̀mê anie odot ndinịm Ukpepn̄kpọ Bible Esop. Akpana ẹmek mbon oro ẹdikemede ndinịm ukpepn̄kpọ emi ọfọn inyụn̄ idiaha ini. Akpana mmọ ẹnen̄ede ẹfiọk ndinam mme akpan itie N̄wed Abasi oro ẹdude ke ukpepn̄kpọ oro an̄wan̄a owo, ẹnyụn̄ ẹkeme ndin̄wam kpukpru owo ẹkụt nte ẹkpedade se ẹkpepde ẹdu uwem. Ndikot nte ẹdọhọde ẹsinịm Ukpepn̄kpọ Enyọn̄-Ukpeme ayan̄wam mbon oro ẹsinịmde Ukpepn̄kpọ Bible Esop. Ke ẹma ẹkekụre ndikpep se ẹkedọhọde ẹkpep urua oro, ufọn idụhe ada Ukpepn̄kpọ Bible Esop ndisụk nyịre ndọhọ ke ana imọ ida minit 30. Edieke mbon oro ẹmekde ẹsinịm ukpepn̄kpọ emi ye mbon oro ẹsikotde ikpehe ẹwakde, ọkpọfọn nsio nsio owo ẹsinịm ukpepn̄kpọ emi, nsio nsio owo ẹnyụn̄ ẹkot ikpehe kpukpru urua. Edieke etieibuot okpokoro Mbono Esop Uwem ye Utom Nnyịn ọdọhọde ada ukpepn̄kpọ osụhọ ndusụk ini ọnọ imọ, ada ukpepn̄kpọ edibiere nte enye edinamde oro. Enye ekeme ndidọhọ ẹkûkot ndusụk ikpehe man okposụhọ ini ọnọ etieibuot okpokoro mbono esop.

UTỊTIKỌ

  14. Minit ita m̀mê osụhọrede akan oro. Etieibuot okpokoro Mbono Esop Uwem ye Utom Nnyịn eyetịn̄ akpan n̄kpọ ifan̄ oro ẹkpepde usen oro onyụn̄ etịn̄ se ẹdikpepde urua en̄wen. Enye onyụn̄ ekeme ndibụp mbụme emi ẹdibọrọde urua en̄wen. Enye ekeme ndisiak enyịn̄ nditọ ufọkn̄wed oro ẹdinamde n̄kpọ urua en̄wen, edieke ini odude. Etieibuot okpokoro ekpenyene ndida ini emi n̄ko nnọ ntọt ekededi emi ẹkụtde ke oyom ẹnọ nnyụn̄ n̄kot leta emi ẹdọhọde ẹkot ẹnọ esop, ibọhọke ẹsiak ini en̄wen emi ẹkpenamde emi. Enye ikpadaha ini emi ikot mme utọ n̄kpọ nte ndutịm an̄wautom m̀mê ndutịm edinịm Ufọkmbono Obio Ubọn̄ asana, edi ẹkpedian mme utọ n̄kpọ oro ke obukpọk ntọt. Edieke ini oro ẹnọde mi mîdikemke se enye adade ọnọ ntọt m̀mê okot leta, akpana enye ọdọhọ nditọete emi ẹnọde n̄kpọ ẹnam ke ikpehe mbono esop emi ẹkotde Nte Christian Okpodude Uwem, ẹsụhọ ini ẹnọ imọ. (Se  ikpehe 13 ye  17.) Ẹyekwọ ikwọ ẹnyụn̄ ẹbọn̄ akam ẹberi mbono esop emi.

SỊN IDEM KPEP NDIKOT N̄WED NNỌ OWO NNYỤN̄ N̄KPEP OWO N̄KPỌ

 15. Akpana eyen ufọkn̄wed kiet kiet ada n̄wed Ukpepn̄kpọ edi Mbono Esop Uwem ye Utom Nnyịn, edide edi enye oro ẹmịn̄de-mịn̄ m̀mê enye oro odude ke fon. Etieibuot okpokoro Mbono Esop Uwem ye Utom Nnyịn ekpenyene ndisio n̄kpọ ke n̄wed oro nda ntoro nditọ ufọkn̄wed nnyụn̄ nnọ  mmọ item. Akpana eyen ufọkn̄wed kiet kiet anam se ẹnọde enye nte ẹdọhọde ke nọmba emi ẹwetde ke N̄wed Mbono Esop Uwem ye Utom Nnyịn. Oyokụt ikpehe emi ẹkotde “Wet Nte Akanamde” ke n̄wed Ukpepn̄kpọ oro; eyen ufọkn̄wed kiet kiet ediwet n̄kpọ ke ebiet emi, idịghe etieibuot okpokoro ediwet.

