Be ka se isịnede

Be ka se isịnede

Mme Demon Ẹdọhọ ke Nsu Ẹte ke Mme Akpan̄kpa ke Ẹdu Uwem

Mme Demon Ẹdọhọ ke Nsu Ẹte ke Mme Akpan̄kpa ke Ẹdu Uwem

Bible ọdọhọ ete ke Satan edi “andibian̄a ofụri ererimbot.” (Ediyarade 12:9) Satan ye mme demon esie iyomke nnyịn inịm Ikọ Abasi, kpa Bible ke akpanikọ. Mmọ ẹn̄wana ndinam mme owo ẹnịm ke akpanikọ nte ke mme akpan̄kpa ke ẹdu uwem ke ebiet kiet ke obio mme spirit. Ẹyak nnyịn ise nte mmọ ẹnamde oro.

Nsunsu Ido Ukpono

Mme owo, unam, iyak, ye mme inuen​—kpukpru ẹdi ukpọn̄

Ediwak ido ukpono ẹkpep ẹte ke kpukpru owo ẹnyene ukpọn̄ oro esibede odụk obio mme spirit ke ata ikpọkidem ama akakpa. Mmọ ẹdọhọ ẹte ke ikpọkidem esikpa edi ukpọn̄ isikpaha. Akande oro, mmọ ẹdọhọ ẹte ke ukpọn̄ ikemeke ndikpa.

Edi Ikọ Abasi ikpepke oro. Bible owụt ete ke owo edi ukpọn̄, idịghe n̄kpọ oro esịnede-sịne owo ke idem. Ke uwụtn̄kpọ, ke etịn̄de n̄kpọ aban̄a nte ẹkebotde Adam, Bible obụk ete: “Ndien Jehovah Abasi obot owo ke ntan isọn̄, onyụn̄ ọduọk ibifịk uwem esịn ke odudu ibuo esie; ndien owo akabade edi ukpọn̄ eke odude uwem.” (Genesis 2:7) Ntre owo ikọnọhọ-nọ Adam ukpọn̄; enye ekedi ukpọn̄ oro.

 Ẹkot mme unam n̄ko ukpọn̄.​—Genesis 1:​20, 21, 24, 30.

Sia ikọ Bible oro “ukpọn̄” ọwọrọde owo oro ke idemesie, ikpakpaha nnyịn idem ndifiọk nte ke ukpọn̄ ẹkeme ẹnyụn̄ ẹsikpan̄a. N̄wed Abasi ọdọhọ ete:

  • “Ukpọn̄ eke anamde idiọk eyekpa n̄kpa.”​Ezekiel 18:4.

  • “Ndien Samson ọdọhọ ete: ‘Yak ukpọn̄ mi akpa n̄kpa ye mme Philistine.’”​—Judges 16:​30NW.

  • “Nte enen ndinam ufọn ke sabbath, m̀mê ndinam idiọk? Ndinyan̄a uwem [“ukpọn̄,” NW] owo, m̀mê ndiwot?​Mark 3:4.

Bible owụt ete ke ukpọn̄ idịghe n̄kpọ oro mîkemeke ndikpa

Mme itien̄wed Abasi eken ẹmewụt ẹte ke ẹkeme ndisobo ukpọn̄ (Genesis 17:14), ẹwot ke ofụt (Joshua 10:37), ibifịk ababa (Job 7:15), onyụn̄ akpa ke mmọn̄ (Jonah 2:5). Ntre, ukpọn̄ akpakpa n̄kpa.

Edieke afo okotde ofụri Bible, tutu amama afo udukwe ikọ oro “ukpọn̄ ikpaha ke nsinsi.” Ukpọn̄ owo idịghe spirit. Ukpepn̄kpọ ukpọn̄ ikpaha ke nsinsi idịghe ukpepn̄kpọ a-Bible. Enye edi ukpepn̄kpọ Satan ye mme demon esie. Jehovah asasua kpukpru nsu ido ukpono.​—Mme N̄ke 6:​16-19; 1 Timothy 4:​1, 2.