ITEM

  16. Ke ini eyen ufọkn̄wed kiet kiet anamde n̄kpọ ama, etieibuot okpokoro Mbono Esop Uwem ye Utom Nnyịn ayada n̄kpọ nte minit kiet otoro eyen ufọkn̄wed oro onyụn̄ ada n̄wed Ukpepn̄kpọ ọnọ enye item ke ebiet oro enye mîkanamke ọfọn. Ke ini etieibuot okpokoro okotde eyen ufọkn̄wed edinam se ẹkenọde enye, enye idisiakke se ẹsede eyen ufọkn̄wed oro. Edi, eyen ufọkn̄wed ama anam n̄kpọ ama, enye oyotoro enye ke se enye anamde ọfọn; enye ekeme nditịn̄ se ẹkesede eyen ufọkn̄wed oro onyụn̄ etịn̄ se inamde enye ọdọhọ ke eyen ufọkn̄wed oro anam ọfọn, mîdịghe etịn̄ ntak emi eyen ufọkn̄wed oro akpanamde se ẹkesede enye afiak ọfọn akan oro. Etieibuot okpokoro ekeme nditịn̄ n̄kpọ en̄wen emi enye okụtde ke eyenyene ufọn ọnọ eyen ufọkn̄wed oro m̀mê otuowo. Ke mbono esop ama akasuana m̀mê ke ini en̄wen, enye ekeme ndida se idude ke n̄wed Ukpepn̄kpọ m̀mê ke n̄wed Ufọkn̄wed Utom nnọ eyen ufọkn̄wed item emi edin̄wamde enye, edi ọkpọfọn edi sụk enye ye eyen ufọkn̄wed oro. Item emi ekeme ndiban̄a se ẹkesede eyen ufọkn̄wed m̀mê n̄kpọ en̄wen.​—Se  ikpehe 17 22, ye  24 edieke oyomde ndifiọk n̄kpọ en̄wen mban̄a utom etieibuot okpokoro Mbono Esop Uwem ye Utom Nnyịn ye utom udiana ọnọitem.

INI

     17. Ikpanaha owo ndomokiet adia ini; se etieibuot okpokoro Mbono Esop Uwem ye Utom Nnyịn etịn̄de ikponyụn̄ ibehe ini emi ẹnọde enye. Ẹkpenyene ndida mbufiọk nnam nditọ ufọkn̄wed ẹdiọn̄ọ ke ini mmọ okụre. Edieke mbon en̄wen ẹdiade ini, udiana ọnọitem ekpenyene ndinọ mmọ item ke ndịbe. (Se  ikpehe 24.) Mbono esop emi, esịnede ikwọ ye akam, ikpebehe hour 1 ye minit 45.

URUA EMI ESENYỊN CIRCUIT EDIDE

 18. Ke urua emi esenyịn circuit edide esop, ẹkpenịm mbono esop emi nte ẹtịn̄de ke N̄wed Mbono Esop Uwem ye Utom Nnyịn. N̄kukụre se owo mîdinamke edi Ukpepn̄kpọ Bible Esop, sia esenyịn circuit edida minịt 30 oro inọ akpa utịn̄ikọ esie. Mbemiso esenyịn circuit ọnọde utịn̄ikọ emi, etieibuot okpokoro Mbono Esop Uwem ye Utom Nnyịn eyetịn̄ akpan n̄kpọ ifan̄ oro ẹkpepde usen oro, etịn̄ se ẹdikpepde urua en̄wen, ọnọ ntọt ekededi oro ẹyomde ẹnọ, onyụn̄ okot leta oro ẹyomde ẹkot, ndien ekem okot esenyịn circuit edinọ utịn̄ikọ esie. Ke esenyịn circuit ama ọkọnọ utịn̄ikọ ama, enye edimek ikwọ emi ẹdikwọde isuana. Enye ekeme ndikot eyenete en̄wen edibọn̄ akam usuana. Esop emi esenyịn circuit edide edise idinamke n̄kpọ ke udiana ubet ukpepn̄kpọ ke usen emi ẹnịmde Mbono Esop Uwem ye Utom Nnyịn. Edieke esop ẹnyenede otu, otu oro ẹkeme ndisụk nnịm mbono esop mmọ ke udiana ubet ukpepn̄kpọ ke ini esenyịn circuit edide esop emi ẹsede ẹban̄a mmọ. Mmọ ẹkpenyene nditiene esop emi ẹsede ẹban̄a mmọ n̄kop utịn̄ikọ esenyịn circuit.

URUA MBONO CIRCUIT M̀MÊ AKAMBA MBONO

 19. Owo idinịmke mbono esop ndomokiet ke urua oro esop ẹnyenede mbono circuit m̀mê akamba mbono. Owo kiet kiet ekpenyene ndikpep se ẹkpekpepde ke mbono esop urua oro ke idemesie, mîdịghe ubon ẹtie kiet ẹkpep.

URUA EDITI

 20. Edieke Editi ọduọde ke Monday esịm Friday, owo idinịmke mbono esop ufọturua urua oro. Edi ẹkpenyene ndinịm mbono an̄wautom ke usen Editi.

ESENYỊN MBONO ESOP UWEM YE UTOM NNYỊN

 21. Otu mbiowo ẹyemek ebiowo kiet edi esenyịn Mbono Esop Uwem ye Utom Nnyịn. Enye enyene ndikụt nte ke ẹnịm mbono esop emi ọfọn, ke ẹnyụn̄ ẹtiene ndausụn̄ oro inọde mi. Enye ye udiana ọnọitem ẹkpenyene ndidiana kiet nnam utom mmọ. Ke ndondo oro N̄wed Mbono Esop  Uwem ye Utom Nnyịn edide edisịm, esenyịn Mbono Esop Uwem ye Utom Nnyịn ekpenyene ndinọ nditọ ufọkn̄wed se mmọ ẹdinamde ọfiọn̄ oro. (Se  ikpehe 5-11.) Ẹkpenyene ndibabak nda babru Se Ẹnọde Fi Anam ke Mbono Esop Uwem ye Utom Nnyịn (S-89) nnọ nditọ ufọkn̄wed se mmọ ẹdinamde. Ẹkpenyene ndinọ mmọ babru emi urua ita ke nsụhọde n̄kaha mbemiso usen emi mmọ ẹdinamde n̄kpọ.

ETIEIBUOT OKPOKORO MBONO ESOP UWEM YE UTOM NNYỊN

  22. Kpukpru urua, ebiowo kiet edidi etieibuot okpokoro Mbono Esop Uwem ye Utom Nnyịn. (Ke mme esop oro mbiowo mîwakke, ẹkeme ndidọhọ asan̄autom unamutom oro odotde edi etieibuot okpokoro.) Enye editịm ntọn̄ọikọ ye utịtikọ esie, onyụn̄ eneme vidio ekededi oro owụtde nte ikpọkwọrọde ikọ. Enye n̄ko edineme vidio emi owụtde ukpepn̄kpọ kiet kiet ke n̄wed Ukpepn̄kpọ. Enye edikot kpukpru mbon oro ẹnyenede n̄kpọ ke mbono esop usen oro ẹdinam se ẹkenọde mmọ. Enye ekeme nditiene nnam n̄kpọ n̄ko ke mbono esop usen oro edieke mbiowo mîwakke. Enye ikpetịn̄ke ikọ awak akaha ke owo kiet kiet ama okokụre se ẹkenọde enye anam. Otu mbiowo ẹdimek mbiowo emi ẹdotde ndidi mme etieibuot okpokoro Mbono Esop Uwem ye Utom Nnyịn. Mbiowo emi ẹdisinịm mbono esop emi ke ini ke ini. Etiene nte n̄kpọ etiede ke esop, ẹkeme ndisinọ esenyịn Mbono Esop Uwem ye Utom Nnyịn etieibuot okpokoro mbono esop ndien ndien akan nte ẹnọde mbiowo eken emi otu mbiowo ẹkemekde. Edieke ebiowo odotde ndinịm Ukpepn̄kpọ Bible Esop, ekeme ndidi enye oyodot n̄ko ndidi etieibuot okpokoro mbono esop emi. Mbọk ẹti ke edi utom ebiowo emi edide etieibuot okpokoro mbono esop ndisitoro mbon oro ẹnyenede utịn̄ikọ eyen ufọkn̄wed nnyụn̄ nnọ mmọ item ke ima ima usụn̄. Enye onyụn̄ enyene ndikụt nte ke mbono esop asuana ke ini. (Se  ikpehe 14 ye  17.) Edieke enye amade, edieke ufan̄ onyụn̄ okponde ekem ke mbot utịn̄ikọ, ẹkeme ndiwụk n̄kpọ utin̄ikọ en̄wen nnọ enye man nte enye osụk okotde owo ọdọk edi, owo oro ama asasan̄a edisịm okpokoro utịn̄ikọ. Enye onyụn̄ ekeme ndimek nditie ke okpokoro ke mbot utịn̄ikọ n̄kot eyen ufọkn̄wed emi edikotde Bible ye mbon oro ẹnọde n̄kpọ ẹnam ke ikpehe oro ẹkotde Kpep Ndikwọrọ Ikọ Ọfọn. Ndinam ntem idiyakke ẹbiat ini.