 Mme Enyene Nsan̄a-Ekpo

Ke akpanikọ mme demon ẹsinam nte idi spirit mme akpan̄kpa

Usụn̄ efen oro Satan adade abian̄a mme owo ebe ke mme enyene nsan̄a-ekpo. Enyene nsan̄a-ekpo edi owo oro ekemede ndibọ etop nnennen nto ererimbot spirit. Ata ediwak owo, esịnede mme enyene nsan̄a-ekpo ke idemmọ, ẹnịm ke akpanikọ ẹte ke mme etop ẹmi ẹsito spirit mme akpan̄kpa ẹdi. Edi nte nnyịn ima ikokụt ke Bible, emi ikemeke-keme nditịbe.​—Ecclesiastes 9:​5, 6, 10.

Mmanie, ndien, ke mme etop ẹmi ẹsito ẹdi? Mme demon ke idemmọ! Mme demon ẹnyene ukeme ndiwụk ntịn̄enyịn ke idem owo ke ini owo oro odude uwem; mmọ ẹfiọk nte owo oro ekesitịn̄de ikọ, nte enye eketiede, se enye ekesinamde, ye se enye ọkọfiọkde. Ntre edi mmemmem n̄kpọ mmọ ndikpebe mme owo oro ẹma ẹkekpan̄a.​—1 Samuel 28:​3-19.

 Mme Nsunsu Mbụk

Usụn̄ efen oro Satan emenerede nsu ke enyọn̄ aban̄a mme akpan̄kpa esibe ke mme nsunsu mbụk. Mme utọ mbụk ntre ẹsiwak ndiwọn̄ọde mme owo n̄kpọn̄ akpanikọ Bible.​—2 Timothy 4:4.

Ndusụk owo ẹkere ke mmimọ ima ikụt mme owo oro ẹketode itie n̄kpa ẹdi

Ke Africa, ediwak n̄ke ẹdu oro aban̄ade mme owo ẹmi ẹkekụtde nte ẹdude uwem ke mmọ ẹma ẹkekpan̄a. Ke uwụtn̄kpọ, mme utọ n̄kpọ oro ẹsikụtde mi ẹsiwak ndida itie ke ebiet oro oyomde usụn̄ ọkpọn̄ ebiet owo oro okodụn̄de. Edi bụp idemfo: ‘Nte oro owụt ifik nte ke edieke owo ekpenyenede odudu ndiwọrọ ke itie n̄kpa ndi, nte enye akpaka okodu ke ebiet oro oyomde usụn̄ ọkpọn̄ ubon ye mme ufan esie?’

N̄ko, ndi ikam idịghe nte ke owo oro ẹkụtde mi n̄kukụre ebiet owo oro akakpade? Ke uwụtn̄kpọ, asan̄autom Christian iba ẹmi ẹkekwọrọde ikọ ke mbọhọ idụt kiet ẹma ẹkụt akanieren kiet emi eketienede mmọ ke edem ke ndusụk hour. Ke ini mmọ ẹkebụpde enye mbụme, mmọ ẹma ẹdifiọk ẹte ke eren oro ekekere ete ke kiet ke otu mme asan̄autom oro ekedi eyeneka esie emi akakpade ke ndusụk isua ke edem edem. Ke akpanikọ, enye ama anam ndudue, edi enye ama esịn ndinịm ke akpanikọ nte ke imọ ikanam ndudue. Kam kere ban̄a mbụk oro akanieren emi ke ukperedem eketịn̄de ọnọ mme ufan ye mme mbọhọidụn̄ esie!

 Mme N̄kukụt, Mme Ndap, ye Mme Uyo

Mme demon ẹsibian̄a owo ebe ke mme ndap, mme n̄kukụt, ye mme uyo

Nte eyịghe mîdụhe, anaedi afo ọmọfiọk aban̄a isen isen n̄kpọ oro mme owo ẹkụtde, ẹkopde, m̀mê ẹdabade ẹban̄a. Mme utọ ifiọk n̄kpọntịbe oro akande odudu owo mi ẹsiwak ndinyek mbon oro ẹkesobode mmọ idem. Marein, emi okodude ke West Africa, kpukpru ini ama esikop uyo ekaeka esie oro ama akakpa nte okotde enye ke okoneyo. Sia ndịk anamde, Marein ama esifiori n̄kpo, anamde ofụri mbonufọk esie ẹdemede ke idap. Ke akpatre, ibuot ama ebe eyenan̄wan emi.

Idahaemi, edieke mme akpan̄kpa ẹkpenen̄erede ẹdu uwem, ndi owụt ifiọk nte ke mmọ ẹkpenam ndịk omụm mbonima mmọ? Ke akpanikọ ikpanamke. Mme utọ mfiomo mfiomo etop ntre ẹsito mme demon.

Edi nso kaban̄a mme etop oro ẹtiede nte ke ẹnọ un̄wam ye ndọn̄esịt? Ke uwụtn̄kpọ, Gbassay, emi otode Sierra Leone, ama ọduọ udọn̄ọ. Eyenan̄wan emi ama adaba ndap emi ete esie oro ama akakpa ọkọbiọn̄ọrede enye ke iso. Enye ama eteme n̄wan emi ete aka etak eto kiet, eketet ikọn̄ eto oro, anuak ke mmọn̄, onyụn̄ ọn̄wọn̄. Eyenan̄wan emi ikenyeneke nditịn̄ n̄kpọ emi nnọ baba owo kiet mbemiso anamde ntre. Enye ama anam emi onyụn̄ okop nsọn̄idem.

N̄wan efen ọkọdọhọ ete ke ebe imọ ama ọbiọn̄ọde imọ ke iso ke okoneyo kiet ke enye ama akakpa.  N̄wan emi ọkọdọhọ ete ke enye ama eye etieti onyụn̄ esịne ediye ọfọn̄.

Mme utọ etop ye mme n̄kukụt ntre ẹsitie nte ẹfọn ẹnyụn̄ ẹnọ un̄wam. Nte mmọ ẹto Abasi? Baba, mmọ itoho. Jehovah edi “Abasi akpanikọ.” (Psalm 31:5) Enye tutu amama ikpenyịmeke ẹbre nnyịn n̄kari m̀mê ẹbian̄a nnyịn. Mme demon ikpọn̄îkpọn̄ ẹsinam oro.

Edi nte nti demon ẹdu? Baba. Idem okposụkedi ekemede nditie nte ke mmọ ẹkeme ndinọ un̄wam ke ndusụk ini, kpukpru mmọ ẹdọdiọk. Ke ini Devil eketịn̄de ikọ ye Eve, enye eketie ufan ufan. (Genesis 3:1) Edi nso ikotịbe inọ enye ke enye ama akakpan̄ utọn̄ onyụn̄ anam se Devil ọkọdọhọde enye anam? Enye ama akpa.

Satan ọkọdọhọ ke Eve idikpaha. Eve ama onịm enye ke akpanikọ, edi ke akpatre enye ama akpa

Afo ọmọfiọk ete ke edi ọsọ n̄kpọ idiọk owo nditie ufan ufan ye mbon oro enye oyomde ndibian̄a nnyụn̄ n̄kan ubọk. N̄ke mbon Africa kiet ọdọhọ ete, “Edet afia, esịt obubịt.” Ndien Ikọ Abasi ọdọhọ ete: “Satan ke idemesie ke oforo angel un̄wana.”​—2 Corinth 11:14.

Abasi idaha aba mme ndap, mme n̄kukụt, m̀mê mme uyo ẹtode ererimbot mme spirit itịn̄ ikọ ye mme owo ke isọn̄. Enye ekpeme onyụn̄ ọnọ mmọ item ebe ke Bible, emi ekemede ndinam owo “eben̄e idem ke kpukpru nde ndinam eti utom ekededi.”​—2 Timothy 3:17.

Ntre, ke ini Jehovah odụride nnyịn utọn̄ aban̄a mme n̄kari Devil, enye anam ntre sia enye amade nnyịn. Enye ọfiọk ete ke mme demon ẹdi mme asua oro ẹnyenede ndịk.