ANAM-NDUTỊM OTU MBIOWO

 23. Anam-ndutịm otu mbiowo m̀mê ebiowo emi esin̄wamde enye edideme kpukpru se ẹdinamde ke mbono esop emi, ke ẹsiode utịn̄ikọ nditọ ufọkn̄wed ẹfep. Emi esịne ndinọ mbon emi otu mbiowo ẹkemekde ẹdi mme etieibuot okpokoro Mbono Esop Uwem ye Utom Nnyịn n̄kpọ ẹnam kpukpru urua. Anam-ndutịm otu mbiowo ye esenyịn Mbono Esop Uwem ye Utom Nnyịn ẹkpenyene ndikụt nte ke ẹdian enyịn̄ kpukpru mbon oro ẹdinamde n̄kpọ ke mbono esop ke obukpọk ntọt.

UDIANA ỌNỌITEM

   24. Edieke ebiowo emi ọfiọkde ndinọ utịn̄ikọ ọfọn odude, ọkpọfọn enye edi udiana ọnọitem. Ke ini mbiowo ye mme asan̄autom unamutom ẹnamde n̄kpọ ke Mbono Esop Uwem ye Utom Nnyịn, ẹnọde utịn̄ikọ ofụri owo, ẹkotde ikpehe m̀mê ẹnịmde Ukpepn̄kpọ Enyọn̄-Ukpeme m̀mê Ukpepn̄kpọ Bible Esop, udiana ọnọitem ọyọnọ mmọ item ke ndịbe edieke enye okụtde ke ọfọn inam ntre. (Se  ikpehe 17.) Edieke mbiowo emi ẹfiọkde ndinọ utịn̄ikọ ọfọn ẹnyụn̄ ẹfiọkde ndikpep esop n̄kpọ ẹwakde ke esop, otu mbiowo ẹkeme ndimek owo mmọ kiet kiet edi udiana ọnọitem ke isua kiet kiet. Udiana ọnọitem inyeneke ndinọ owo item kpukpru ini emi owo anamde n̄kpọ.

MME UDIANA UBET UKPEPN̄KPỌ

 25. Edieke nditọ ufọkn̄wed ẹwakde, ẹkeme ndibahade ndusụk mmọ ndọn̄ ke mme udiana ubet ukpepn̄kpọ. Ẹkpenyene ndimek owo emi odotde edi ọnọitem ke ubet ukpepn̄kpọ emi, ndien ọkpọfọn enye edi ebiowo. Edi edieke mbiowo mîwakke ikem, ẹkeme ndinọ asan̄autom unamutom oro odotde utom emi. Otu mbiowo ẹdibiere m̀mê anie odot ndidi ọnọitem, n̄ko m̀mê ẹkpedi owo kiet ama anam isua emi, owo en̄wen anam isua en̄wen. Ọnọitem emi ekpenyene nditiene ndausụn̄ oro odude ke ọyọhọ  ikpehe 16. Edieke esop ẹnyenede udiana ubet ukpepn̄kpọ, ẹkpenyene ndidọhọ nditọ ufọkn̄wed ẹwọrọ ẹka do ke ẹma ẹkekụre Yom N̄kpọuto ke Ikọ Abasi mbemiso ẹtọn̄ọde Edikot Bible. Mmọ ẹkpenyene ndinyọn̄ ndi mbemiso ofụri esop ẹtọn̄ọde ikpehe mbono esop emi  ẹkotde Nte Christian Okpodude Uwem. Ke ini ẹnemede vidio oro owụtde nte ikpọkwọrọde ikọ, mbon oro ẹdude ke udiana ubet ukpepn̄kpọ ẹkpetie do ẹse vidio oro ẹnyụn̄ ẹkpan̄ utọn̄ ẹkop se ẹnemede, edieke mmọ ẹkemede nditie do nse. Edieke mmọ mîkemeke, ọnọitem ekpenyene ndida fon m̀mê tablet n̄wụt mmọ nnyụn̄ nneme vidio oro.

MME VIDIO

 26. Ẹyesibre mme vidio ke mbono esop emi. Ẹdidọn̄ mme vidio emi ke JW Library®. Ẹkeme ndikama nsio nsio fon, tablet, ye laptop nsion̄o mmọ mbre. Ndusụk ini, ẹkeme ndibre vidio oro owụtde nte ikpọkwọrọde ikọ ke ini ẹnịmde mbono an̄wautom. Mbọk ẹkpeyom ndibre, ẹbre enye oro ẹma ẹkebebre ke Mbono Esop Uwem ye Utom Nnyịn.

© 2019 2019 Watch Tower Bible and Tract Society of Pennsylvania

S-38-EF 11/19